ໃນລະຫວ່າງວັນທີ 12-13 ມິຖຸນານີ້, ຄະນະກໍາມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ໄດ້ຈັດກອງປະຊຸມປຶກສາຫາລື ຮ່າງຂອບການຕິດຕາມ ແລະ ປະເມີນຜົນການຈັດຕັ້ງປະຕິບັດແຜນດຳເນີນງານແຫ່ງຊາດ ເພື່ອຄວາມສະເໝີພາບຍິງ-ຊາຍ ແລະ ແຜນດຳເນີນງານແຫ່ງຊາດເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ສະຫຼຸບຕີລາຄາ ການຈັດຕັ້ງປະຕິບັດສາມແຜນດໍາເນີນງານແຫ່ງຊາດ ປີ 2023 ແລະ 6 ເດືອນຕົ້ນປີ 2024 ພາຍໃຕ້ການເປັນປະທານຂອງ ທ່ານນາງ ຈັນໂສດາ ພອນທິບ ຮອງປະທານສູນກາງສະຫະພັນແມ່ຍິງລາວ ທັງເປັນຮອງປະທານຄະນະກໍາມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ, ມີຜູ້ເຂົ້າຮ່ວມແບບເຊິ່ງໜ້າ ແລະ ແບບອອນລາຍຕາງໜ້າຈາກ ຄກມດ 18 ແຂວງ ໂດຍໄດ້ຮັບການສະໜັບສະໜູນດ້ານວິຊາການ ແລະ ການເງິນຈາກອົງການສະຫະປະຊາຊາດກອງທຶນສຳລັບປະຊາກອນ.
ກອງປະຊຸມຄັ້ງນີ້ໄດ້ທົບທວນຄືນສາມແຜນດໍາເນີນງານແຫ່ງຊາດຄື: ແຜນດຳເນີນງານແຫ່ງຊາດເພື່ອຄວາມສະເໝີພາບຍິງ-ຊາຍ 5 ປີ ຄັ້ງທີ IV (2021-2025), ແຜນດໍາເນີນງານແຫ່ງຊາດເພື່ອແມ່ ແລະ ເດັກ 5 ປີ ຄັ້ງທີ III (2021-2025) ແລະ ແຜນດຳເນີນງານແຫ່ງຊາດເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ 5 ປີ ຄັ້ງທີ II (2021-2025) ແລະ ແນະນຳການຜັນຂະຫຍາຍຕິດຕາມຊຸກຍູ້ ແລະ ສະຫຼຸບລາຍງານການຈັດຕັ້ງປະຕິບັດແຜນດໍາເນີນງານແຫ່ງຊາດດັ່ງກ່າວ ເພື່ອໃຫ້ບັນດາຜູ້ເຂົ້າຮ່ວມເຂົ້າໃຈເພີ່ມຂຶ້ນໃນການຄົ້ນຄວ້າຮ່າງຂອບການຕິດຕາມ ແລະ ປະເມີນຜົນການຈັດຕັ້ງປະຕິບັດແຜນດໍາເນີນງານແຫ່ງຊາດ ແລະ ການສະຫຼຸບຕີລາຄາແຕ່ລະໄລຍະ.
ຜ່ານການລາຍງານ ແລະ ການປຶກສາຫາລື ຕີລາຄາຜົນການຈັດຕັ້ງປະຕິບັດສາມແຜນດໍາເນີນງານແຫ່ງຊາດໃນປີ 2023 ແລະ 6 ເດືອນຕົ້ນປີ 2024 ທຽບໃສ່ແຜນ 5 ປີດັ່ງນີ້: ພະນັກງານເພດຍິງຕິດພັນກັບແຜນກຳນົດພະນັກງານນຳພາ-ຄຸ້ມຄອງໃນຂັ້ນສູນກາງເທົ່າກັບ 20,20% (ຫຼຸດຄາດໝາຍ 8,8%) ຂັ້ນແຂວງເທົ່າກັບ 17,84% (ຫຼຸດຄາດໝາຍ 2,16%); ຂັ້ນເມືອງເທົ່າກັບ 20,38% (ລື່ນຄາດໝາຍ 0,38%); ຂັ້ນບ້ານເທົ່າກັບ 12,02% (ຫຼຸດຄາດໝາຍ 5,98%), ຄ່າດັດສະນີຄວາມບໍ່ສະເໝີພາບຍິງ-ຊາຍໃນປີ 2023-2024 ເພີ່ມຂຶ້ນເປັນ 0,467 ຈາກ 0,459 ໃນປີ 