ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຫົວໜ້າຂະແໜງ ກສນ ພະແນກ ສກຂ ຊຽງຂວາງ ລົງຕິດຕາມສອບເສັງຈົບຊັ້ນ ມຕ ບໍາລຸງສໍາລັບປະຊາຊົນ ຢູ່ບ້ານເປົ້າໝາຍ ເມືອງຜາໄຊ

ວັນ​ທີ 09 ກໍລະກົດ 2018 ນີ້ ທ່ານ ນີວັນ ຈັນທະ​ລັງສີ ຫົວໜ້າ​ຂະ​ແໜງ​ການ​ສຶກສານ​ອກ​ໂຮງຮຽນ(ກສນ) ພະ​ແນ​ກສຶກ

ສາ​ທິການ ​ແລະ ກິລາ ​ແຂວງ (ສກຂ) ຊຽງ​ຂວາງ ພ້ອມ​ຄະນະ ​ໄດ້​ລົງ​ຕິດຕາມ​ກວດກາ​ການຈັດ​ສອບ​ເສັງ​ຈົບ​ຊັ້ນ​ມັດທະຍົມ​ຕອນ​ຕົ້ນ​ ຂັ້ນ​ຮຽນ ມ.4 ລະບົບ​ບໍາລຸງ​ ສໍາລັບ​ປະຊາຊົນ ຢູ່​ສູນ​ສອບ​ເສັງ ບ້ານ​ ຖໍ້າ​ຫໍ​ສິມ ​ແລະ ສູນ​ສອບ​ເສັງ ບ້ານ ​ພາ​ເໜືອ, ​ເມືອງ​ ຜາ​ໄຊ, ​ໂດຍ​ມີ ທ່ານ ຄໍາ​ເພັດ ທັນ​ສະ​ໄໝ ຮອງ​ຫົວໜ້າ​ຫ້ອງການສຶກສາ​ທິການ ​ແລະ ກິລາ ​ເມືອງ​ ຜາ​ໄຊ ພ້ອມ​ດ້ວຍ​ວິຊາ​ການທີ່​ກ່ຽວຂ້ອງ​ຂອງ​ເມືອງໃຫ້​ກຽດ​ເດີນທາງ​ຮ່ວມ​ນໍາ.

          ​ໂອກາດ​ນີ້ ທາ​ງທີ​ມງານໄດ້​ຮັບ​ຟັງ​ການ​ລາຍ​ງານ​ສະພາບ​ການ​ສອບ​ເສັງ​ໂດຍ​ຫຍໍ້ ​ຈາກ​ຄະນະ​ຮັບຜິດຊອບ​ປະ​ຈໍາ​ແຕ່​ລະ​ສູນ​ສອບ​ເສັງ, ​ໂດຍ​ລວມ​ແລ້ວ​ສະພາບ​ການ​ສອບ​ເສັງ​ແມ່ນ​ປົກກະຕິ​ດີ, ມີ​ຄວາມ​ສະຫງົບ​ປອດ​ໄພ, ພໍ່​ແມ່​ປະຊາຊົນ​ໃຫ້​ຄວາມ​ຮ່ວມ​ມື ​ໃນ​ການມາ​ສອບ​ເສັງ ​ແລະ ມາ​ສອບ​ເສັງທັນ​ຕາມ​ກໍານົດ​ເວລາ ພ້ອມ​ທັງ​ເອົາ​ໃຈ​ໃສ່​ເຮັດ​ບົດ​ຢ່າງ​ສຸດ​ກົກ​ສຸດ​ປາຍ.

