ວັນທີ 18 ມິຖຸນາ 2024 ນີ້ທີ່ ຫ້ອງປະຊຸມຂອງກະຊວງຍຸຕິທໍາ ກົມໂຄສະນາເຜີຍແຜ່ກົດໝາຍ ແລະ ບັນດາກົມຂອງກະຊວງສຶກສາທິການ ແລະ ກິລາ, ໄດ້ເປີດກອງປະຊຸມປຶກສາຫາລືກ່ຽວກັບການໂຄສະນາເຜີຍແຜ່ກົດໝາຍ ຢູ່ສະຖານການສຶກສາຂຶ້ນ. ໂດຍການເປັນປະທານຂອງ ທ່ານ ນາງ ສີສຸດາ ໂສພາວັນດີ ກໍາມະການຄະນະພັກກະຊວງ ຫົວໜ້າກົມໂຄສະນາເຜີຍແຜ່ກົດໝາຍ.
ຈຸດປະສົງເພື່ອປຶກສາຫາລືກ່ຽວກັບການຫັນເອົາກົດໝາຍ ເຂົ້າໃນຫຼັກສູດການຮຽນ-ການສອນ ຢູ່ສະຖາບັນການສຶກສາແຕ່ລະຊັ້ນ ເປັນຕົ້ນ: ສາຍສາມັນສຶກສາ, ອາຊີວະສຶກສາ ແລະ ການສຶກສາຊັ້ນສູງ ທັງນີ້ກໍເພື່ອເປັນການປະຕິບັດຕາມດໍາລັດສະບັບເລກທີ 562/ລບ, ລົງວັນທີ 6 ພະຈິກ 2020 ວ່າດ້ວຍ ການໂຄສະນາເຜີຍແຜ່ນິຕິກໍາ ມາດຕາ 14 ການໂຄສະນາເຜີຍແຜ່ນິຕິກໍາ ຜ່ານການສຶກສາຢູ່ໃນສະຖານການສຶກສາ ແລະ ມາດຕາ 26 ການໂຄສະນາເຜີຍແຜ່ນິຕິກໍາໃຫ້ແກ່ນັກຮຽນ, ນັກສຶກສາ ເພື່ອເປັນການປູກຈິດສໍານຶກດ້ານກົດໝາຍໃຫ້ນັກຮຽນ-ນັກສຶກສາຕັ້ງແຕ່ຫົວທີ ແນໃສ່ຍົກສູງສະຕິເຄົາລົບ ແລະ ປະຕິບັດກົດໝາຍ ໃນທົ່ວສັງຄົມໃຫ້ແຂງແຮງ ແລະ ເລິກເຊິ່ງ, ເວົ້າລວມ, ເວົ້າສະເພາະ ໃນກຸ່ມນັກຮຽນ, ນັກສຶກສາໃຫ້ນັບມື້ນັບສູງຂຶ້ນ.
ຂ່າວ: ໄຊຍະສິດ
ພາບ: ບຸນຖອມ
