ຕອນເຊົ້າ ວັນທີ 19 ກຸມພາ 2021 ການນຳ ແລະ ພະນັກງານ-ລັດຖະກອນທັງໝົດຂອງຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ນຳໂດຍທ່ານ ຄຳເຈນ ວົງໂພສີ, ລັດຖະມົນຕີ, ຫົວໜ້າຫ້ອງວ່າການສຳນັກ ງານນາຍົກລັດຖະມົນຕີ ໄດ້ເປັນກຽດຕ້ອນຮັບ ແລະ ເຂົ້າຮ່ວມຮັບຟັງການແນະນຳຕົວຂອງຜູ້ສະໝັກຮັບເລືອກຕັ້ງສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ 05 ທ່ານ, ນຳໂດຍ ທ່ານ ປອ. ໄຊສົມພອນ ພົມວິຫານ, ປະທານສູນກາງແນວລາວສ້າງຊາດ.
ການລົງແນະນຳຕົວ ແລະ ພົບປະ ຜູ້ມີສິດປ່ອນບັດເລືອກຕັ້ງ ໃນຄັ້ງນີ້ ເພື່ອເຮັດໃຫ້ຜູ້ມີສິດປ່ອນບັດເລືອກຕັ້ງ ໂດຍສະເພາະ ພະນັກງານ-ລັດຖະກອນ ຫສນຍ ໄດ້ເພີ່ມຄວາມຮັບຮູ້, ຄວາມເຂົ້າໃຈ ເລິກເຊິ່ງກວ່າເກົ່າ ຕໍ່ຄວາມໝາຍ, ຄວາມສຳຄັນ ແລະ ຈຸດປະສົງຂອງການເລືອກຕັ້ງ, ລວມເຖິງໂຄງປະກອບບຸກຄະລາກອນ ຜູ້ສະໝັກສະມາຊິກສະພາແຫ່ງຊາດ ຊຸດ IX ໃນຂອບເຂດທົ່ວປະເທດ ແລະ ເຂດເລືອກຕັ້ງທີ 1 ນະຄອນຫຼວງວຽງຈັນ, ທັງເຮັດໃຫ້ຜູ້ມີສິດປ່ອນບັດເລືອກຕັ້ງ ໄດ້ມີໂອກາດພົບພໍ້, ໄດ້ຍິນສຽງຕົວຈິງ ຂອງຜູ້ສະໝັກຮັບເລືອກຕັ້ງ ແລະ ຮັບຮູ້ເຖິງປະຫວັດ, ຜົນງານ ແລະ ການເຄື່ອນໄຫວ ຂອງຜູ້ສະໝັກຮັບເລືອກຕັ້ງ ແນໃສ່ເຮັດໃຫ້ການເລືອກຕັ້ງໃນຄັ້ງນີ້ ບັນລຸຜົນສຳເລັດຕາມລະດັບຄາດໝາຍທີ່ວາງໄວ້.
ໂອກາດດັ່ງກ່າວ, ທ່ານ ຄຳເຈນ ວົງໂພສີ ຕາງໜ້າໃຫ້ການນຳ ແລະພະນັກງານ-ລັດຖະກອນ ຫສນຍ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ຜູ້ຮັບສະໝັກເລືອກຕັ້ງສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ທີ່ໄດ້ລົງຫາສຽງໃນຄັ້ງນີ້. ຫຼັງຈາກນັ້ນ ຜູ້ຮັບສະໝັກຮັບເລືອກຕັ້ງ ໄດ້ຜັດປ່ຽນກັນສະເໜີປະຫວັດ, ຜົນງານ ແລະ ຄວາມພ້ອມຂອງຕົນ ທີ່ຈະປະຕິບັດພາລະບົດບາດ ແລະ ໜ້າທີ່ໃນສະພາແຫ່ງຊາດ ເປັນຕົວແທນໃຫ້ແກ່ປະຊາຊົນລາວບັນດາເຜົ່າ ໃນການພິຈາລະນາ ແລະ ຕົກລົງບັນຫາສຳຄັນຂອງຊາດ ກໍ່ຄືການປົກປ້ອງສິດ ແລະ ຜົນປະໂຫຍດອັນຊອບທຳ ຂອງປະເທດຊາດ ແລະ ປະຊາຊົນ ໃຫ້ດີທີ່ສຸດ.
ພາບ ແລະ ຂ່າວ: ກົມປະຊາສຳພັນ ຫສນຍ
Loading...