2019-2020 (ເພີ່ມຂຶ້ນ 0,008, ຕາມແຜນການໃນປີ 2025 ໃຫ້ຫຼຸດລົງຮອດ 0,430), ຄ່າດັດສະນີການພັດທະນາຄວາມສະເໝີພາບຍິງ-ຊາຍ ໃນປີ 2023-2024 ຫຼຸດລົງເປັນ 0,919 ຈາກ 0,927 ໃນປີ 2019-2020 (ຫຼຸດລົງ 0,008 ຕາມແຜນການຮອດປີ 2025 ໃຫ້ເພີ່ມຂຶ້ນເປັນ 0,984), ອັດຕາການຕາຍຂອງເດັກລຸ່ມ 5 ປີຫຼຸດລົງຈາກ 46/1.000 ຄົນ ເປັນ 28/1.000 ຄົນໃນປີ 2023; ອັດຕາການຈົດທະບຽນການເກີດຫຼຸດລົງຈາກ 73% ເປັນ 65% ໃນປີ 2023; ອັດຕາສ່ວນຂອງເດັກຍິງອາຍຸລະຫວ່າງ 5-17 ປີທີ່ກ່ຽວຂ້ອງກັບການໃຊ້ແຮງງານເດັກຫຼຸດລົງຈາກ 42,5% ເປັນ 23,1% ໃນປີ 2023; ເດັກ ແລະ ໄວໜຸ່ມ ທີ່ແຕ່ງດອງ ແລະ ຢູ່ຮ່ວມກັນອາຍຸລະຫວ່າງ 15-19 ປີ: ເດັກຍິງ 26,6% (ເພີ່ມຂຶ້ນ 3,3% ຕາມຄາດໝາຍໃຫ້ຫຼຸດລົງຮອດ 9%), ເດັກຊາຍ 10,2% (ເພີ່ມຂຶ້ນ 4,3% ຕາມຄາດໝາຍໃຫ້ຫຼຸດລົງຮອດ 3%), ການຊ່ວຍ ເຫຼືອຜູ້ຖືກເຄາະຮ້າຍຈາກຄວາມຮຸນແຮງປະຕິບັດສອດຄ່ອງກັບມາດຕະຖານສາກົນ ແລະ ນິຕິກຳພາຍໃນ ໂດຍມີ ມາດຕະຖານດໍາເນີນງານການຊ່ວຍເຫຼືອໃນສະຖານທີ່ປິ່ນປົວສຸຂະພາບ, ມາດຕະຖານດໍາເນີນງານການຊ່ວຍເຫຼືອດ້ານຂະບວນການຍຸຕິທຳ, ມາດຕະຖານດໍາເນີນງານການຊ່ວຍເຫຼືອດ້ານສັງຄົມ ແລະ ມາດຕະຖານດໍາເນີນງານການປະສານງານ, ການຄຸ້ມຄອງການປະສານງານ ແລະ ການສົ່ງຕໍ່; ພ້ອມນັ້ນ ກໍໄດ້ປັບປຸງພື້ນຖານໂຄງລ່າງ ແລະ ສິ່ງອຳນວຍຄວາມສະດວກຕ່າງໃນສະຖານທີ່ໃຫ້ບໍລິການຊ່ວຍເຫຼືອຜູ້ຖືກເຄາະຮ້າຍ ຊຶ່ງມີສູນພັກເຊົາຊົ່ວຄາວທີ່ປອດໄພ ທັງໝົດ 5 ແຂວງ, ໂຮງໝໍທີ່ໃຫ້ການປິ່ນປົວທັງໝົດ 3 ໂຮງໝໍ (ມະໂຫສົດ, ແມ່ ແລະ ເດັກ ແລະ ແຂວງສະຫວັນນະເຂດ) ແລະ ມີບໍລິການສາຍດ່ວນ 1362, 1300, 1527 ຍັງໄດ້ສ້າງຄວາມເຂັ້ມແຂງໃຫ້ກັບບຸກຄະລາກອນ ທີ່ໃຫ້ການຊ່ວຍເຫຼືອຜູ້ຖືກເຄາະຮ້າຍ ໃນຂັ້ນສູນກາງ ແລະ 6 ແຂວງຄື: ບໍ່ແກ້ວ, ນະຄອນຫຼວງວຽງຈັນ, ບໍລິຄຳໄຊ, ສະຫວັນນະເຂດ, ຈຳປາສັກ ແລະ ອັດຕະປື.
ກອງປະຊຸມເຫັນດີໂດຍພື້ນຖານຕໍ່ຮ່າງຂອບການຕິດຕາມ ແລະ ປະເມີນຜົນການຈັດຕັ້ງປະຕິບັດແຜນດໍາເນີນງານແຫ່ງຊາດ ແລະ ຈະປັບປຸງເປັນສະບັບສຸດທ້າຍເພື່ອສະເໜີຄະນະນໍາ ຄຊກມດ ຮັບຮອງ ແລະ ເປັນບ່ອນອີງໃຫ້ບັນດາ ຄກມດ ຂະແໜງການ ແລະ ທ້ອງຖິ່ນ ລາຍງານບັນດາຕົວຊີ້ບອກທີ່ສາມາດຈັດຕັ້ງປະຕິບັດໃນແຕ່ລະໄລຍະ.
ຂ່າວ: ຄຊກມດ
