ໃນລະຫວ່າງວັນທີ 19- 21 ມິຖຸນາ 2024 ຜ່ານມານີ້, ຄະນະຜູ້ແທນສະຫະພັນແມ່ຍິງແຂວງຫົວພັນ ນໍາໂດຍທ່ານ ນາງ ສວຍເພັດ ທອງສົມບັດ, ກຳມະການພັກແຂວງ, ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງ ແຂວງຫົວພັນ ໄດ້ເດີນທາງຢຽ້ມຢາມ ແລະ ເຂົ້າຮ່ວມກອງປະຊຸມພົບປະແລກປຽ່ນບົດຮຽນ ວຽກງານແມ່ຍິງກັບສະຫະພັນແມ່ຍິງ ແຂວງເຊີນລາ, ສສ ຫວຽດນາມ ຮ່ວມກັບສະຫະພັນແມ່ຍິງ 4 ແຂວງພາກເໜືອຄື: ແຂວງຊຽງຂວາງ, ຫຼວງພະບາງ, ອຸດົມໄຊ ແລະ ຜົ້ງສາລີ ໂດຍໄດ້ຮັບການຕ້ອນຮັບຢ່າງອົບອຸ່ນຈາກສະຫາຍ ນາງ ບຸ່ຍ ແທັງ ທຸ້ຍ ກຳມະການປະທານຄະນະສູນກາງສະຫະພັນແມ່ຍິງ ຫວຽດນາມ, ກຳມະການພັກແຂວງ, ປະທານສະຫະພັນແມ່ຍິງ ແຂວງເຊີນລາ ສສ ຫວຽດນາມ.
ໃນໂອກາດນີ້, ສະຫະພັນແມ່ຍິງແຂວງຫົວພັນ ໄດ້ເຂົ້າຢຽ້ມຂໍ່ານັບການນຳ ຂອງແຂວງເຊີນລາ ເພື່ອລາຍງານຈຸດປະສົງຂອງການເດີນທາງມາຢ້ຽມຢາມ ແລະ ເຮັດວຽກ. ຈາກນັ້ນ, ຄະນະຜູ້ແທນສະຫະພັນແມ່ຍິງແຂວງຫົວພັນ ພ້ອມດ້ວຍສະຫະພັນ ແມ່ຍິງ 4 ແຂວງ ໄດ້ເຂົ້າຮ່ວມກອງປະຊຸມພົບປະແລກປ່ຽນບົດຮຽນ ວຽກງານແມ່ຍິງກັບສະຫະພັນແມ່ຍິງແຂວງເຊີນລາ. ເຊິ່ງໃນທີ່ປະຊຸມ, ສະຫະພັນແມ່ຍິງ 06 ແຂວງໄດ້ພັດປຽ່ນກັນລາຍງານໃຫ້ກັນ ແລະ ກັນ ຮັບຊາບກຽ່ວກັບສະພາບການນຳພາ-ຊີ້ນຳບັນດາການເຄື່ອນໄຫວຂອງສະຫະພັນແມ່ຍິງ, ເປັນຕົ້ນແມ່ນວຽກງານສຶກສາອົບຮົມການເມືອງ-ແນວຄິດ, ວຽກງານປັບປຸງ ແລະ ພັດທະນາອົງການສະຫະພັນແມ່ຍິງ, ປົກປ້ອງສິດ ແລະ ຜົນປະໂຫຍດຂອງແມ່ຍິງ ແລະ ເດັກນ້ອຍ, ຄວາມສະເໝີພາບຍິງ-ຊາຍ, ວຽກງານຝຶກອົບຮົມວິຊາຊີບ, ສ້າງວຽກເຮັດງານທຳ, ເຂົ້າຮ່ວມການກໍ່ສ້າງພັກ-ລັດ; ແລກປຽ່ນບັນດາຕົວແບບທີ່ພົ້ນເດັ່ນ, ມີປະສິດທິພາບ, ບັນດາການເຄື່ອນໄຫວຂອງແມ່ຍິງ ບໍລິເວນຊາຍແດນ.
ພ້ອມນັ້ນ, ກອງປະຊຸມໄດ້ເຫັນດີເປັນເອກະພາບສູງໃນການ ຮ່ວມມືໄລຍະຕໍ່ໜ້າ ໂດຍເຫັນດີໃຫ້ມີການສືບຕໍ່ປະສານສົມທົບແລກປຽ່ນຂໍ້ມູນຂ່າວສານ ກຽ່ວກັບການເຄື່ອນໄຫວຂອງບັນດາແຂວງ ເພື່ອແນໃສ່ກຳໄດ້ການເຄື່ອນໄຫວເຊິ່ງກັນ ແລະ ກັນ ເພື່ອຮັດແໜ້ນສາຍພົວພັນມິດຕະພາບ, ຄວາມສາມັກຄີພິເສດ ລະຫວ່າງສອງພັກ, ສອງລັດ ປະຊາຊົນສອງປະເທດ ລາວ-ຫວຽດນາມ ແລະ ສະຫະພັນແມ່ຍິງແຂວງ ຫົວພັນ, ຫຼວງພະບາງ, ຜົ້ງສາລີ, ອຸດົມໄຊ, ຊຽງຂວາງ ແລະ ແຂວງເຊີນລາ.
ນອກຈາກນີ້, ຄະນະຜູ້ແທນສະຫະພັນແມ່ຍິງ ຍັງໄດ້ເຂົ້າໄຕ້ທູບຢູ່ຫໍບູຊາລຸງໂຮ່ຈິມິນ, ຢຽ້ມຢາມຮ່ອງຮອຍປະຫວັດສາດແຫ່ງຊາດພິເສດ ເຮືອນຄຸກເຊີນລາ, ທ່ຽວຊົມຕະຫຼາດ ແລະ ຮ້ານສັບພະສິນຄ້າ, ຢຽ້ມຢາມເຂດຮ່ອງຮອຍປະຫັວດສາດການປະຕິວັດ ຫວຽດນາມ-ລາວ ແລະ ຢຽ້ມຢາມຕົວແບບດີເດັ່ນການພັດທະນາເສດຖະກິດຂອງສະມາຊິກແມ່ຍິງ ຕື່ມອີກ.
ທີ່ມາ: ຂ່າວ ສະຫະພັນແມ່ຍິງແຂວງຫົວພັນ
