ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມການແບ່ງຄວາມຮັບຜິດຊອບ ຂອງກອງເລຂາ ຄະນະກຳມະການອະໄພຍະໂທດ ລະດັບຊາດ ປະຈຳປີ 2024 ຈັດຂຶ້ນໃນວັນທີ 24 ພຶດສະພາ 2024 ຜ່ານມາ ພາຍໃຕ້ການເປັນປະທານຂອງ ທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະຊາຊົນສູງສຸດ, ຫົວໜ້າກອງເລຂາຄະນະກຳມະການອະໄພຍະໂທດລະດັບຊາດ, ມີຕາງໜ້າອົງການໄອຍະການປະຊາຊົນສູງສຸດ, ກະຊວງປ້ອງກັນຄວາມສະຫງົບ, ສານປະຊາຊົນສູງສຸດ, ກະຊວງຍຸຕິທໍາ ແລະ ຄະນະກອງເລຂາຄະນະກໍາມະການອະໄພຍະໂທດ ລະດັບຊາດ ເຂົ້າຮ່ວມ.
ກອງປະຊຸມ, ໄດ້ລາຍງານການສົ່ງເອກະສານ ສະເໜີຂໍໃຫ້ອະໄພຍະໂທດ ປະຈຳປີ 2024 ຂອງກະຊວງ, ແຂວງ-ນະຄອນຫລວງ ເພື່ອຄົ້ນຄວ້າພິຈາລະນາຄັດເລືອກເອົານັກໂທດຜູ້ທີ່ມີເງື່ອນໄຂສະເໜີໃຫ້ອະໄພຍະໂທດ ເພື່ອນຳສະເໜີຕໍ່ຄະນະກຳມະການອະໄພຍະໂທດ ລະດັບຊາດ ພິຈາລະນາຕາມຂັ້ນຕອນທີ່ໄດ້ກໍານົດໄວ້ໃນ ລັດຖະບັນຍັດ ວ່າດ້ວຍການໃຫ້ອະໄພຍະໂທດ ສະບັບເລກທີ 001/ປປທ, ລົງວັນທີ 20 ມີນາ 2018. ພ້ອມນີ້, ກອງປະຊຸມຍັງໄດ້ຜ່ານຂໍ້ຕົກລົງແບ່ງຄວາມຮັບຜິດຊອບຂອງ ກອງເລຂາຄະນະກໍາມະການອະໄພຍະໂທດ ລະດັບຊາດ ສະບັບເລກທີ 56/ກລຂ, ລົງວັນທີ 10 ເມສາ 2024 ແລະ ຕົກລົງແບ່ງຄວາມຮັບຜິດຊອບຄົ້ນຄວ້າຂອງ ກອງເລຂາຄະນະກໍາມະການອະໄພຍະໂທດ ລະດັບຊາດ ສະບັບເລກທີ 67/ກລຂ, ລົງວັນທີ 24 ເມສາ 2024.
ໂອກາດນີ້, ທ່ານ ບຸນທັນ ບຸນທະວິໄລ ຍັງໄດ້ຮຽກຮ້ອງໃຫ້ກອງເລຂາຄະນະກໍາມະການອະໄພຍະໂທດລະດັບຊາດ ສືບຕໍ່ເຊີດຊູ ແລະ ຍົກສູງຄວາມຮັບຜິດຊອບຂອງຕົນ ເພື່ອເຮັດໃຫ້ວຽກອະໄພຍະໂທດ ໄດ້ຮັບການຈັດຕັ້ງປະຕິບັດຕາມລັດຖະບັນຍັດ ຂອງປະທານປະເທດ ແລະ ຮຽກຮ້ອງຄະນະກໍາມະການອະໄພຍະໂທດລະດັບຊາດ ເປັນເຈົ້າການໂຄສະນາສຶກສາອົບຮົມທຸກຊັ້ນຄົນ, ເຫັນໄດ້ແນວທາງມະນຸດສະທໍາຂອງ ພັກ-ລັດຖະບານ ສປປ ລາວ ແນໃສ່ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ສ້າງເງື່ອນໄຂໃນການປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ ເພື່ອເຮັດໃຫ້ວຽກງານດັ່ງກ່າວ ໄດ້ຮັບຜົນສໍາເລັດຕາມແຜນການທີ່ວາງໄວ້.
ຂ່າວ: ນ້ອຍມີນາ, ຂປລ