ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 15 ທັນວາ 2023 ອົງຄະນະພັກຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດພິທີເຜີຍແຜ່ເຊື່ອມຊຶມ ເອກະສານສໍາຄັນຂອງພັກ, ຂອງຊາດ ແລະ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 103 ປີ, ພາຍໃຕ້ການເປັນປະທານ ຂອງສະຫາຍ ອາລຸນໄຊ ສູນນະລາດ, ກຳມະການສູນກາງພັກ, ເລຂາຄະນະພັກ, ລັດຖະ ມົນຕີ, ຫົວໜ້າ ຫສນຍ; ມີສະຫາຍຮອງເລຂາຄະນະພັກ ຫສນຍ, ບັນດາສະຫາຍ ຄະນະບໍລິຫານງານພັກ ຫສນຍ, ຄະນະພັກຮາກຖານ, ຄະນະໜ່ວຍພັກຮາກຖານ ແລະ ສະມາຊິກພັກ, ພະນັກງານ-ລັດຖະກອນ ທີ່ຂຶ້ນກັບອົງຄະນະພັກ ຫສນຍ ເຂົ້າຮ່ວມ.
ໃນວາລະຕອນເຊົ້າ ໄດ້ມີການຈັດພິທີເຜີຍແຜ່ເຊື່ອມຊຶມ ຜົນກອງປະຊຸມຄົບຄະນະກາງສະໄໝ ຂອງຄະນະບໍລິ ຫານງານສູນກາງພັກ ສະໄໝທີ XI ແລະ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 103 ປີ ຈຸດປະສົງ ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ທີ່ຂຶ້ນກັບອົງຄະນະພັກ ຫສນຍ ໄດ້ຮັບຮູ້, ເຂົ້າໃຈ, ກຳແໜ້ນ ແລະ ເປັນເອກະພາບ ຕໍ່ເນື້ອໃນຈິດໃຈ ຂອງຜົນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI ແລະ ສາມາດນໍາໄປຈັດຕັ້ງຜັນຂະຫຍາຍ ເຂົ້າໃນຂົງເຂດວຽກງານໃນຄວາມຮັບຜິດຊອບຂອງຕົນ ໃຫ້ສອດຄ່ອງ, ເກີດດອກອອກຜົນ, ມີຜົນສຳເລັດ ຕາມຈຸດປະສົງ ແລະ ລະດັບຄາດໝາຍ ທີ່ກຳນົດໄວ້; ທັງເຮັດໃຫ້ຜູ້ເຂົ້າຮ່ວມ ໄດ້ຄົ້ນຄວ້າ, ສຶກສາຮໍ່າຮຽນເອົາແບບຢ່າງ ມູນເຊື້ອອັນດີງາມ, ຄຸນສົມບັດສິນທໍາປະຕິວັດ, ຜົນງານ ແລະ ຄຸນງາມຄວາມດີ ຂອງປະທານ ໄກສອນ ພົມວິຫານ ມາໝູນໃຊ້ເຂົ້າໃນການດຳລົງຊີວິດ ແລະ ຈັດຕັ້ງປະຕິບັດວຽກງານຕົວຈິງ ໃນເງື່ອນໄຂໃໝ່ ໃຫ້ເກີດປະໂຫຍດຕໍ່ປະເທດຊາດ ແລະ ປະຊາຊົນ. ທັງໝົດນັ້ນ ເພື່ອຍົກສູງຄວາມຮັບຜິດຊອບການເມືອງ ຂອງສະມາຊິກພັກ, ພະນັກງານ-ລັດຖະກອນ, ເພີ່ມທະວີຄວາມສາມັກຄີເປັນປຶກແຜ່ນ, ສ້າງຄວາມເຊື່ອໝັ້ນ ຕໍ່ການນຳພາຂອງພັກ ແລະ ແກ້ໄຂປະກົດການຫຍໍ້ທໍ້ຕ່າງໆ ໃນການຈັດຕັ້ງ.
