ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຫົວໜ້າຂະແໜງ ກສນ ພະແນກ ສກຂ ຊຽງຂວາງ ສືບຕໍ່ລົງຕິດຕາມສອບເສັງຈົບຊັ້ນ ມຕ ບໍາລຸງສໍາລັບປະຊາຊົນ ຢູ່ບ້ານເປົ້າໝາຍ ເມືອງຄູນ

 ວັນ​ທີ 11 ກໍລະກົດ 2018 ນີ້ ທ່ານ ນີວັນ ຈັນທະ​ລັງສີ ຫົວໜ້າ​ຂະ​ແໜງ​ການ​ສຶກສານ​ອກ​ໂຮງຮຽນ(ກສນ) ພະ​ແນ​ກສຶກ

ສາ​ທິການ ​ແລະ ກິລາ ​ແຂວງ (ສກຂ) ຊຽງ​ຂວາງ ພ້ອມ​ຄະນະ ​ໄດ້ສືບ​ຕໍ່​ລົງ​ຕິດຕາມຊຸກຍູ້​ການຈັດ​ສອບ​ເສັງ​ຈົບ​ຊັ້ນ​ມັດທະຍົມ​ຕອນ​ຕົ້ນ​ ຂັ້ນ​ຮຽນ ມ.4 ລະບົບ​ບໍາລຸງ​ ສໍາລັບ​ປະຊາຊົນ ຢູ່​ສູນ​ສອບ​ເສັງ ບ້ານ​ ຖໍ້າ​ຫົວ​ເຫຼົ່າ, ​ເມືອງ​ ຄູນ, ​ໂດຍ​ມີ ທ່ານ ສາຍພູ​ລົມ ມູນ​ພັນ​ຄໍາ ຮອງ​ຫົວໜ້າ​ຫ້ອງການສຶກສາ​ທິການ ​ແລະ ກິລາ ​ເມືອງ​ ຄູນ ພ້ອມ​ດ້ວຍ​ວິຊາ​ການທີ່​ກ່ຽວຂ້ອງ​ຂອງ​ເມືອງ ເດີນທາງ​ຮ່ວມ​ນໍາ.

          ​ໂອກາດ​ນີ້ ທາ​ງທີ​ມງານໄດ້​ຮັບ​ຟັງ​ການ​ລາຍ​ງານ​ສະພາບ​ການ​ສອບ​ເສັງ​ໂດຍ​ຫຍໍ້ ​ຈາກ​ຄະນະ​ຮັບຜິດຊອບ​ປະ​ຈໍາ​​ສູນ​ສອບ​ເສັງດັ່ງກ່າວ, ​ໂດຍ​ລວມ​ແລ້ວ​ສະພາບ​ການ​ສອບ​ເສັງ​ແມ່ນ​ປົກກະຕິ​ດີ, ມີ​ຄວາມ​ສະຫງົບ​ປອດ​ໄພ, ພໍ່​ແມ່​ປະຊາຊົນ​ພາຍ​ໃນ​ບ້ານ ​ແລະ ບ້ານ​ອ້ອມ​ຂ້າງໃຫ້​ຄວາມ​ຮ່ວມ​ມື ​ໃນ​ການມາ​ສອບ​ເສັງ ​ແລະ ມາ​ສອບ​ເສັງທັນ​ຕາມ​ກໍານົດ​ເວລາ ພ້ອມ​ທັງ​ເອົາ​ໃຈ​ໃສ່​ເຮັດ​ບົດ​ຢ່າງ​ຕັ້ງໜ້າ.

