ກອງປະຊຸມຄັ້ງທີ 1 ຂອງຄະນະກຳມະການລະດັບຊາດ ເພື່ອປັບປຸງລັດຖະທຳມະນູນ ແຫ່ງ ສປປ ລາວ ສະບັບປີ 2015 ໄດ້ຈັດຂຶ້ນໃນວັນທີ 7 ມິຖຸນາ ຜ່ານມາ ທີ່ສະພາແຫ່ງຊາດ ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ປະທານຄະນະກຳມະການລະດັບຊາດປັບປຸງລັດຖະທຳມະນູນ; ມີທ່ານຮອງປະທານ ແລະ ບັນດາທ່ານຄະນະກຳມະການລະດັບຊາດປັບປຸງລັດຖະທຳມະນູນ ປີ 2015 ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທັງນີ້, ເພື່ອຈັດຕັ້ງປະຕິບັດມະຕິກົມການເມືອງສູນກາງພັກ ສະບັບເລກທີ 15/ກມສພ, ລົງວັນທີ 22 ພຶດສະພາ 2024 ວ່າດ້ວຍການແຕ່ງຕັ້ງຄະນະກຳມະການລະດັບຊາດ ປັບປຸງລັດຖະທຳມະນູນ ແຫ່ງ ສປປ ລາວ ສະບັບປີ 2015 ໃຫ້ທັນເວລາ ແລະ ມີປະສິດທິຜົນ ທັງເປັນການປຶກສາຫາລື ແລະ ຕົກລົງວຽກງານສຳຄັນຮີບດ່ວນຈຳນວນໜຶ່ງກ່ຽວກັບການປັບປຸງລັດຖະທຳມະນູນ.
ຜູ້ເຂົ້າຮ່ວມໄດ້ຄົ້ນຄວ້າ ແລະ ປະກອບຄຳເຫັນຢ່າງເລິກເຊິ່ງ, ກົງໄປກົງມາ ໃສ່ຮ່າງແຜນການເຄື່ອນໄຫວວຽກງານຂອງຄະນະກຳມະການລະດັບຊາດປັບປຸງລັດຖະທຳມະນູນ, ຮ່າງແຜນດຳເນີນງານຂອງຄະນະກຳມະການລະດັບຊາດປັບປຸງລັດຖະທຳມະນູນ, ຮ່າງຂໍ້ຕົກລົງ ວ່າດ້ວຍການແຕ່ງຕັ້ງກອງເລຂາ ແລະ ອະນຸກຳມະການ, ຮ່າງຂໍ້ຕົກລົງ ວ່າດ້ວຍການແບ່ງງານພາຍໃນຄະນະກຳມະການລະດັບຊາດ ແລະ ຄະນະປະຈຳການປັບປຸງລັດຖະທຳມະນູນ, ຮ່າງແຜນການປະເມີນການຈັດຕັ້ງປະຕິບັດລັດຖະທຳມະນູນ ສະບັບປີ 2015; ກອງປະຊຸມໄດ້ພິຈາລະນາ ແລະ ເຫັນດີຮັບຮອງເອົາໂດຍຫຼັກການຕໍ່ບັນດາເອກະສານສຳຄັນກ່ຽວກັບວຽກງານປັບປຸງລັດຖະທຳມະນູນ ແລະ ມອບໃຫ້ຜູ້ປະຈຳການຊີ້ນຳກອງເລຂາ ຮີບຮ້ອນປັບປຸງບັນດາເອກະສານດັ່ງກ່າວຕາມຄວາມເຫັນ ຂອງບັນດາທ່ານຄະນະກຳມະການລະດັບຊາດປັບປຸງລັດຖະທຳມະນູນ ເພື່ອຈັດຕັ້ງປະຕິບັດໃຫ້ທັນເວລາ.
