ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ແຫລ່ງຂ່າວຈາກແຂວງຫົວພັນ ໃຫ້ຮູ້ວ່າ: ແຂວງຫົວພັນ ຈັດພິທີໂຮມຊຸມນຸມປາຖະກະຖາວັນສ້າງຕັ້ງກຳມະບານສາກົນ ຄົບຮອບ 138 ປີ (1 ພຶດສະພາ 1886-1 ພຶດສະພາ 2024) ໂດຍເຂົ້າຮ່ວມເປັນປະທານ ແລະ ປາຖະກະຖາໂດຍ ທ່ານ ວົງເພັດ ກຽນສິງຮັກ ຄະນະປະຈຳພັກແຂວງ, ປະທານແນວລາວສ້າງຊາດແຂວງ, ຜູ້ຊີ້ນຳອົງການຈັດຕັ້ງມະຫາຊົນຂັ້ນແຂວງ, ມີບັນດາການນຳແຂວງ, ສະພາປະຊາຊົນແຂວງ, ພະແນກການ, ກົມກອງ, ອົງການຈັດຕັ້ງມະຫາຊົນ, ອົງການທຽບເທົ່າ, ນັກທຸລະກິດ, ເມືອງຊຳເໜືອ ແລະ ປະຊາຊົນອ້ອມຂ້າງເທສະບານແຂວງເຂົ້າຮ່ວມ.
ທ່ານ ວົງເພັດ ກຽນສິງຮັກ ໄດ້ຍົກໃຫ້ເຫັນ ປະຫວັດຄວາມເປັນມາຂອງວັນກຳມະກອນສາກົນ ໃນວັນທີ 1 ພຶດສະພາ 1886 ໃນປະເທດອາເມຣິກາຢູ່ຕົວເມືອງຊິກາໂກ ເປັນຄັ້ງທຳອິດທີ່ຊົນຊັ້ນກຳມະກອນ ແລະ ຊາວຜູ້ອອກແຮງງານໄດ້ມີການຕໍ່ສູ້ ໂດຍຖືເອົາເນື້ອໃນຖະແຫລງການ ຮຽກຮ້ອງໃຫ້ພວກນາຍທຶນຕ້ອງປະຕິບັດ ຕາມການສະເໜີຂອງກຳມະກອນວ່າ: ແຕ່ນີ້ຕໍ່ໄປບໍ່ໃຫ້ກຳມະກອນເຮັດວຽກເກີນ 8 ຊົ່ວໂມງຕໍ່ມື້ ຄື: ເຮັດວຽກ 8 ຊົ່ວໂມງຕ້ອງພັກຜ່ອນ 8 ຊົວໂມງ. ໃນມື້ນັ້ນໄດ້ມີກໍາມະກອນນັດຢຸດງານເຖິງ 5.000 ແຫ່ງ ໃນຕົວເມືອງໃຫຍ່ຂອງປະເທດສະຫະລັດອາເມຣິກາ ເຊັ່ນ: ຊີກາໂກ, ວໍຊິງຕັນ, ນິວຢອກ, ບາຕິມໍ ແລະ ເມືອງອື່ນໆ ມີຜູ້ເຂົ້າຮ່ວມເຖິງ 3 ແສນກວ່າຄົນ ໄດ້ຮຽກຮ້ອງ ແລະ ບັງຄັບໃຫ້ນາຍທຶນ ຕ້ອງຮັບຮອງເອົາສິດໃນການເຮັດວຽກ ຂອງກຳມະກອນໃນມື້ໜຶ່ງ 8 ຊົ່ວໂມງ.