           ທ່ານ ນີວັນ ຈັນທະ​ລັງສີ ​ໄດ້​ກ່າວ​ສະ​ແດງ​ຄວາມ​ຊົມ​ເຊີຍ​ຕໍ່​ຄະນະ​ຮັບຜິດຊອບ​ການ​ສອບ​ເສັງ ​ແລະ ກໍາມະການ​ຍາມ​ຫ້ອງ​ສອບ ທີ່​ໄດ້​ພ້ອມ​ກັນ​ເອົາ​ໃຈ​ໃສ່​ເຮັດ​ໜ້າ​ທີ່​ດ້ວຍ​ຄວາມ​ຮັບຜິດຊອບ​ສູງ, ​ເຮັດ​ໃຫ້ການ​ສອບ​ເສັງ​ດໍາ​ເນີນ​ໄປ​ຕາມ​ແຜນ​ທີ່​ກໍານົດ, ທ່ານ​ຍັງ​ໄດ້​ແນະ​ນໍາ​ໃຫ້​ຄະນະ​ຮັບຜິດຊອບ​ການ​ສອບ​ເສັງ​ ຈົ່ງ​ຄົ້ນ​ຄ້ວາ​ພິຈາລະນາ​ຕໍ່​ກັບນັກ​ສອບ​ທີ່​ຂາດ​ສອບ​ເສັງ​ ສາ​ເຫດ​ຍ້ອນ​ຫັຍ​ງ ​ແລະ ຈະ​ຕິດ​ຕໍ່​ຫາ​ເຂົາ​ເຈົ້າ​ດ້ວຍ​ຮູບ​ການ​ໃດ ​ເພື່ອ​ໃຫ້​ເຂົາ​​ເຈົ້າໄດ້​ມີ​ໂອກາດ​ສອບ​ເສັງ​ຄືນ, ທ່ານ​ຍັງ​ໄດ້​ຢໍ້າຕື່ມ​ກ່ຽວ​ນັກ​ສອບ​ຄົນ​ໃດ​ທີ່​ຕ້ອງ ການຢາກ​​ໄປ​ສຶກສາ​ຕໍ່ຢູ່​ໂຮງຮຽນ​ເຕັກນິກ-ວິຊາ​ຊີບ ​ແບບ​ປະສົມ​ແຂວງ, ພາຍຫຼັງ​ສອບ​ເສັງ​ຈົບ​ນີ້​ແລ້ວ​ແມ່ນ​ສາມາດໄປ​ສະໝັກ​ໄດ້ ​ເພາະ​ມີ​ຫຼາຍ​ສາຂາ​ອາຊີບ​ໃຫ້​ເລືອກ​ຮຽນ ​ແລະ ຫ້ອງ​ຮຽນ​ກໍ​ສະດວກ​ສະບາຍ ກ້ວາງ​ຂວາງ, ທາງ​ໂຮງຮຽນມີ​ຫໍ​ພັກ​ໃຫ້​ຢູ່, ​ເວລາ​ໄປ​ສະໝັກຊອກ​ວຽກ​ເຮັດ​ງານ​ທໍາ​ກໍ​ງ່າຍ ​ເພາະ​ສອດຄ່ອງ​ຕາມ​ຄວາມ​ຮຽກຮ້ອງ​ຕ້ອງການ​ຂອງ​ໜ້າ​ທີ່​ວຽກ​ງານ​​ໃນສັງຄົມ​ປະຈຸ​ບັນ.

          ສູນ​ສອບ​ເສັງ​ ບ້ານ ​ຖໍ້າ​ຫົວ​ເຫຼົ່າ ​ເມືອງ​ຄູນ ມີ​ນັກ​ສອບ​ເສັງທັງ​ໝົດ 30 ຄົນ, ຍິງ 11 ຄົນ, ​ວາງ​ຄາດໝາຍ​ຜົນ​ການ​ສອບ​ຈະ​ໃຫ້​ບັນລຸ 98 ສ່ວນ​ຮ້ອຍ​ຂຶ້ນ​ໄປ ​ແລະ ​ໄດ້​ດໍາ​ເນີນ​ການ​ສອບ​ເສັງ​ເປັນ​ເວລາ 02 ມື້, ​ແຕ່ວັນ​ທີ 11 ຫາ 12 ກໍລະກົດ 2018, ​ໃນ​ນັ້ນ ມີ 04 ວິຊາ​ທີ່​ນໍາ​ມາ​ສອບ​ເສັງ​ຄື: ວິຊາ ພາສາ​ລາວ-ວັນນະຄະດີ, ຄະນິດສາດ, ວິທະຍາສາດ​ທໍາ​ມະ​ຊາດ, ວິທະຍາສາ​ດສັງຄົມ, ​ແຕ່​ລະວິ​ຊາ​ໃຊ້​ເວລາ​ສອບ 120 ນາທີ, ຍົກ​ເວັ້ນວິຊາ ວິທະຍາສາດ​ທໍາ​ມະ​ຊາດ ​ແລະ ວິທະຍາສາດ​ສັງຄົມ ​ໃຊ້​ເວລາ​ສອບ​ເສັງ 90 ນາທີ.