           ທ່ານ ນີວັນ ຈັນທະ​ລັງສີ ​ໄດ້​ກ່າວ​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່​ຄະນະ​ຮັບຜິດຊອບ​ການ​ສອບ​ເສັງ ​ແລະ ກໍາມະການ​ຍາມ​ຫ້ອງ​ສອບທັງ​ສອງ​ສູນ ທີ່​ໄດ້​ພ້ອມ​ກັນ​ເອົາ​ໃຈ​ໃສ່​ເຮັດ​ໜ້າ​ທີ່​ດ້ວຍ​ຄວາມ​ຮັບຜິດຊອບ​ສູງ, ​ເຮັດ​ໃຫ້ການ​ສອບ​ເສັງ​ດໍາ​ເນີນ​ໄປ​ຕາມ​ແຜນ​ທີ່​ກໍານົດ, ຫວັງ ​ແລະ ​ເຊື່ອວ່າ ທຸກ​ພາກສ່ວນ​ຈາກອົງການ​ຈັດ​ຕັ້ງ​ທີ່​ກ່ຽວຂ້ອງ​ຈະ​ໃຫ້ການ​ຮ່ວມ​ມື ​ແລະ ພ້ອມ​ກັນຈັດຕັ້ງການ​ສອບ​ເສັງໃຫ້ບັນລຸ​ຕາມ​ແຜນ​ທີ່​ວາງ​ໄວ້. ທ່ານ​ຍັງ​ໃຫ້​ຮູ້​​ວ່າ: ​ເຖິງ​ແມ່ນ ​ແຂວງ ​ຊຽງ​ຂວາງ​ຈະ​ປະກາດ​ຈົບ​ຊັ້ນ​ມັດທະຍົມ​ຕອນ​ຕົ້ນ​ບໍາລຸງ​ສໍາລັບ​ປະຊາຊົນ​​ທົ່ວ​ແຂວງ​​ໄປ​ແລ້ວກໍ​ຕາມ, ​ແຕ່​ທາງ​ອໍານາດ​ການ​ປົກຄອງ​ແຂວງ​ ​ໂດຍ​ສະ​ເພາະ​ທາງ​ພະ​ແນ​ກສຶກສາ​ທິການ ​ແລະ ກິລາ ​ແຂວງ-ຂະ​ແໜງ​ການ​ທີ່​ກ່ຽວ​ຂ້ອງຂອງ​ພະ​ແນ​ກ ຍັງໄດ້​ເອົາ​ໃຈ​ໃສ່ສືບ​ຕໍ່​ເຄື່ອນ​ໄຫວ​ເຮັດ​ໜ້າ​ທີ່​ຢ່າງຕໍ່​ເນື່ອງ, ມີ​ການຈັດ ການ​ຮຽນ-ການ​ສອນ ຊ້ອມ​ແຊມ​ບໍາລຸງຍົກ​ລະດັບ​ຄວາມ​ຮູ້ຄືນ​​ໃໝ່ໃຫ້​ພໍ່​ແມ່​ປະຊາຊົນ ຜູ້​ທີ່​ຍັງຕົກ​ຄ້າງລອດ​ເຫຼືອ​ຈາກ​ສາຍ​ສາມັນໃນ​ແຕ່ລະ​ປີ, ເພື່ອ​ໃຫ້​ເຂົາ​ເຈົ້າ​ໄດ້​ມີ​ໂອກາດ​​ໄດ້​ຮັບ​ການ​ສຶກສາ​ຢ່າງ​ເທົ່າ​ທຽມ​ກັບ​ສາຍ​ສາມັນ, ​ທັ້ງນີ້​ກໍ​ເພື່ອ​ແນ​ໃສ່​ຍົກ​ສູງ​ທາງ​ດ້ານ​ຄວາມ​ຮູ້​ຄວາມ​ສາມາດໃຫ້​ເຂົາ​ເຈົ້າ​ ເວລາ​ໄປ​ປະກອບ​ອາຊີບ ​ແລະ ຊອກ​ວຽກ​ເຮັດ​ງານ​ທໍາ, ​ເພື່ອ​ໃຫ້​ສອດຄ່ອງ​ກັບສະພາບ​ຄວາມ​ເປັນ​ຈິງ​ຂອງ​ໜ້າ​ທີ່​ວຽກ​ງານ​​ໃນ​ສັງຄົມ​ປະຈຸ​ບັນ.

          ສໍາລັບສູນ​ສອບ​ເສັງ​ ບ້ານ ​ຖໍ້າ​ຫໍ​ສິມ ມີ​ນັກ​ສອບ​ເສັງ 19 ຄົນ, ຍິງ 06 ຄົນ, ສູນ​ສອບ​ເສັງບ້ານ ພາ​ເໜືອ ມີ​ນັກ​ສອບ​ເສັງ 13 ຄົນ, ຍິງ 07 ຄົນ, ທັງ​ສອງສູນ​ວາງ​ຄາດໝາຍ​ຜົນ​ການ​ສອບ​ຈະ​ໃຫ້​ບັນລຸ 98 ສ່ວນ​ຮ້ອຍ​ຂຶ້ນ​ໄປ ​ແລະ ​ໄດ້​ດໍາ​ເນີນ​ການ​ສອບ​ເສັງ​ເປັນ​ເວລາ 02 ມື້, ​ແຕ່ວັນ​ທີ 09 ຫາ 10 ກໍລະກົດ 2018 ຈິ່ງ​ສໍາ​ເລັດ, ​ໃນ​ນັ້ນ ມີ 04 ວິຊາ​ທີ່​ນໍາ​ມາ​ສອບ​ເສັງ​ຄື: ວິຊາ ພາສາ​ລາວ-ວັນນະຄະດີ, ຄະນິດສາດ, ວິທະຍາສາດ​ທໍາ​ມະ​ຊາດ, ວິທະຍາສາ​ດສັງຄົມ, ​ແຕ່​ລະວິ​ຊາ​ໃຊ້​ເວລາ​ສອບ 120 ນາທີ, ຍົກ​ເວັ້ນວິຊາ ວິທະຍາສາດ​ທໍາ​ມະ​ຊາດ ​ແລະ ວິທະຍາສາດ​ສັງຄົມ ​ໃຊ້​ເວລາ​ສອບ​ເສັງ 90 ນາທີ.