ທ່ານ ປະທານສະພາແຫ່ງຊາດ ໄດ້ມີຄຳເຫັນເນັ້ນໜັກໃຫ້ຄົ້ນຄວ້າເນື້ອໃນ ຫຼື ກຳນົດບັນຫາໃຫຍ່, ບັນຫາທີ່ເປັນຫຼັກການລວມ; ສ່ວນຂໍ້ກຳນົດ ຫຼື ຂໍ້ບັນຍັດລະອຽດ ໃຫ້ກຳນົດໃນກົດໝາຍຂົງເຂດຕ່າງໆ. ໃຫ້ແຕ່ລະອະນຸກຳມະການ ກຳນົດຈະແຈ້ງແຕ່ລະໜ້າວຽກ, ກຳນົດເວລາສຳເລັດແຕ່ລະໜ້າວຽກ, ການນຳໃຊ້ງົບປະມານຕໍ່ແຕ່ລະໜ້າວຽກ ບົນຈິດໃຈປະຢັດ ຕ້ານການຟຸ່ມເຟືອຍ; ນອກຈາກນີ້, ຕ້ອງກຳນົດລະອຽດຈະແຈ້ງລະບອບປະຊຸມຂອງຄະນະກຳມະການລະດັບຊາດ, ຄະນະປະຈຳການ, ກອງເລຂາ ແລະ ອະນຸກຳມະການຕ່າງໆ, ລະບອບລາຍງານຂໍທິດຊີ້ນຳຈາກກົມການເມືອງ ແລະ ຄະນະເລຂາທິການສູນກາງພັກ ແລະ ລະບອບທາບທາມຄວາມເຫັນຕໍ່ຮ່າງລັດຖະທຳມະນູນ.
ສຳລັບກອງເລຂາ ແລະ ອະນຸກຳມະການຕ່າງໆ ໃຫ້ມີການແບ່ງງານ, ແບ່ງຄວາມຮັບຜິດຊອບພາຍໃນໃຫ້ລະອຽດຈະແຈ້ງ; ໃຫ້ມີຜູ້ປະຈຳການ, ຜູ້ປະສານງານ, ມີລະບອບເຮັດວຽກ, ລະບອບປະຊຸມ, ລະບອບລາຍງານຂໍທິດຊີ້ນຳຢ່າງຈະແຈ້ງ; ຈົ່ງຮີບຮ້ອນຜັນຂະຫຍາຍແຜນການ, ແຜນດຳເນີນງານ ເປັນແຜນວຽກຕົວຈິງຂອງຕົນເພື່ອຈັດຕັ້ງປະຕິບັດໃຫ້ມີປະສິດທິຜົນ. ການແບ່ງງານພາຍໃນຄະນະກຳມະການລະດັບຊາດ, ຄະນະປະຈຳການນັ້ນ ຈົ່ງເອົາໃຈໃສ່ຍົກສູງຄວາມຮັບຜິດຊອບໃນວຽກງານປັບປຸງລັດຖະທຳມະນູນ ຕາມທີ່ໄດ້ແບ່ງງານ ເພື່ອພ້ອມກັນຈັດຕັ້ງປະຕິບັດແຜນການ, ແຜນດຳເນີນງານໃຫ້ສຳເລັດຕົວຈິງ.
ສຳລັບຄາດໝາຍສູ້ຊົນລວມໃນການຈັດຕັ້ງປະຕິບັດແຜນການ ແລະ ແຜນດຳເນີນງານແຕ່ນີ້ຫາທ້າຍປີ 2024 ຈົ່ງພ້ອມກັນສູ້ຊົນຈັດຕັ້ງປະຕິບັດໃຫ້ສຳເລັດໂດຍພື້ນຖານການປັບປຸງລັດຖະທຳມະນູນ ແລະ ນຳເຂົ້າຂໍຄວາມເຫັນຈາກ ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI, ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ແລະ ກອງປະຊຸມສະພາປະຊາຊົນຂັ້ນແຂວງ ເພື່ອທາບທາມຄວາມເຫັນ; ຫຼັງຈາກນັ້ນ, ສືບຕໍ່ປັບປຸງ ແລະ ນຳອອກທາບທາມຄວາມເຫັນຢ່າງກວ້າງຂວາງ (ເດືອນ 1-2 ປີ 2025) ແລ້ວສືບຕໍ່ປັບປຸງ ແລະ ນຳສະເໜີຂໍຄວາມເຫັນຕໍ່ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ XI ກ່ອນຈະນຳສະເໜີຕໍ່ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ IX ເພື່ອພິຈາລະນາຮັບຮອງ. ຄາດຄະເນວ່າ ໃນກາງເດືອນກໍລະກົດ 2025 ໃຫ້ໄດ້ປະກາດໃຊ້ລັດຖະທຳມະນູນສະບັບປັບປຸງໃໝ່.
ຂ່າວ: ສພຊ
