ບໍລິສັດຫົວເຫວີຍເຕັກໂນໂລຊີ (ລາວ) ຈຳກັດຜູ້ດຽວ ພ້ອມຍົກລະດັບ ICT ໃຫ້ແກ່ວິຊາການ ແລະ ນັກສຶກສາຂອງສະຖາບັນໄປສະນີ, ໂທລະຄົມມະນາຄົມ ແລະ ການສື່ສານລາວ ພາຍຫລັງ ທ່ານ ຫູ ເຫວີຍ ຫົວ ປະທານບໍລິສັດດັ່ງກ່າວ ໄດ້ລົງນາມໃນບົດບັນທຶກຄວາມເຂົ້າໃຈຮ່ວມກັບ ທ່ານ ສາຍຝົນ ບຸດຈັນທະລາດ ຫົວໜ້າສະຖາບັນໄປສະນີ, ໂທລະຄົມມະນາຄົມ ແລະ ການສື່ສານ ໃນວັນທີ 16 ຕຸລາ ນີ້ທີ່ນະຄອນຫລວງວຽງຈັນ.

ທ່ານ ຫູ ເຫວີຍຫົວ ໃຫ້ຮູ້ວ່າ: ນີ້ແມ່ນກິດຈະກຳທີ່ສະແດງໃຫ້ເຫັນເຖີງຄວາມຮັບຜິດຊອບຕໍ່ສັງຄົມ (CSR) ຢູ່ທ້ອງຖິ່ນຂອງຫົວເຫວີຍທີ່ມີມາຫລາຍປີແລ້ວ ຊຶ່ງຜ່ານມາໄດ້ຊ່ວຍພັດທະນາບຸກຄະລາກອນທີ່ມີພອນສະຫວັນດ້ານ ICT, ສົ່ງເສີມການຖ່າຍທອດຄວາມຮູ້ ແລະ ຊຸກຍູ້ປະຊາ ຊົນໃຫ້ມີສ່ວນຮ່ວມໃນດີຈີຕອນລາວ ໂດຍພວກເຮົາໄດ້ເຊີນພະນັກງານ ແລະ ນັກສຶກສາຂອງສະຖາບັນ ICT 20 ຄົນເຂົ້າຮ່ວມໂຄງການ ແລະ ຫວັງວ່າຜູ້ເຂົ້າຮ່ວມທຸກຄົນຈະລວບລວມຄວາມຮູ້ ແລະ ຮັບຮູ້ທ່າອ່ຽງຂອງດີຈີຕອນລາວ.

ສ່ວນທ່ານ ສາຍຝົນ ບຸດຈັນທະລາດ ສະແດງຄວາມຂອບໃຈ ບໍລິສັດ ຫົວເຫວີຍ ເຕັກໂນໂລຊີ ທີ່ຕັດສິນໃຈເປັນຄູ່ຮ່ວມມືກັບສະຖາບັນ ແລະ ຫວັງວ່າການຮ່ວມມືນີ້ຈະເປັນດັ່ງກ້າທີ່ເຕີບໃຫຍ່ ແລະ ຂະຫຍາຍຕົວອອກດອກອອກຜົນຢ່າງຫລວງ ຫລາຍ ແລະ ມີປະສິດຕິພາບສູງໃນອະນາຄົດ.

ໂຄງການນີ້ ຈະສຸມໃສ່ຮ່ວມມືໄລຍະສັ້ນ ແລະ ກາງ ໂດຍປະກອບມີ ການຝຶກອົບຮົມ, ການຈັດກອງປະຊຸມ, ການຮຽນຮູ້ເອເລັກໂຕຣນິກ ແລະ ການແລກປ່ຽນປະສົບການ ລະຫວ່າງນັກຮຽນ ແລະ ຜູ້ຊ່ຽວຊານ. ພ້ອມນີ້ ຍັງມີຫລັກ ສູດຝຶກທັກສະ ດິຈີຕອນ ທີ່ຈະຊ່ວຍຝຶກອົບຮົມພະນັກ ງານ ແລະ ວິສະວະກອນຢູ່ພື້ນທີ່ຈຳນວນຫລາຍ ພາຍໃຕ້ຫົວຂໍ້ ແຕກຕ່າງກັນຕາມທ່າອ່ຽງເຕັກໂນໂລຊີໃໝ່ ແລະ ຈະມຸ່ງເນັ້ນຫົວຂໍ້ຕ່າງໆຂອງໄອຊີທີ ລວມເຖິງລະບົບ 5G, cloud, big data, AI ແລະ ອື່ນໆອີກ.

Cr: ສິງຄຳ

Loading...