ໃນປີ 2024 ແຂວງວຽງຈັນ ມີຄວາມຕ້ອງການທຶນເພື່ອພັດທະນາໃຫ້ໄດ້ 2.366 ຕື້ກວ່າກີບ, ກວມເອົາ 21,15% ຂອງ GDP, ໃນ 6 ເດືອນຕົ້ນປີ ປະຕິບັດໄດ້ 1.911 ຕື້ກວ່າກີບ, ເທົ່າກັບ 80,80% ຂອງແຜນການປີ. ຊຶ່ງ ທ່ານ ເຕັ່ງເມັ່ງ ຢ່າງລືໄຊ ຫົວໜ້າພະແນກແຜນການ ແລະ ການລົງທຶນແຂວງວຽງຈັນ ໄດ້ຂຶ້ນປະກອບຄຳເຫັນກ່ຽວກັບວຽກງານການລົງທຶນຢູ່ແຂວງວຽງຈັນ ຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງວຽງຈັນ ຊຸດທີ II ໃນວັນທີ 31 ກໍລະກົດຜ່ານມານີ້ວ່າ: ໃນປີ 2024 ແຂວງມີຄວາມຕ້ອງການທຶນເພື່ອພັດທະນາໃຫ້ໄດ້ 2.366 ຕື້ກວ່າກີບ, ກວມເອົາ 21,15% ຂອງ GDP, ໃນ 6 ເດືອນຕົ້ນປີ ປະຕິບັດໄດ້ 1.911 ຕື້ກວ່າກີບ, ເທົ່າກັບ 80,80% ຂອງແຜນການປີແລະກວມເອົາ 17,09% ຂອງ GDP (11,189 ຕື້ກີບ) ໃນນີ້ແຜນການຄຸ້ມຄອງຂອງລັດປະຈຳປີ 2024 ຂອງແຂວງວຽງຈັນ ມີທັງໝົດ 273 ໂຄງການ, ມູນຄ່າການລົງທຶນ 7.980 ຕື້ກວ່າກີບ, ໃນນີ້ສູນກາງຄຸ້ມຄອງ 98 ໂຄງການ, ມູນຄ່າ 7.386 ຕື້ກວ່າກີບ ແລະ ແຂວງຄຸ້ມຄອງ 175 ໂຄງການ, ມູນຄ່າ 593 ຕື້ກວ່າກີບ, ມູນຄ່າປະຕິບັດວຽກສຳເລັດ 4.320 ຕື້ກວ່າກີບ, ຊຳລະຜ່ານມາ 1.913 ຕື້ກວ່າກີບ ແລະ ງົບປະມານລົງທຶນ ໃນປີ 2024 ນີ້ ໄດ້ຮັບທັງໝົດ 190 ຕື້ກວ່າກີບ, ສ່ວນທີ່ສູນກາງຄຸ້ມຄອງ 168 ຕື້ກວ່າກີບ ແລະທີ່ແຂວງຄຸ້ມຄອງ 21 ຕື້ກວ່າກີບ, ນອກຈາກນີ້ແຂວງກໍໄດ້ອະນຸມັດເງິນເກີນແຜນ ປີ 2023 ແລະນຳໃຊ້ໃນປີ 2024 ເພີ່ມຕື່ມ 80 ຕື້ກວ່າກີບ, ເພື່ອຊຳລະໂຄງການໜີ້ສິນ. ໂຄງການສືບຕໍ່ແລະພັດທະນາພື້ນຖານໂຄງລ່າງໃໝ່ທີ່ຈຳເປັນຈຳນວນໜຶ່ງ, ຕາມມະຕິຂອງຄະນະປະຈຳສະພາປະຊາຊົນແຂວງວຽງຈັນ, ລວມທັງ 2 ບ້ວງທົ່ວແຂວງມີການລົງທຶນທັງໝົດ 270 ຕື້ກວ່າກີບ. ໃນ 6 ເດືອນຕົ້ນປີໄດ້ກວດຜ່ານໜັງສືສະເໜີອະນຸມັດງົບປະມານແລ້ວ 147 ໂຄງການ, ມູນຄ່າ 142 ຕື້ກີບ, ເທົ່າກັບ 52,64% ຂອງງົບປະມານລົງທຶນໃນປີ, ໃນນີ້ 123 ໂຄງການ, ມູນຄ່າ 133 ຕື້ກວ່າກີບແລະເງິນເກີນແຜນ 24 ໂຄງການ, ມູນຄ່າ 8 