ຫາລືແຜນພັດທະນາວຽກງານການທ່ອງທ່ຽວ ຢູ່ເມືອງປາກແບງ

ເມືອງປາກແບງ ຈັດກອງປະຊຸມປຶກສາຫາລື ວຽກງານແຜນພັດທະນາ ການທ່ອງທ່ຽວ ຢູ່ເມືອງປາກແບງ, ແຂວງອຸດົມໄຊ ໃນວັນທີ 29 ສິງຫາ 2024 ໂດຍມີ ທ່ານ ບຸນກວມ ມິດເມືອງໄຊ ຮອງຫົວໜ້າພະແນກ ຖວທ ແຂວງອຸດົມໄຊ, ທ່ານ ໄຊຍະສີນ ສຸພັນທອງ ຮັກສາການເຈົ້າເມືອງໆປາກແບງ ພ້ອມດ້ວຍພາກ ສ່ວນທີ່ກ່ຽວຂ້ອງເຂົ້າຮ່ວມ.

ການປືກສາຫາລືຄັ້ງນີ້ ໄດ້ຍົກເອົາການພັດທະນາວຽກງານການທ່ອງທ່ຽວ ຢູ່ພາຍໃນເມືອງປາກແບງ ມາສົນທະນາ ໂດຍສະ ເພາະ ແຜນພັດທະນາການທ່ອງທ່ຽວ ໄລຍະຕໍ່ໜ້າ ເປັນຕົ້ນ ການດຶງດູດນັກລົງທຶນມາພັດທະນາແຫລ່ງທ່ອງທ່ຽວຕ່າງໆ ທີ່ນອນຢູ່ໃນເປົ້າໝາຍຂອງການພັດທະນາ, ການປັບປຸງພື້ນຖານໂຄງລ່າງ ທັດສະນິຍະພາບໃນຕົວເມືອງ, ເສັ້ນທາງ, ການປະດັບປະດາຕາມບ້ານ-ເຮືອນຂອງປະຊາຊົນພາຍໃນເມືອງໃຫ້ມີເອກະ ລັກ, ສະຖານທີ່ພັກແຮມ, ສະຖານທີ່ບໍລິການ ອາຫານ, ສະຖານທີ່ທ່ອງທ່ຽວ ຈະເປັນທາງດ້ານທໍາມະຊາດ, ວັດທະນະທຳ, ການທ່ອງທ່ຽວຊົມວິຖີຊີວິດຂອງປະຊາຊົນບັນດາເຜົ່າ ແລະ ອື່ນໆ ພ້ອມທັງສືບຕໍ່ຊຸກຍູ້, ສຳຫລວດຄືນ ຄວາມເປັນລະບຽບຮຽບ ຮ້ອຍ ແລະ ຄວາມພ້ອມການໃຫ້ບໍລິການນັກທ່ອງທ່ຽວ, ສ້າງກິດຈະກຳການທ່ອງທ່ຽວທີ່ສາມາດດືງດູດນັກທ່ອງທ່ຽວເຂົ້າມາທ່ຽວຊ້ຳ ຫລື ພັກແຮມຫລາຍຄືນ.

ໃນໂອກາດດຽວກັນ, ຄະນະດັ່ງກ່າວ ຍັງໄດ້ລົງກວດກາການປະ ຕິສັງຂອນກຸດຕິ ວັດສີຈອມແຈ້ງ ເຊິ່ງການກໍ່ສ້າງ ມາຮອດປັດຈຸ ບັນ ມີຄວາມຄືບໜ້າ 50% ພ້ອມນີ້, ໄດ້ເນັ້ນໃຫ້ຜູ້ຮັບເໝົາກໍ່ສ້າງ ຈົ່ງເອົາໃຈໃສ່ໃນການກໍ່ສ້າງ ໃຫ້ຖືກຕາມແບບເກົ່າຂອງກຸດຕິ ເພື່ອຄົງຮູບເດີມໄວ້.

ຂ່າວ: ແສງອາທິດ