ສະເພາະຢູ່ແຂວງຫົວພັນ, ໃນໄລຍະ 1 ປີຜ່ານມາ ສະຫະພັນກໍາມະບານແຂວງ ໄດ້ເອົາໃຈໃສ່ຊຸກຍູ້ຕິດຕາມ ບັນດາຫົວໜ່ວຍແຮງງານ ແລະ ກຳມະກອນ ທົ່ວແຂວງຫົວພັນ ມີຫົວໜ່ວຍແຮງງານພາກວິສາຫະກິດທັງໝົດ 152 ແຫ່ງ, ຂົງເຂດບໍລິຫານມີ 123 ແຫ່ງ, ມີກຳມະກອນທັງໝົດ 2.742 ທ່ານ, ຍິງ 905 ທ່ານ ໃນນີ້, ການຕິດຕາມກວດກາສຸຂະພາບແຮງງານໄດ້ 8 ແຫ່ງ ມີຜູ້ເຂົ້າຮ່ວມທັງໝົດ 248 ທ່ານ, ຍິງ 97 ທ່ານ, ສ້າງສັນຍາແຮງງານລວມໝູ່ໄດ້ 04 ຮາກຖານ, ແຕ່ງຕັ້ງຜູ້ຕາງໜ້າຜູ້ອອກແຮງງານຢູ່ ຫົວໜ່ວຍແຮງງານໄດ້ 01 ແຫ່ງ, ໃຫ້ຄໍາປຶກສາກ່ຽວກັບຄ່າແຮງງານໃຫ້ຜູ້ອອກແຮງງານ ໄດ້ 02 ຄັ້ງ, ລົງຢ້ຽມຢາມ ແລະ ອວຍພອນກຳມະກອນ ຜູ້ອອກແຮງງານເນື່ອງໃນວັນກຳມະກອນຢູ່ບໍລິສັດ, ຫົວໜ່ວຍແຮງງານທັງພາກລັດ ແລະ ເອກະຊົນໄດ້ 11 ຄັ້ງ, ມີຜູ້ເຂົ້າຮ່ວມ 68 ທ່ານ, ຍິງ 32 ທ່ານ ໄດ້ເຜີຍແຜ່ຄ່າແຮງງານງານຂັ້ນຕໍ່າ ແລະ ໂຄສະນາຜົນຮ້າຍຕ້ານການຄ້າມະນຸດຕາມສາຍແດນລາວ – ຫວຽດນາມ ເຂດເມືອງຊ່ອນ, ເຂດເມືອງສົບກົບແຂວງເຊີນລາ ສສຫວຽດນາມ ແລະ ເມືອງວຽງໄຊ, ເມືອງຊຳໃຕ້, ເມືອງກວັນ ແລະ ໝວດໂຮງຮຽນ.
ຈຸດປະສົງຂອງການປາຖະກະຖາ ຄັ້ງນີ້ ເພື່ອເປັນການໂຄສະນາສຶກສາອົບຮົມ ໃຫ້ສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ ໄດ້ມີຄວາມຮັບຮູ້ ແລະ ເຂົ້າໃຈເຖິງມູນເຊື້ອປະຫວັດຄວາມເປັນມາຂອງວັນກໍາມະກອນສາກົນ, ການເຕີບໃຫຍ່ຂະຫຍາຍຕົວ ຂອງຂະບວນການກໍາມະກອນສາກົນ, ຕິດພັນກັບການເຕີບໃຫຍ່ຂະຫຍາຍຕົວ ຂອງຊົນຊັ້ນກໍາມະກອນລາວ, ຜົນງານການປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ຂອງຊົນຊັ້ນກໍາມະກອນລາວ ເພື່ອເປັນການເສີມຂະຫຍາຍທາດແທ້ມູນເຊື້ອປະຕິວັດ, ລັກສະນະດີເລີດຂອງຊົນຊັ້ນກໍາມະກອນລາວ ພາຍໃຕ້ການນໍາພາຂອງພັກປະຊາຊົນ ປະຕິວັດລາວ, ແນໃສ່ປຸກລະດົມ ແລະ ສ້າງຈິດສໍານຶກໃຫ້ສະມາຊິກກໍາມະບານ ໃຫ້ມີຄວາມບຸກບືນ, ຕັ້ງໜ້າ ປະກອບສ່ວນເຂົ້າໃນການເຄື່ອນໄຫວວຽກງານກໍາມະບານ ທັງເປັນການປຸກລະດົມສ້າງຂະບວນການແຂ່ງຂັນ ໃນການປະຕິບັດໜ້າທີ່ວິຊາສະເພາະ ແລະ ປະຕິບັດຂໍ້ແຂ່ງຂັນ 5 ເປັນເຈົ້າຂອງສະຫະພັນກໍາມະບານລາວ ຕິດພັນກັບຂໍ້ແຂ່ງຂັນ “ຮັກຊາດ ແລະ ພັດທະນາ” ໃຫ້ເປັນຂະບວນຟົດຟື້ນ ແລະ ກວ້າງຂວາງ.
ໂອກາດດຽວກັນນີ້, ຍັງໄດ້ຈັດໃຫ້ມີການລະດົມບໍລິຈາກເລືອດ ເພື່ອຊ່ວຍເຫລືອເພື່ອນມະນຸດທີ່ພວມຂາດເລືອດຕື່ມອີກ. ເຊີ່ງມີຜູ້ບໍລິຈາກທັງໝົດ 14 ຄົນ ແລະ ຜູ້ທີ່ມີຈຸດປະສົງບໍລິຈາກເລືອດ ສາມາດເຂົ້າໄປບໍລິຈາກໄດ້ທີ່ສູນເລືອດ ອົງການກາແດງແຂວງຫົວພັນ ສະຖານທີ່ຕັ້ງຢູ່ບ້ານນາວຽງ, ເມືອງຊຳເໜືອ, ແຂວງຫົວພັນ.
ຂ່າວ-ພາບ: ໄອແກ້ວ