ຕື້ກວ່າກີບ, ແຕ່ການເບີກຈ່າຍຜ່ານຄັງເງິນແຂວງຮອດທ້າຍເດືອນ ມີນາ 2024 ໄດ້ພຽງແຕ່ 88 ຕື້ກວ່າກີບ, ເທົ່າກັບ 32,79% ຂອງງົບປະມານລົງທຶນໃນປີ. ການລົງທຶນຂອງເອກະຊົນພາຍໃນແລະຕ່າງປະເທດໃນໄລຍະ 6 ເດືອນຕົ້ນປີອ2024 ສາມາດອະນຸມັດການລົງທຶນໄດ້ 1.733 ຕື້ກວ່າກີບ, ເທົ່າກັບ 78,30% ຂອງແຜນການ (ແຜນ 2.214 ຕື້ກີບ) ເປັນກິດຈະການເຊົ່າສຳປະທານ 21 ໂຄງການມູນຄ່າ 900 ຕື້ກວ່າກີບ ແລະ ກິດຈະການທົ່ວໄປ 108 ກິດຈະການ, ມູນຄ່າ 833 ຕື້ກວ່າກີບ ແລະ ຮັບໃຊ້ການຜະລິດຕາມນະໂຍບາຍສົ່ງເສີມການລົງທຶນຈຳນວນ 15 ໂຄງການ, ມູນຄ່າ 38 ລ້ານກວ່າໂດລາ, ໄດ້ເອົາໃຈໃສ່ຄຸ້ມຄອງໂຄງການຊ່ວຍເຫຼືອທາງການ ເພື່ອພັດທະນາໃຫ້ໄດ້ຈັດຕັ້ງປະຕິບັດຕາມແຜນການທີ່ວາງໄວ້ ເພື່ອປະກອບສ່ວນໃນການພັດທະນາເສດຖະກິດ-ສັງຄົມໃຫ້ຫຼາຍຂຶ້ນ, ໃນ 6 ເດືອນຕົ້ນປີ 2024 ໄດ້ຮັບການຊ່ວຍເຫຼືອແລ້ວ 35 ຕື້ກວ່າກີບ, ເທົ່າກັບ 56,56% ຂອງແຜນການ (ແຜນ 63 ຕື້ກວ່າກີບ), ອັນທີ່ພົ້ນເດັ່ນແຜນການພັດທະນາທ້ອງຖິ່ນລາວ/338 ຈະໃຫ້ທຶນຊ່ວຍເຫຼືອຮອດປີ 2027 ທັງໝົດ 65 ຕື້ກວ່າກີບ ເພື່ອພັດທະນາພື້ນຖານໂຄງລ່າງ, ສ້າງກອງທຶນພັດທະນາບ້ານແລະສ້າງຄວາມເຂັ້ມແຂງດ້ານວິຊາການ ໃຫ້ພາກສ່ວນທີ່ກ່ຽວຂ້ອງ ແລະເມືອງເປົ້າໝາຍຄື: ເມືອງຫີນເຫີບ, ເມືອງກາສີ, ເມືອງເຟືອງ, ເມືອງແມດ, ເມືອງໝື່ນແລະເມືອງຊະນະຄາມເພື່ອຄຸ້ມຄອງ, ຕິດຕາມ, ເພື່ອຈັດຕັ້ງປະຕິບັດໜ້າວຽກຕ່າງໆຂອງໂຄງການ.
ທ່ານຫົວໜ້າພະແນກແຜນການ ແລະ ການລົງທຶນແຂວງວຽງຈັນ ກ່າວອີກວ່າ: ໃນການຈັດຕັ້ງປະຕິບັດແຜນການລົງທຶນ ປີ 2024 ແມ່ນຍັງມີສິ່ງທ້າທາຍຫຼາຍຢ່າງທີ່ຈະຕ້ອງໄດ້ສູ້ຊົນຈັດຕັ້ງປະຕິບັດ ດ້ວຍຈິດໃຈບຸກທະລຸດ້ວຍຄວາມຮັບຜິດຊອບສູງ, ດັ່ງນັ້ນຈຶ່ງສະເໜີບັນດາທ່ານສະມາຊິກສະພາແຫ່ງຊາດ ແລະ ປະຊາຊົນແຂວງວຽງຈັນ ຊ່ວຍຊຸກຍູ້-ຕິດຕາມປະຕິບັດແຜນການລົງທຶນ ປີ 2024 ນີ້ ຢ່າງໃກ້ຊິດເພື່ອໃຫ້ແຜນສຳເລັດຕາມແຜນການ ແລະບັນລຸຕາມລະດັບຄາດໝາຍທີ່ວາງໄວ້.
ພາບ: ບຸນມາແກ້ວບຸດດາ; ຂ່າວ: ສົມສັກສຸລິສັກ
