ຫວຽດນາມ-ຣັດເຊຍ ອອກຖະແຫລງການຮ່ວມມືຍຸດທະສາດຮອບດ້ານ

ວິທະຍຸກະຈາຍສຽງແຫ່ງຊາດຫວຽດນາມ ລາຍງານວ່າ: ຫວຽດນາມ ແລະ ຣັດເຊຍ ໄດ້ອອກຖະແຫລງການຮ່ວມ ກ່ຽວ ກັບການພົວພັນຄູ່ຮ່ວມມືຍຸດທະສາດຮອບດ້ານເລິກເຊິ່ງ ຂຶ້ນຕື່ມ ບົນພື້ນຖານຜົນງານ 30 ປີ ແຫ່ງການປະຕິບັດສົນທິສັນຍາ ກ່ຽວກັບບັນດາຫລັກການພື້ນຖານຂອງສາຍພົວພັນມິດຕະ ພາບ ຫວຽດນາມ ແລະ ຣັດເຊຍ ພາຍຫລັງ ທ່ານ ວະລາດີເມຍ ປູຕິນ,ປະທານາທິບໍດີ ຣັດເຊຍ ພ້ອມດ້ວຍຄະນະ ຜູ້ແທນຂັ້ນສູງສຳເລັດການຢ້ຽມຢາມຫວຽດນາມ ທາງລັດຖະກິດລະຫວ່າງວັນ ທີ 19 -20 ມິຖຸນາ ຕາມຄຳເຊື້ອເຊີນຂອງທ່ານ ຫງວຽນຝູຈ້ອງ, ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ຢ່າງຈົບງາມ.

ຖະແຫລງການດັ່ງກ່າວ ລະບຸວ່າ: ຫວຽດນາມ ແລະ ຣັດເຊຍ ໄດ້ເຫັນດີ ສືບຕໍ່ຊຸກຍູ້ການເຈລະຈາດ້ານການເມືອງ ຢ່າງເປັນປະຈຳ ແລະ ແທດຈິງຢູ່ຂັ້ນສູງ ແລະ ຂັ້ນສູງສຸດ; ຍູ້ແຮງການພົບປະ ຜ່ານຊ່ອງທາງພັກ ແລະ ລະຫວ່າງ ການນຳ ບັນດາອົງການ ນິຕິບັນຍັດ, ຄະນະກຳມະການ ຮ່ວມມື ລັດຖະສະພາ; ສືບຕໍ່ສົມ ທົບກັນ ມີການກະທຳຢູ່ບັນດາ ເວທີປາໄສ ລະຫວ່າງ ລັດຖະສະ ພາສາກົນ ແລະ ພາກພື້ນ. ພ້ອມທັງ ໄດ້ເນັ້ນໜັກເຖິງການພົວ ພັນ ຮ່ວມມືດ້ານປ້ອງກັນຊາດ – ປ້ອງກັນຄວາມສະຫງົບ ໄດ້ເພີ່ມບົດບາດພິເສດ ໃນການພົວພັນ ລະຫວ່າງ 2 ປະເທດ, ບໍ່ແນໃສ່ ຕ້ານຄືນຝ່າຍທີ 3 ໃດໆ, ມີຄວາມໄວ້ເນື້ອ ເຊື່ອໃຈສູງ ແລະ ສອດ ຄ່ອງກັບບັນດາຫລັກການ ແລະ ຂໍ້ກຳນົດຂອງກົດໝາຍສາກົນ, ເອົາໃຈໃສ່ພັດທະນາການຮ່ວມມືດ້ານເສດຖະກິດຫລາຍຂຶ້ນ; ເພີ່ມທະວີການລົງທຶນ 2 ຝ່າຍ ໃນຫລາຍຂົງເຂດ.

ນອກນີ້ ທັງສອງຝ່າຍ ຢືນຢັນພ້ອມແລ້ວ ຈະຊຸກຍູ້ ຄວາມມານະ ພະຍາຍາມລວມຂອງປະຊາຄົມສາກົນ ເພື່ອຮັບມືກັບບັນ ດາສິ່ງທ້າທາຍ ກ່ຽວກັບຄວາມໝັ້ນຄົງທີ່ກ່ຽວຂ້ອງກັບການທະ ຫານ ແລະ ຄວາມໝັ້ນຄົງ ແບບໃໝ່; ສືບຕໍ່ ພັດທະນາການ ຮ່ວມມື ໃນຂົງເຂດຕໍ່ສູ້ຕ້ານລັດທິກໍ່ການຮ້າຍ ສາກົນ ແລະ ການອຸປະຖຳການກໍການຮ້າຍສາກົນ ແລະ ຮັບປະກັນຄວາມໝັ້ນຄົງ, ຄວາມປອດໄພ ແລະ ຄວາມເສລີ ໃນການເດີນທະເລ ແລະ ການບິນ ແລະ ບັນດາການເຄື່ອນໄຫວດ້ານການຄ້າບໍ່ໃຫ້ຖືກກີດຂວາງ, ສະໜັບສະໜູນຄວາມລະງັບໃຈ, ບໍ່ນຳໃຊ້ອາວຸດ ຫລື ນາບຂູ່ນຳໃຊ້ອາວຸດ ແລະ ແກ້ໄຂບັນດາການຂັດແຍ້ງກັນ ລະຫວ່າງ ບັນດາຝ່າຍ ໂດຍສັນຕິວິທີ, ສອດຄ່ອງກັບບັນດາຫລັກການ ຂອງກົດບັດສະ ຫະປະຊາຊາດ ແລະ ກົດໝາຍສາກົນ.