ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມປຶກສາຫາລືການຂຶ້ນທະບຽນພະທາດໂຜ່ນ ແລະ ຜາສາດເຮືອນຫີນເປັນມໍລະດົກທາງດ້ານວັດທະນະທໍາລະດັບທ້ອງຖິ່ນຂອງແຂວງຂຶ້ນໃນວັນທີ 24 ພຶດສະພານີ້ທີ່ຫ້ອງປະຊຸມສົງບ້ານໂພນທາດ ເມືອງໄຊພູທອງ ແຂວງສະຫວັນນະເຂດ ໂດຍການເຂົ້າຮ່ວມເປັນປະທານຂອງທ່ານ ໂພສີສ້ອຍ ກຸທິລາດ ຫົວໜ້າພະແນກຖະແຫຼງຂ່າວ-ວັດທະນະທໍາ ແລະ ທ່ອງທ່ຽວ ( ຖວທ ) ແຂວງ.
ທ່ານ ອຸດອນ ບຸດຕະວົງ ຫົວໜ້າຫ້ອງການ ຖວທ ເມືອງໄດ້ຜ່ານຂໍ້ຕົກລົງຂອງທ່ານເຈົ້າແຂວງສະຫວັນນະເຂດວ່າດ້ວຍການແຕ່ງຕັ້ງຄະນະກໍາມະການຄົ້ນຄວ້າເພື່ອຮັບເອົາພະທາດໂຜ່ນ ແລະ ຜາສາດເຮືອນຫີນ ເມືອງໄຊພູທອງ ເປັນມໍລະດົກລະດັບທ້ອງຖິ່ນຂອງແຂວງ ເພື່ອເປັນການປຶກສາຫາລືເປັນເອກະພາບຮັບຮອງເອົາພະທາດໂຜ່ນ ແລະ ຜາສາດເຮືອນຫີນຂຶ້ນທະບຽນມໍລະດົກທາງດ້ານວັດທະນທໍາລະດັບທ້ອງຖິ່ນຂອງແຂວງເພື່ອກະກຽມຄວາມພ້ອມໃນດ້ານເນື້ອໃນ, ນິຕິກຳຕ່າງໆ, ການແບ່ງງານມອບວຽກໃຫ້ແຕ່ລະອະນຸກຳມະການ, ການຄົ້ນຄວ້າງົບປະມານຮັບໃຊ້, ຊີ້ນໍາຕິດຕາມ, ຄຸ້ມຄອງ ແລະຊຸກຍູ້ການຈັດຕັ້ງປະຕິບັດບັນດາໜ້າວຽກ,ລາຍງານຄວາມຄືບໜ້າ ແລະຜົນສໍາເລັດການຈັດຕັ້ງປະຕິບັດໜ້າວຽກໃນແຕ່ລະໄລຍະໃຫ້ສຳເລັດຕາມຄາດໝາຍທີ່ວາງໄວ້ເພື່ອອະນຸລັກປົກປັກຮັກສາ ແລະ ດຶງດູດນັກທ່ອງທ່ຽວໃຫ້ມາທ່ອງທ່ຽວພະທາດໂຜ່ນ ແລະ ຜາສາດເຮືອນຫີນໃຫ້ຫຼາຍຂຶ້ນ.