ວັນທີ 19 ສິງຫາ 2024 ນີ້, ກົມແຜນການ ແລະ ການຮ່ວມມື ກະຊວງ ພະລັງງານ ແລະ ບໍ່ແຮ່ ໄດ້ຈັດກອງປະຊຸມສຳມະນາກ່ຽວກັບງານວາງສະແດງດ້ານພະລັງງານ ຂອງອາຊຽນ ຫລື ASEAN Energy Business Forum (24-AEBF) ທີ່ຈະຈັດຂຶ້ນພ້ອມກັບກອງປະຊຸມລັດຖະມົນຕີພະລັງງານອາຊຽນ ວັນທີ 24-27 ກັນຍາ 2024. ເພື່ອປຶກສາຫາລືຮ່ວມກັນກ່ຽວກັບຂໍ້ສະດວກ ແລະ ຂໍ້ສະເໜີ ຂອງແຕ່ລະໜ້າວຽກດ້ານພະລັງງານ.
ທ່ານ ອາຄົມເດດ ວົງໄຊ ຫົວໜ້າກົມແຜນການ ແລະ ການຮ່ວມມື ກະຊວງ ພະລັງງານ ແລະ ບໍ່ແຮ່, ຫົວໜ້າເຈົ້າໜ້າທີ່ອາວຸໂສພະລັງງານອາຊຽນ ສປປ ລາວ ກ່າວວ່າ: ກອງປະຊຸມລັດຖະມົນຕີພະລັງງານອາຊຽນ AMEM ຄັ້ງທີ 42 ທີ່ຈະຈັດຂຶ້ນໃນລະຫວ່າງວັນທີ 24-27 ກັນຍາ 2024 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ. ເຊິ່ງກອງປະຊຸມ AMEM ຄັ້ງທີ 42 ນີ້ຈັດຂຶ້ນທຸກປີ ໂດຍການຜັດປ່ຽນກັນເປັນເຈົ້າພາບຈັດຂອງແຕ່ລະປະເທດສະມາຊິກອາຊຽນ. ທັງນີ້ກໍເພື່ອສຸມໃສ່ການປຶກສາຫາລືບັນດາເນື້ອໃນທີ່ສຳຄັນ ຂອງການຮ່ວມມືດ້ານພະລັງງານພາຍໃນອາຊຽນ ພ້ອມທັງການຜັນຂະຫຍາຍແຜນການດຳເນີນງານການຮ່ວມມືດ້ານພະລັງງານຂອງອາຊຽນ (APAEC) ໄລຍະທີ 2 (2016-2025), ລວມທັງໝາກຜົນ ແລະ ຄວາມຮຽກຮ້ອງຕ້ອງການ ຫລື ຂໍ້ສະເໜີຂອງອາຊຽນ ໃນໄລຍະຜ່ານມາຈາກກອງປະຊຸມ ແລະ ຈຸດປະສານງານຕ່າງໆ.
ຄຽງຄູ່ກັບກອງປະຊຸມລັດຖະມົນຕີພະລັງງານອາຊຽນ AMEM ຄັ້ງທີ 42 ຈະມີງານສໍາຄັນອີກງານໜຶ່ງຄື ການຈັດງານວາງສະແດງດ້ານພະລັງງານຂອງອາຊຽນ ຫລື ເອີ້ນວ່າ ASEAN Energy Business Forum, ເຊິ່ງເປັນງານວາງສະແດງ ແລະ ຍັງມີການຈັດກອງປະຊຸມສໍາມະນາທີ່ສໍາຄັນ ໂດຍເປັນການສົ່ງເສີມການພັດທະນາຂະແໜງພະລັງງານຂອງອາຊຽນ. AEBF ໄດ້ເຕີບໃຫຍ່ຂຶ້ນໃນຊຸມປີມໍ່ໆມານີ້ເພື່ອກາຍເປັນເວທີທີ່ສໍາຄັນໃນລະດັບສູງສໍາລັບການແລກປ່ຽນຂໍ້ມູນຂ່າວສານ ແລະ ການເປີດໂອກາດໃນການຮ່ວມມືສໍາລັບຜູ້ມີສ່ວນຮ່ວມທາງດ້ານພະລັງງານຂອງອາຊຽນລວມທັງນັກທຸລະກິດ, ຜູ້ສ້າງນະໂຍບາຍ, ນັກຄົ້ນຄວ້າຈາກພາກພື້ນ ແລະ ສາກົນ.
ໂອກາດນີ້, ທ່ານ Andy Tirta ຫົວໜ້າສູນພະລັງງານອາຊຽນ ໄດ້ນຳສະເໜີລາຍລະອຽດກ່ຽວກັບງານວາງສະແດງດ້ານພະລັງງານຂອງອາຊຽນ ຫລື AEBF-24, ເພື່ອເລັ່ງລັດຄວາມກ້າວໜ້າໄປສູ່ອະນາຄົດແບບຍືນຍົງ, ເພີ່ມທະວີການຮ່ວມມືລະຫວ່າງຂະແໜງການຕ່າງໆ, ຮັດແໜ້ນຊ່ອງຫວ່າງລະຫວ່າງນັກສຶກສາ, ນັກກຳນົດນະໂຍບາຍ ແລະ ທຸລະກິດ.