ໃນໂອກາດນີ້, ສະຫາຍ ອາລຸນໄຊ ສູນນະລາດ ໄດ້ໃຫ້ກຽດເຜີຍແຜ່ເຊື່ອມຊືມ ມະຕິກອງປະຊຸມຄົບຄະນະກາງສະ ໄໝ ຂອງຄະນະບໍລິຫານງານສູນກາງພັກ ສະໄໝທີ XI ໂດຍໄດ້ຍົກໃຫ້ເຫັນເນື້ອໃນສໍາຄັນ ທີ່ກອງປະຊຸມດັ່ງກ່າວ ໄດ້ນຳມາຄົ້ນຄວ້າ, ປຶກສາຫາລື ແລະ ຊີ້ນຳ, ໃນນັ້ນ ເນື້ອໃນປະກອບມີ: ຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ໄລຍະເຄິ່ງສະໄໝ; ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໄລຍະເຄິ່ງສະໄໝ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ; ມະຕິ ວ່າດ້ວຍສືບຕໍ່ຊຸກຍູ້ການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນ ທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ; ແລະ ດຳເນີນຊີວິດການເມືອງພາຍໃນຄະນະບໍລິຫານງານສູນກາງພັກ ສະໄໝທີ XI ໄລຍະເຄິ່ງສະໄໝ. ນອກນັ້ນ, ກອງປະຊຸມຄົບຄະນະກາງສະໄໝ ຍັງໄດ້ໃຫ້ທິດຊີ້ນຳ ຈັດຕັ້ງປະຕິບັດວຽກງານຈຸດສຸມຈຳນວນໜຶ່ງ ໃນໄລຍະທ້າຍສະໄໝ ເປັນຕົ້ນ ແກ້ໄຂສິ່ງຫຍໍ້ທໍ້ພາຍໃນການຈັດຕັ້ງ ໃຫ້ປອດໃສ, ເຂັ້ມແຂງ, ໜັກແໜ້ນ; ປັບປຸງການຈັດຕັ້ງແຕ່ລະຂັ້ນ ໄປຕາມທິດກະທັດຮັດ ແລະ ສົມເຫດສົມຜົນ; ເອົາໃຈໃສ່ຄຸ້ມຄອງລາຄາສິນຄ້າ, ເບິ່ງແຍງຊີວິດການເປັນຢູ່ຂອງພະນັກງານ ແລະ ປະຊາຊົນ; ຍົກສູງປະສິດທິພາບ ການຄຸ້ມຄອງລັດ-ຄຸ້ມຄອງສັງຄົມ; ຫັນລົງກໍ່ສ້າງຮາກຖານການເມືອງ ແລະ ພັດທະນາຊົນນະບົດ; ຍູ້ແຮງການເກັບລາຍຮັບທັນສະໄໝ ແລະ ການຊຳລະສະສາງ ຜ່ານລະບົບທະນາຄານ; ສືບຕໍ່ປັບປຸງສະພາບແວດລ້ອມການລົງທຶນ; ຍູ້ແຮງການປະຕິຮູບລັດວິສາຫະກິດ; ແກ້ໄຂກົນໄກການປະສານງານ ທັງສາຍຕັ້ງ ແລະ ສາຍຂວາງ; ສືບຕໍ່ຊີ້ນຳ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ເພີ່ມທະວີການໂຄສະນາ, ປຸກລະດົມ ແລະ ຍູ້ຂະບວນການແຂ່ງຂັນ ຮັກຊາດ ແລະ ພັດທະນາສູ່ລວງເລິກ ຕິດພັນກັບການເຂົ້າຮ່ວມປະຕິບັດ 2 ວາລະແຫ່ງຊາດ ໃຫ້ກາຍເປັນຂະບວນການກວ້າງຂວາງຂອງມະຫາຊົນ.
ຫຼັງຈາກນັ້ນ, ສະຫາຍ ຄຳລາວັນ ຈັນທະລາວັນ, ຮອງເລຂາຄະນະພັກ, ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ກໍ່ໄດ້ໃຫ້ກຽດສືບຕໍ່ເຜີຍແຜ່ເອກະສານວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 103 ປີ ໂດຍໄດ້ຍົກໃຫ້ເຫັນຊີີວິດ, ການເຄື່ອນໄຫວປະຕິວັດທີ່ພົ້ນເດັ່ນ, ຜົນງານອັນຍິ່ງໃຫຍ່ ແລະ ແບບຢ່າງອັນດີເລີດ ຂອງປະທານ ໄກສອນ ພົມວິຫານ. ຖືໂອກາດນີ້, ສະຫາຍ ຄຳລາວັນ ຈັນທະລາວັນ ຍັງໄດ້ສະເໜີຜູ້ເຂົ້າຮ່ວມຮັບຟັງການເຜີຍແຜ່ຄັ້ງນີ້ ພ້ອມກັນຕັ້ງໜ້າຮໍ່າຮຽນເອົາແບບຢ່າງອັນດີເລີດ ຂອງປະທານໄກສອນ ພົມວິຫານ ເພື່ອພ້ອມກັນສືບທອດພາລະກິດຂອງພັກ ໃນໄລຍະໃໝ່.
