ໃນຕອນເຊົ້າ ວັນທີ 24 ສິງຫາ 2022 ທີ່ຫ້ອງວ່າການສຳນັກງານນາຍົກລັດຖະ ມົນຕີ (ຫສນຍ) ໄດ້ຈັດພິທີປາຖະກະຖາເຜີຍແຜ່ເອກະສານສຳຄັນຂອງພັກ-ຂອງຊາດ ພາຍໃຕ້ການເປັນປະທານ ທ່ານ ຄຳລາວັນ ຈັນທະລາວັນ ຮອງເລຂາຄະນະບໍລິຫານງານພັກ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ມີບັນດາສະຫາຍຄະນະບໍລິຫານງານພັກ ຫສນຍ, ຄະນະພັກຮາກຖານ, ຄະນະໜ່ວຍພັກ ແລະ ສະມາຊິກພັກ ພ້ອມດ້ວຍພະນັກ ງານ- ລັດຖະກອນ ທົ່ວ ຫສນຍ ເຂົ້າຮ່ວມ.
ໃນພິທີຄັ້ງນີ້, ຜູ້ເຂົ້າຮ່ວມໄດ້ຮັບຟັງການເຜີຍແຜ່ເອກະສານກ່ຽວກັບວັນລັດຖະ ທຳມະນູນ ແຫ່ງ ສປປ ລາວ (15 ສິງຫາ 1991) ໂດຍໃໄດ້ຮັບກຽດຫ້ກຽດເຜີຍແຜ່ຈາກທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ ມາເຜີຍແຜ່ ໃຫ້ທຸກຄົນໄດ້ຮັບຮູ້ ແລະ ເຂົ້າໃຈເຊິ່ງທ່ານໄດ້ຍົກໃຫ້ເຫັນເຖິງຄວາມໝາຍ, ຄວາມສຳຄັນ ແລະ ປະຫວັັດຄວາມເປັນມາ ແຫ່ງການກຳເນີດ ແລະ ການຂະຫຍາຍຕົວຂອງລັດຖະທຳມະນູນ ແຫ່ງ ສປປ ລາວ ຕະຫຼອດໄລຍະ 31 ປີ ທີ່ຍາດມາໄດ້ ໃນພາລະກິດປົກປັກຮັກສາ ແລະ ສ້າງສາພັດ ທະນາປະເທດຊາດ ເຊິ່ງໄດ້ຖືກຮັບຮອງ ໃນກອງປະຊຸມ ຄັ້ງທີ 6 ຂອງສະພາປະຊາຊົນສູງສຸດ ຊຸດທີ II ໃນປີ 1991 ແລະ ປະກາດໃຊ້ລັດຖະທຳມະນູນ ໃນວັນທີ 15 ສິງຫາ 1991. ຫຼັງຈາກນັ້ນ, ມາຮອດທ້າຍປີ 1995, ສະພາແຫ່ງຊາດ ຊຸດທີ III ຈຶ່ງໄດ້ຕົກລົງກຳນົດເອົາວັນທີ 15 ສິງຫາ 1991 ເປັນວັນລັດຖະ ທຳມະ ນູນແຫ່ງຊາດ ແນໃສ່ຫວນຄືນການປະຕິບັດລັດຖະທຳມະນູນ ໃນແຕ່ລະປີ. ລັດຖະທຳມະນູນ ສະບັບທໍາອິດ ປະກອບດ້ວຍ 10 ໝວດ 80 ມາດຕາ, ໄດ້ກຳນົດແຈ້ງລະບອບການເມືອງ, ລະບອບເສດຖະກິດ-ສັງຄົມ, ລະບົບການຈັດຕັ້ງກົງຈັກລັດ ປະຊາທິປະໄຕ ປະຊາຊົນ ໃນໄລຍະໃໝ່, ການປ້ອງກັນຊາດ, ປ້ອງກັນຄວາມສະຫງົບ, ການຕ່າງປະເທດ, ສິດ ແລະ ພັນທະພື້ນຖານຂອງພົນລະເມືອງ, ພາສາ, ຕົວອັກສອນ, ເຄື່ອງໝາຍຊາດ, ທຸງຊາດ, ວັນຊາດ, ສະກຸນເງິນ ແລະ ນະ ຄອນຫຼວງ. ລັດຖະທຳມະນູນ ເປັນກົດ ໝາຍພື້ນຖານຂອງຊາດ, ທັງເປັນການຫັນແນວທາງປ່ຽນແປງໃໝ່ຢ່າງຮອບດ້ານ ທີ່ມີຫຼັກການຂອງພັກ ປະຊາຊົນ ປະຕິວັດລາວ ມາເປັນກົດໝາຍພື້ນຖານຂອງລະບອບ ປະຊາທິປະໄຕ ປະຊາຊົນລາວ ເພື່ອສຶກສາອົບຮົມປະຊາຊົນລາວບັນດາເຜົ່າ ໃຫ້ຍົກສູງນໍ້າໃຈຮັກຊາດ, ຮັກລະບອບໃໝ່ ເພີ່ມທະວີຄວາມສາມັກຄີປວງຊົນລາວທັງຊາດ, ເຊີດຊູບົດບາດເປັນເຈົ້າການໃນການປົກປັກຮັກສາ ແລະ ສ້າງສາພັດທະນາປະເທດຊາດ ຕາມຈຸດໝາຍທີ່ພັກໄດ້ກໍານົດໄວ້. ການປະ ກາດໃຊ້ລັດຖະທຳມະນູນ ເປັນເຫດ ການການເມືອງທີ່ສຳຄັນຂອງຊາດ, ທັງເປັນຂີດໝາຍໃໝ່ແຫ່ງການຫັນໄປສູ່ການຄຸ້ມຄອງລັດ, ຄຸ້ມຄອງສັງຄົມ ດ້ວຍກົດໝາຍ ແລະ ສ້າງລັດແຫ່ງກົດໝາຍເທື່ອລະກ້າວ, ສ່ອງແສງໃຫ້ເຫັນເຖິງລັກສະນະທາດແທ້ ແລະ ການເຕີບໃຫຍ່ຂະຫຍາຍຕົວຂອງລະບອບປະຊາທິ ປະໄຕ ປະຊາຊົນລາວ ພາຍໃຕ້ການນຳພາອັນຖືກຕ້ອງ ຂອງພັກປະຊາຊົນ ປະຕິວັດລາວ, ທັງເປັນການຢັ້ງຢືນຕໍ່ໂລກ ກ່ຽວກັບຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນຂອງ ສປປ ລາວ.
ຫຼັງຈາກນັ້ນ, ທ່ານ ທອງຜ່ານ ສະຫວັນເພັດ ຮອງລັດຖະມົນຕີ, ກະຊວງການຕ່າງປະເທດ ກໍໄດ້ໃຫ້ກຽດເຜີຍ ແຜ່ ເອກະ ສານວັນສ້າງຕັ້ງອາຊຽນ (8 ສິງຫາ 1967), ສະພາບການຂອງໂລກ ແລະ ພາກພື້ນ ຈາກເຊິ່ງທ່ານໄດ້ຍົກໃຫ້ເຫັນປະຫວັດຄວາມເປັນມາ, ການຂະຫຍາຍຕົວຂອງອາຊຽນ ແລະ ການຮ່ວມມືຂອງ ສປປ ລາວ ກັບອາຊຽນ ລວມທັງຍົກໃຫ້ເຫັນສະພາບການພົ້ນເດັ່ນຢູ່ ພາກພື້ນ ແລະ ສາກົນ ລວມທັງ ຜົນສຳເລັດທີ່ພົ້ນເດັ່ນ ດ້ານວຽກງານການຕ່າງປະເທດ ຂອງ ສປປ ລາວ ໃນໄລຍະຜ່ານມາ ແລະ ທິດທາງໜ້າທີ່ຈຸດສຸມຂອງຂະແໜງການຕ່າງປະເທດ ໃນຊຸມປີຕໍ່ໜ້າ.
