ວັນທີ 8 ສິງຫາ 2024 ທີ່ກະຊວງອຸດສາຫະກຳ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຕ້ອນຮັບ ແລະ ພົບປະຂອງ ທ່ານ KOIZUMI Tsutomu ເອກອັກຄະລາຊະະທູດຍີ່ປຸ່ນປະຈຳລາວ ໂອກາດມາຮັບຕໍາແໜ່ງເປັນທູດຍີ່ປຸ່ນປະຈໍາລາວຄົນໃໝ່.
ໂອກາດນີ້ທ່ານລັດຖະມົນຕີ ໄດ້ສະແດງຄວາມຍິນດີ ແລະ ຊົມເຊີຍຕໍ່ທ່ານ KOIZUMI Tsutomu ທີ່ໄດ້ຖືກແຕ່ງຕັ້ງເປັນທູດຍີ່ປຸ່ນ ປະຈໍາ ລາວ ຄົນໃໝ່ ສະແດງຄວາມຂອບໃຈຕໍ່ການຮ່ວມມືສະໜັບສະໜູນ ແລະ ຊ່ວຍເຫຼືອລາວໃນວຽກງານຕ່າງໆເປັນຕົ້ນໂຄງການຊ່ວຍເຫຼືອລ້າ ແລະ ດ້ານການພັດທະນາຊັບພະຍາກອນມະນຸດໃຫ້ລາວ ເວົ້າລວມ ເວົ້າສະເພາະຂະແໜງອຸດສາຫະກຳ ແລະ ການຄ້າ ສະແດງຄວາມຂອບໃຈທີ່ລັດຖະບານຍີ່ປຸ່ນທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນທາງດ້ານວິຊາການ ແລະ ທຶນຮອນຕໍ່ຂະແໜງ ອຸດສາຫະກຳ ແລະ ການຄ້າເປັນຕົ້ນລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອກໍ່ສ້າງ ແລະ ຕົບແຕ່ງຫ້ອງວາງສະແດງແຫ່ງຊາດ ງານວາງງານສະແດງໂລກ EXPO 2025 Osaka ທີ່ຈະຈັດວັນທີ 13 ເມສາ-13 ຕຸລາ 2025 ໃນທຸກປີກົມຊັບສິນທາງປັນຍາ ໄດ້ສົ່ງພະນັກງານ ເພື່ອເຂົ້າຮ່ວມຝຶກອົບຮົມຫຼາຍຫົວຂໍ້ ກ່ຽວກັບຊັບສິນທາງປັນຍາທີ່ປະເທດຢີ່ປຸ່ນ ປີ 2010 ໄດ້ຮັບການຊ່ວຍເຫຼືອລ້າ ຈາກລັດຖະບານຍີ່ປຸ່ນໃນການດຳເນີນການສຶກສາຄວາມເປັນໄປໄດ້ເບື້ອງຕົ້ນ ແລະ ອອກແບບເພື່ອສ້າງນິຄົມອຸດສາຫະກຳຢູ່ນະຄອນ ຫຼວງວຽງຈັນ ມູນຄ່າ 3 ລ້ານໂດລາສະຫະລັດ.
ການພົບປະຄັ້ງນີ້ສອງຝ່າຍໄດ້ແລກປ່ຽນປຶກສາຫາລື ກ່ຽວກັບບັນດາແຜນງານ ແລະ ໂຄງການຮ່ວມມື ທີ່ຍີ່ປຸ່ນກຳລັງໃຫ້ການຊ່ວຍເຫຼືອ ແລະ ສະໜັບສະໜູນ ການພົວພັນລະຫວ່າງລາວ-ຍີ່ປຸ່ນ ໃນຂະແໜງທຸລະກິດ ແລະ ການຄ້າ ງານວາງງານສະແດງໂລກ EXPO 2025 Osaka ການສົ່ງອອກສິນຄ້າທີ່ມີທ່າແຮງຂອງລາວໄປຍີ່ປຸ່ນ ໂດຍສະເພາະສິນຄ້າຈາກກະສິກໍາ ກາເຟລາວ ເບຍ ແລະ ອື່ນໆ ເພື່ອດຶງດູດການລົງທຶນຈາກປະເທດຍີ່ປຸ່ນມາລົງທຶນໃນອຸດສາຫະກຳປຸງແຕ່ງຢູ່ລາວ ແລະ ອື່ນໆ.
ຂ່າວ: ວຽງຈັນໃໝ່