ໃນຕອນບ່າຍ, ອົງຄະນະພັກ ຫສນຍ ກໍ່ໄດ້ສືບຕໍ່ເຜີຍແຜ່ເອກະສານກະກຽມກອງປະຊຸມໃຫຍ່ 3 ຂັ້ນຂອງພັກ ໃຫ້ແກ່ບັນດາສະຫາຍຄະນະພັກຮາກຖານ, ຄະນະໜ່ວຍພັກຮາກຖານ, ຄະນະໜ່ວຍພັກ ທີ່ຂຶ້ນກັບຄະນະພັກຮາກຖານ, ຄະນະບໍລິຫານງານ 3 ອົງການຈັດຕັ້ງມະຫາຊົນ ແລະ ຄະນະໜ່ວຍ 3 ອົງການຈັດຕັ້ງມະຫາຊົນ ພາຍໃນອົງຄະນະພັກ ຫສນຍ, ເຊິ່ງເຜີຍແຜ່ບັນເອກະສານທີ່ກ່ຽວຂ້ອງ ໂດຍແມ່ນ ສະຫາຍ ອາລຸນໄຊ ສູນນະລາດ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ, ຫົວໜ້າ ຫສນຍ ເພື່ອໃຫ້ຜູ້ເຂົ້າຮ່ວມ ໄດ້ຮັບຮູ້, ເຂົ້າໃຈ ແລະ ເປັນເອກະພາບຕໍ່ບັນດາເອກະສານ ທີ່ນຳມາເຜີຍແຜ່, ແນໃສ່ເຮັດໃຫ້ການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຖືກຕ້ອງຕາມຂັ້ນຕອນ, ລະບຽບການ, ມີຜົນສຳເລັດ ຕາມຈຸດປະສົງ ແລະ ລະດັບຄາດໝາຍ ທີ່ກຳນົດໄວ້.
ໃນໂອກາດກ່າວປິດພິທີ, ສະຫາຍ ອາລຸນໄຊ ສູນນະລາດ ໄດ້ມີຄຳເຫັນເນັ້ນໜັກໃຫ້ເອົາໃຈໃສ່ຕື່ມບາງດ້ານ ເປັນຕົ້ນ ໃຫ້ຄະນະພັກແຕ່ລະຂັ້ນ ນໍາພາເຊື່ອມຊຶມກໍາແໜ້ນເອກະສານ ກໍ່ຄືຈິດໃຈທີ່ນຳມາເຜີຍແຜ່ໃນຄັ້ງນີ້ ໃຫ້ສະມາຊິກພັກ, ພະນັກງານ-ລັດຖະກອນ ໃນການຈັດຕັ້ງຂອງຕົນ ໃຫ້ຮັບຮູ້, ເຂົ້າໃຈ ແລະ ເຂົ້າຮ່ວມໃນຂະບວນການຢ່າງຕັ້ງໜ້າ; ການກະກຽມດຳເນີນກອງປະຊຸມໃຫຍ່ 3 ຂັ້ນ ໃຫ້ແຕ່ງຕັ້ງຄະນະຮັບຜິດຊອບໃນດ້ານຕ່າງໆ (ວຽກບຸກຄະລາກອນ, ວຽກເນື້ອໃນ, ວຽກຂະບວນການ ແລະ ອື່ນໆ) ໂດຍສົມທົບກັບກົມຈັດຕັ້ງ ແລະ ພະນັກງານ, ທັງມີກົນໄກປະສານສົມທົບກັບຄະນະຮັບຜິດຊອບຈັດກອງປະຊຸມຄັກແນ່. ນອກນັ້ນ ຍັງໄດ້ຮຽກຮ້ອງໃຫ້ມີການກວດກາ ແລະ ປ້ອງກັນສໍານັກງານອົງການຂອງຕົນ ໃຫ້ມີຄວາມສະຫງົບ ແລະ ປອດໄພ; ພ້ອມທັງ ສືບຕໍ່ກະກຽມສະຫຼຸບວຽກງານວິຊາສະເພາະ ແລະ ອົງການຈັດຕັ້ງມະຫາຊົນ ໃຫ້ສຳເລັດທັນຕາມກຳນົດເວລາ.
ພາບ ແລະ ຂ່າວໂດຍ: ກົມປະຊາສຳພັນ, ຫສນຍ