ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານລົງຊີ້ນຳວຽກງານວິຊາສະເພາະຢູ່ ແຂວງໄຊຍະບູລີ.

ໃນວັນທີ 20 ມີນາ 2019 ພົນຈັດຕະວາ ຄຳສາຍ ຈັນທະວົງ ຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ພ້ອມດ້ວຍຄະນະ ລົງຊີ້ນຳວຽກງານວິຊາສະເພາະຢູ່ ເມືອງຊຽງຮອນ ແຂວງໄຊຍະບູລີ. ໂດຍການເຂົ້າຮ່ວມຂອງ ພັນໂທ ສົມເພັດ ປັນແກ້ວ ຮອງກອງບັນຊາການປ້ອງກັນຄວາມສະຫງົບ ແຂວງໄຊຍະບູລີ ມີຄະນະກອງບັນຊາການ, ຄະນະພະແນກ. ປກສ ກຸ່ມ, ພະນັກງານນັກຮົບກອງບັນຊາການເຂົ້າຮ່ວມ.

ພັນໂທ ເທບພອນ ເທບປັນຍາ ຫົວໜ້າກອງບັນຊາການປ້ອງກັນຄວາມສະຫງົບເມືອງຊຽງຮອນ ໄດ້ຂື້ນລາຍງານສະພາບການເຄື່ອນໄຫວວຽກງານໃນໄລຍະຜ່ານມາ ຊື່ງກອງບັນຊາການກໍ່ໄດ້ເອົາໃຈໃສ່ໂຄສະນາເຜີຍແຜ່, ສຶກສາອົບຮົມພະນັກງານນັກຮົບພາຍໃນກອງບັນຊາການໃຫ້ມີແນວຄິດທາງດ້ານການເມືອງໜັກແໜ້ນ, ຮັບຮູ້ ແລະ ເຂົ້າໃຈເຖິງແນວທາງນະໂຍບາຍຂອງພັກ-ລັດ ສາມາດກຳຕີລາຄາສະພາບການເຄື່ອນໄຫວຂອງສັດຕູ ແລະ ກຸ່ມຄົນບໍ່ດີ, ເອົາໃຈໃສ່ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ເປັນຕົ້ນແມ່ນບັນຫາຢາເສບຕິດ, ຂີ້ລັກ, ງັດແງະ, ອາລະວາດຕີກັນ ແລະ ຫຼຸດໜ້ອຍເທື່ອລະກ້າວ, ຊື່ງສະແດງອອກໃນ 3 ເດືອນທີ່ຜ່ານມາສາມາດແກ້ໄຂຄະດີໄດ້ 5 ກໍລະນີ, ກັກຕົວຜູ້ກະທຳຜິດໄດ້ 16 ຄົນ, ຍິງ 1 ຄົນ. ເອົາໃຈໃສ່ຫັ່ນເອົາກຳລັງລົງກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ ຕາມແຜນການສ້າງບ້ານ ແລະ ກຸ່ມບ້ານພັດທະນາຕາມທິດນຳສາມສ້າງ, ນອກຈາກນັ້ນ ຍັງໄດ້ປັບປຸງວຽກງານປ້ອງກັນຄວາມສະຫງົບຢູ່ຮາກຖານບ້ານໃຫ້ມີຄວາມໜັກແໜ້ນເຂັ້ມແຂງ.

ໃນຕອນທ້າຍ ພົນຈັດຕະວາ ຄຳສາຍ ຈັນທະວົງ ຫົວໜ້າກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ຍັງເນັ້ນໜັກໃຫ້ພະນັກງານນັກຮົບພາຍໃນເມືອງທຸກສະຫາຍ ສຸມໃສ່ເຮັດວຽກງານການເມືອງ-ນຳພາແນວຄິດໃຫ້ແຂງແຮງເລິກເຊິ່ງ, ເອົາໃຈໃສ່ສົບທົບກັບພາກສ່ວນທີ່ກ່ຽວຂ້ອງ ແຕ່ສູນກາງລົງຮອດທ້ອງຖິ່ນ ໃຫ້ເປັນເອກະພາບກັນ, ຊີ້ນຳກຳລັງປ້ອງກັນຄວາມສະຫງົບກຸ່ມບ້ານ ໃຫ້ເຮັດວຽກເກັບກຳ-ກວດກາ, ຈົດທະບຽນຄຸ້ມຄອງສຳມະໂນຄົວ ເພື່ອເກັບສະພາບການເໜັງຕີງຂອງພົນລະເມືອງໃຫ້ຈະແຈ້ງ-ຊັດເຈນ ເພື່ອເປັນຂໍ້ມູນອຳນວຍຄວາມສະດວກໃນການປະຕິບັດໜ້າທີ່ວຽກງານຂອງແຕ່ລະພາກສ່ວນ ເອົາໃຈໃສ່ແກ້ໄຂປະກົດການຫຍໍ້ທໍ້ພາຍໃນເມືອງໃຫ້ນັບມື້ຫຼຸດໜ້ອຍຖອຍລົງ.

ໃນຕອນບ່າຍຂອງວັນດຽວກັນ ກໍ່ໄດ້ລົງຊີ້ນຳວຽກງານຢູ່ເມືອງຄອບ ແຂວງໄຊຍະບູລີ ໂດຍການຕ້ອນຮັບຂອງ ພັນໂທ ອາໄຊ ຍີນຍະຈີ່ງ ຮອງກອງບັນຊາການປ້ອງກັນຄວາມສະຫງົບເມືອງຄອບ ພ້ອມດ້ວຍພະນັກງານນັກຮົບອ້ອມຂ້າງກອງບັນຊາການ. ໃນໂອກາດລົງມາຄັ້ງນີ້ ທ່ານກໍ່ໄດ້   ເໜັ້ນໜັກໃຫ້ພະນັກງານນັກຮົບເອົາໃຈໃສ່ສົມທົບກັບບັນດາກຸ່ມສ້າງແຜນງານ, ແຜນວຽກໃຫ້ລະອຽດ, ກະກຽມບັນດາເອກະສານຕ່າງໆເພື່ອດຳເນີນເຜີຍແຜ່ຢູ່ແຕ່ລະບ້ານ, ໂດຍສະເພາະແມ່ນບັນດານິຕິກຳຕ່າງໆ, ລົງເກັບກຳສະຖິຕິພົນລະເມືອງ, ຄຸ້ມຄອງເປົ້າໝາຍ, ຄຸ້ມຄອງຄົນຕ່າງປະເທດ, ເຜີຍແຜ່ກົດລະບຽບບ້ານ, ປັບປຸງສຳມະໂນຄົວ ແລະ ອອກບັດປະຈຳຕົວແບບໃໝ່, ແກ້ໄຂເປົ້າໝາຍບັນຫາຢາເສບຕິດ, ສາສະໜາ ເພື່ອເຮັດໃຫ້ສັງຄົມມີຄວາມສະຫງົບ ຄວາມເປັນລະບຽບຮຽບຮ້ອຍ.