ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ພ້ອມດ້ວຍຄະນະລົງເຄື່ອງໄຫວຊີ້ນຳວຽກງານຕາມສາຍຕັ້ງວິຊາສະເພາະ ຢູ່ທີ່ກອງບັນຊາການປ້ອງກັນຄວາມສະຫງົບແຂວງໄຊຍະບູລີ

ວັນທີ່ 24 ຕຸລາ 2018 ພົນຈັດຕະວາ ຄໍາສາຍ ຈັນທະວົງ ຫົວໜ້າກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ພ້ອມດ້ວຍຄະນະ ລົງເຄື່ຶອນໄຫວຊີ້ນໍາວຽກງານຕາມສາຍຕັ້ງວິຊາສະເພາະທີ່ກອງບັນຊາການປ້ອງກັນຄວາມສະຫງົບແຂວງໄຊຍະບູລີ ມີຮອງຫົວໜ້າກອງບັນຊາການປ້ອງກັນຄວາມສະຫງົບແຂວງ, ຫົວໜ້າຫ້ອງ, ຮອງຫ້ອງ ແລະ ພະນັກງານຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານເຂົ້າຮ່ວມ.

ພັນໂທ ບຸນທັນ ທິບພະວົງ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງໄຊຍະບູລີ ຂື້ນຜ່ານບົດລາຍງານຫຍໍ້ກ່ຽວກັບການຈັດຕັ້ງປະຕິບັດວຽກງານວິຊາສະເພາະໃນໄລຍະຜ່ານມາໄດ້ເອົາໃຈໃສ່ສຶກສາອົບຮົມການເມືອງ ນຳພາແນວຄິດໃຫ້ພະນັກງານເປັນປົກກະຕິ, ຕິດຕາມກວດກາ ແລະ ຊີ້ນຳ-ນຳພາ ພະນັກງານ ພາຍໃນຫ້ອງ 509 ແລະ ບັນດາເມືອງ ເອົາໃຈໃສ່ຈັດຕັ້ງຜັນຂະຫຍາຍບັນດາມະຕິ, ຄຳສັ່ງ, ຂອງຂັ້ນເທິງເວົ້າລວມເວົ້າສະເພາະກົມ 509 ສະແດງອອກຜ່ານການປະຕິບັດໜ້າທີ່ ຍາດຜົນງານໄດ້ຫຼາຍດ້ານຄື: ໄດ້ເຄື່ອນໄຫວ ເກັບກໍາປ້ອນຂໍ້ມູນເຂົ້າລະບົບທັນສະໄໝໄດ້ 55.296 ຄອບຄົວ,ຈຳນວນພົນທັງໝົດ 276.389 ຄົນ,ຍິງ 136.713 ຄົນ, ອາຍຸ 15 ປີ ຂື້ນໄປ 213.021 ຄົນ, ຍິງ 105.452 ຄົນ, ພ້ອມກັນນັ້ນຍັງໄດ້ຊີ້ນຳ-ນຳພາ ຕິດຕາມແກ້ໄຂສະພາບພົນລະເມືອງທີ່ຍົກຍ້າຍມາບໍ່ຖືກຕ້ອງໄດ້ 123 ຄອບຄົວ, ມີ 610 ຄົນ, ຍິງ 329 ຄົນ, ແກ້ໄຂແລ້ວ ມີ 10 ຄອບຄົວ, ຈຳນວນພົນ 85 ຄົນ, ຍິງ 51 ຄົນ, ຈຳນວນທີ່ຍັງຕົກຄ້າງ 113 ຄອບຄົວ, ມີ 535 ຄົນ, ຍິງ 278 ຄົນ. ສ່ວນທິດທາງແຜນການໃນຕໍ່ໜ້າຈະສືບຕໍ່ຊຸກຍູ້ພະນັກງານລົງກໍ່ສ້າງຮາກຖານເຄື່ອນໄຫວເຮັດໜ້າທີ່ວິຊາສະເພາະ ແລະ ສືບຈັດຕັ້ງຜັນຂະຫຍາຍໂຄງການປັບປຸງກຳລັງປ້ອງກັນຄວາມສະຫງົບບ້ານ, ຕິດພັນກັບການແກ້ໄຂປະກົດການຫຍໍ້ທໍ້ຂອງສັງຄົມຢູ່ບັນດາເມືອງ, ຕິດຕາມກວດກາ ການຈົດທະບຽນສຳມະໂນຄົວ ດ້ວຍລະບົບທັນສະໄໝ ພ້ອມທັງປະສານສົມທົບກັບພະແນກພາຍໃນແຂວງ ແກ້ໄຂການຍົກຍ້າຍຂອງພົນລະເມືອງ ທີ່ບໍ່ຖືກຕ້ອງ ແລະເອົາໃຈໃສ່ອອກບັດປະຈຳຕົວໃຫ້ປະຊາຊົນຜູ້ມີເກນອາຍຸ 15 ປີຂື້ນໄປ, ສືບຕໍ່ຄຸ້ມຄອງບັນຊີພາຫະນະພິເສດ, ສືບຕໍ່ກະກຽມຈັດຕັ້ງປະຕິບັດຜະລິດກາປະທັບໃຫ້ທັນກັບຄວາມຮຽກຮ້ອງຕ້ອງການ ແລະ ທັນກັບເວລາ. ຄະນະພະແນກວິຊາສະເພາະກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ໄດ້ປະກອບຄຳເຫັນ ແລະ ຊີ້ແຈງບັນຫາກ່ຽວກັບວຽກງານຄຸ້ມຄອງສຳມະໂນຄົວ, ວຽກງານອອກບັດປະຈຳຕົວ ແລະ ວຽກງານປ້ອງກັນຄວາມສະຫງົບບ້ານພ້ອມທັງຜ່ານເອກະສານນິຕິກຳຕ່າງໆ ໃຫ້ພະນັກງານຫ້ອງ 509 ໄດ້ຮັບຮູ້ເຂົ້າໃຈເພື່ອນນຳໄປສືບຕໍ່ຈັດຕັ້ງປະຕິບັດໃນຕໍ່ໜ້າໃຫ້ມີຜົນສຳເລັດຕາມຄາດໝາຍ.

ຕອນທ້າຍ ພົນຈັດຕະວາ ຄຳສາຍ ຈັນທະວົງ ໄດ້ໂອ້ລົມຕໍ່ກອງປະຊຸມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍທີ່ຫ້ອງ 509 ໄດ້ຕັ້ງໜ້າປະຕິບັດໜ້າທີ່ໃນໄລຍະຜ່ານມາ ແລະ ທ່ານໄດ້ເນັ້ນໜັກໃຫ້ເອົາໃຈໃສ່ປະຕິບັດໜ້າທີ່ຂອງຕົນຢ່າງເອົາຈິງເອົາຈັງ, ເອົາໃຈໃສ່ການເຄື່ອນໄຫວຂອງພົນລະເມືອງ,ກວດກາຄົນເຂົ້າ-ອອກຢ່າງເຂັ້ມງວດປ້ອງກັນສະກັດກັ້ນກຸ່ມຄົນບໍ່ດີ ແລະເຄື່ອນໄຫວບໍ່ຖືກຕ້ອງ, ສຸມໃສ່ແກ້ໄຂປະກົດການຫຍໍ້ທໍ້ທີ່ເກີດຂື້ນໃນສັງຄົມໃຫ້ຫຼຸດໜ້ອຍຖອຍລົງ.