ວັນທີ່ 27 ກໍລະກົດ 2024 ນີ້ ບໍລິສັດ ອາລຸນໃໝ່ ເອເວຍເຊີນ ເຊີວິດ ຈໍາກັດ ສໍາເລັດການເຊັນບົດບັນທຶກການຮ່ວມມື ການທ່ອງທ່ຽວ ລະຫວ່າງ ສະມາຄົມທ່ອງທ່ຽວຫຼວງພະບາງຢູ່ທີ່ໂຮງແຮມເມືອງທອງບຸຕິກແຂວງຫຼວງພະບາງ, ການເຊັນສັນຍາຮ່ວມມືໃນຄັ້ງນີ້ເພື່ອເປັນການສົ່ງເສີມການທ່ອງທ່ຽວເຊິ່ງກັນ ແລະ ກັນ ທັງເປັນການເຊື່ອມໂຍງການທ່ອງທ່ຽວລະຫວ່າງ ສອງແຂວງ ຫົວພັນ-ຫຼວງພະບາງ, ຫຼວງພະບາງ-ຫົວພັນໂດຍນໍາໃຊ້ສາຍການບິນລາວເປັນສື່ກາງ.
ນອກຈາກນີ້, ຍັງຈະໄດ້ຮ່ວມກັນອອກແບບ ແລະ ພັດທະນາລາຍການນໍາທ່ຽວໃຫ້ມີຄວາມຫຼາກຫຼາຍທາງເລືອກເພື່ອດຶງດູດນັກທ່ອງທ່ຽວພາຍໃນ ແລະ ຕ່າງປະເທດ, ຮ່ວມກັນໂຄສະນາສະຖານທີ່ທ່ອງທ່ຽວ ດ້ວຍສື່ອອນລາຍຕ່າງໆ ເປັນຕົ້ນ ແມ່ນທ່ອງທ່ຽວທາງດ້ານວັດທະນະທໍາຮີດຄອງປະເພນີ, ທ່ອງທ່ຽວທາງດ້ານທໍາມະຊາດ ແລະ ທາງດ້ານປະຫວັດສາດ ພາຍໃນແຂວງຂອງຕົນເອງໃຫ້ສັງຄົມຮັບຮູ້ ແລະ ທັງເປັນການສົ່ງເສີມລາວທ່ຽວລາວ ຕື່ມອີກ.
ຕາງໜ້າຝ່າຍບໍລິສັດອາລຸນໃໝ່ເອເວຍເຊີນ ເຊີວິດ ຈໍາກັດ ໂດຍແມ່ນ ທ່ານ ນາງ ຄໍາພອນ ອຸ່ນອານົງນຸດ ອໍານວຍການບໍລິ ສັດ ອາລຸນໃໝ່ ເອເວຍເຊີນ ເຊີວິດ ຈໍາກັດ, ຕາງໜ້າຝ່າຍສະມາ ຄົມທ່ອງທ່ຽວຫຼວງພະບາງ ໂດຍແມ່ນທ່ານ ກົງຈັກກີ ພັນທະສົມບັດ ຫົວໜ້າສະມາຄົມທ່ອງທ່ຽວຫຼວງພະບາງຮ່ວມລົງນາມເຊັນບົດບັນ ທຶກໃນຄັ້ງນີ້. ໂດຍການໃຫ້ກຽດເຂົ້າຮ່ວມ ຂອງທ່ານ ຄໍາແພງ ໄຊສົມແພງ ເຈົ້າແຂວງໆ ຫົວພັນ ພ້ອມດ້ວຍພາກສ່ວນທີ່ກ່ຽວແຂວງຫົວພັນ ແລະ ແຂວງຫຼວງພະບາງ.
ການເດີນທາງໄປເຊັນສັນຍາທີ່ແຂວງຫລວງພະບາງໃນຄັ້ງນີ້ ແມ່ນເດີນທາງດ້ວຍຖ້ຽວບິນພິເສດຂອງສາຍການບິນລາວ ແລະ ຄາດວ່າຈະເປີດຖ້ຽວບິນຂອງສາຍການບິນລາວ ລະຫວ່າງຫົວ ພັນ-ຫຼວງພະບາງ, ຫຼວງພະບາງ-ຫົວພັນ ໃນໄວໆນີ້.
ຂ່າວ-ພາບ: ວັນແສງ
