ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ກະຊວງປ້ອງກັນຄວາມສະຫງົບພ້ອມຄະນະລົງຕິດຕາມກວດກາການປະຕິບັດວຽກງານອອກບັດປະຈຳຕົວ ແລະ ປື້ມສຳມະໂນຄົວແບບໃໝ່.

ພົນຈັດຕະວາ ຄຳສາຍ ຈັນທະວົງ ຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ກະຊວງປ້ອງກັນຄວາມສະຫງົບ ພ້ອມຄະນະຮັບຜິດຊອບວຽກງານວິຊາສະເພາະລົງຕິດຕາມກວດກາການປະຕິບັດວຽກງານອອກບັດປະຈຳຕົວ ແລະ ປື້ມສຳມະໂນຄົວແບບໃໝ່ຢູ່ກອງບັນຊາການປ້ອງກັນຄວາມສະຫງົບ ເມືອງໄຊຖານີ ນະຄອນຫຼວງວຽງຈັນ ໃນວັນທີ 5 ກໍລະກົດ 2018 ໂດຍມີຄະນະກອງບັນຊາການປ້ອງກັນຄວາມສະຫງົບເມືອງ, ພະແນກຄຸ້ມຄອງສຳມະໂນຄົວ ແລະ ກໍ່ສ້າງຮາກຖານການເມືອງ, ພະແນກວິຊາສະເພາະ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ພັນໂທ ສູນທອນ ສຸມາໄລ ຮອງຫົວໜ້າກອງບັນຊາການປ້ອງກັນຄວາມສະຫງົບ ເມືອງໄທານີ ຜູ້ຊີ້ນຳວຽກງານຄຸ້ມຄອງສຳມະໂນຄົວ ແລະ ກໍ່ສ້າງຮາກຖານໄດ້ລາຍງານວ່າ: ທົ່ວເມືອງໄຊທານີມີ 104 ບ້ານ, 2,543 ໜ່ວຍ, 34,120 ຫຼັງຄາເຮືອນ, 35,742 ຄອບຄົວ ມີພົນລະເມືອງທັງໝົດ 190,825 ຄົນ ຍິງ 95,217 ຄົນ, ໃນນີ້ມີຄອບຄົວຄົນຕ່າງດ້າວ 72 ຄອບຄົວ ມີຈຳນວນ 129 ຄົນ ຍິງ 55 ຄົນ, ໄດ້ລົງເກັບກຳເອົາຂໍ້ມູນເຂົ້າລະບົບ PIM ສຳເລັດແລ້ວ 104 ບ້ານ, 34,592 ຄອບຄົວ, ມີຈຳນວນພົນ 176,735 ຄົນ ຍິງ 86,544 ຄົນ, ພິມປື້ມສຳມະໂນຄົວໃຫ້ປະຊາຊົນໄດ້ 152 ຄອບຄົວ ຈຳນວນພົນ 772 ຄົນ ຍິງ 391 ຄົນ, ອາຍຸ 15 ປີຂຶ້ນໄປ 575 ຄົນ ຍິງ 296 ຄົນ,  ອອກບັດປະຈຳຕົວໃຫ້ປະຊາຊົນໄດ້ 6,641 ບັດ ຍິງ 3,829 ບັດ. ແຕ່ສະຖານທີ່ພະແນກຄຸ້ມຄອງສຳມະໂນຄົວ ແລະ ກໍ່ສ້າງຮາກຖານເມືອງຍັງຄັບແຄບ, ບ່ອນເກັບມ້ຽນເອກະສານຍັງບໍ່ທັນພຽງພໍ ສ່ວນການຈັດເກັບຄ່າທຳນຽມ, ຄ່າບໍລິການຕ່າງໆແມ່ນໄດ້ປະຕິບັດຕາມທິດຊີ້ນຳຂອງຂັ້ນເທິງ.

ຕອນທ້າຍພິທີຍັງໄດ້ຮັບຟັງການໂອ້ລົມໃຫ້ທິດຊີ້ນຳຂອງ ພົນຈັດຕະວາ ຄຳສາຍ ຈັນທະວົງ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ກອງບັນຊາການປ້ອງກັນຄວາມສະຫງົບເມືອງໄຊທານີຍາດມາໄດ້ ແລະ ທ່ານໄດ້ເນັ້ນໃຫ້ໜັກພະແນກທີ່ກ່ຽວຂ້ອງຍົກສູງຄວາມຮັບຜິດຊອບທາງດ້ານວິຊາສະເພາະ ແກ້ໄຂຈຸດອ່ອນຂໍ້ຄົງຄ້າງ, ປັບປຸງແບບແຜນວິທີເຮັດວຽກໃຫ້ເຂັ້ມແຂງໃນທຸກດ້ານ.