ໃນໂອກາດດຽວກັນ ທ່ານ ຄຳລາວັນ ຈັນທະລາວັນ ຮອງລັດຖະມົນຕີ, ຮອງຫົວໜ້າ ຫສນຍ ກໍຍັງໄດ້ໃຫ້ກຽດເຜີຍແຜ່ເອກະສານວັນຍຶດອຳນາດທົ່ວປະເທດ (23 ສິງຫາ 1945 ແລະ 23 ສິງຫາ 1975) ເຊິ່ງທ່ານໄດ້ຍົກໃຫ້ເຫັນປະຫວັດຄວາມເປັນມາຂອງການຍຶດອຳນາດເດືອນສິງຫາ ປີ 1945; ການຍຶດອຳນາດໃນວັນທີ 23 ສິງຫາ ປີ 1975; ສືບຕໍ່ເສີມຂະຫຍາຍມູນເຊື້ອ 23 ສິງຫາ ເຂົ້າໃນການພັດທະນາປະເທດຊາດ. ນອກນັ້ນ, ຍັງເຜີຍແຜ່ເອກະສານວັນສ້າງຕັ້ງແນວລາວສ້າງຊາດ (13 ສິງຫາ 1950) ໂດຍເຊິ່ງທ່ານຍົກໃຫ້ເຫັນມູນເຊື້ອ ຄວາມໝາຍຄວາມສຳຄັນຂອງວັນດັ່ງກ່າວ ເຊິ່ງແມ່ນໝາກຜົນແຫ່ງການພົວພັນຮ່ວມມື, ຄວາມສໍາເລັດຂອງການຕໍ່ສູ້ແຫ່ງການປະຕິວັດ ພາຍໃຕ້ການນຳພາຂອງພັກ ປະຊາຊົນ ປະຕິວັດລາວ ທີ່ເຕັມໄປດ້ວຍຄວາມອົງອາດກ້າຫານ ຂອງປະຊາຊົນລາວບັນດາເຜົ່າ ໃນການຕໍ່ສູ້ປົກປັກຮັກສາປະເທດຊາດ ເຊິ່ງມັນສະແດງອອກໃຫ້ເຫັນເຖິງຜົນງານ ການປະກອບສ່ວນສຸມທຸກກຳລັງເຫື່ອແຮງ ເຂົ້າໃນການຕໍ່ ສູ້ປົກປັກຮັກສາປະເທດຊາດ ແລະ ການໝູນໃຊ້ທິດສະດີມາກ-ເລນິນ ຢ່າງປະດິດສ້າງ ແທດເໝາະກັບຈຸດພິເສດ ແລະ ສະພາບເງື່ອນໄຂຂອງປະເທດລາວ, ເປັນການໄຂສັງກາດໃໝ່ ອັນສະຫວ່າງສະໄຫວ ໃຫ້ປະຊາຊົນລາວ ໄດ້ມີຄວາມເປັນເອກະລາດ ມີອຳນາດອະທິປະໄຕ, ເປັນເຈົ້າຕົນເອງ, ນຳພາປະຊາຊົນລາວບັນດາເຜົ່າທົ່ວປະເທດ ກ້າວເຂົ້າສູ່ລະບອບປະຊາທິປະໄຕ ຈົນເຖິງປັດຈຸບັນ.
ໃນຕອນທ້າຍ, ທ່ານ ຄຳລາວັນ ຈັນທະລາວັນ ໄດ້ມີຄຳເຫັນ ໃຫ້ຜູ້ທີ່ເຂົ້າຮ່ວມກອງປະຊຸມຄັ້ງນີ້ ຈົ່ງພ້ອມກັນເອົາໃຈໃສ່ເຊື່ອມຊຶມ, ເຄົາລົບ ແລະ ປະຕິບັດໜ້າທີ່ ຕາມແນວທາງນະໂຍບາຍຂອງພັກ, ລັດຖະທໍາມະນູນ, ກົດໝາຍ, ລະບຽບການຂອງລັດ ແລະ ບັນດາເອກະສານສຳຄັນຂອງພັກ ຢ່າງເລິກເຊິ່ງ ເພື່ອນໍາໄປຈັດຕັ້ງປະຕິບັດເຂົ້າໃນວຽກງານວິຊາສະເພາະຕົວຈິງຂອງຕົນ ດ້ວຍຄວາມຮັບຜິດຊອບສູງ ໃນການຈັດຕັ້ງປະຕິບັດໜ້າທີ່ແລະ ວຽກງານທີ່ຖືກມອບໝາຍ ດ້ວຍຄວາມຮັບຜິດຊອບສູງ ໂດຍສະເພາະວຽກງານເສນາທິການ, ວຽກງານປະສານງານ ແລະ ວຽກງານບໍລິການຮັບໃຊ້ ໃຫ້ແກ່ການນຳ ໃຫ້ມີປະສິດທິ ພາບ ແລະ ປະສິດທິຜົນ ເປັນຢ່າງດີ.
