ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ນາງ ສີໃສ ລືເດດມູນສອນ ກໍາມະການກົມການເມືອງ ສູນກາງພັກ ເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ ພົບປະໂອລົມພະນັກງານການນໍາຂອງແຂວງບໍ່ແກ້ວ ໃນວັນທີ 5 ມິຖຸນາ 2024 ທີ່ຫ້ອງວ່າການແຂວງບໍ່ແກ້ວ.
ທ່ານ ທອງຈັນ ມະນີໄຊ ກໍາມະການສູນກາງພັກ ຮັກສາການເຈົ້າແຂວງໆບໍ່ແກ້ວ ໄດ້ລາຍງານວ່າ: ການຈັດຕັ້ງປະຕິບັດວຽກງານຮອບດ້ານ ຂອງແຂວງບໍ່ແກ້ວ ໃນໄລຍະຜ່ານມາ ແມ່ນໄດ້ນຳພາ-ຊີ້ນຳວຽກງານປັບປຸງກໍ່ສ້າງ ແລະ ຂະຫຍາຍພັກ ໃຫ້ມີຄວາມໜັກແໜ້ນເຂັ້ມແຂງ ທາງດ້ານການເມືອງແນວຄິດ, ມີແບບແຜນນຳພາ, ວິທີເຮັດວຽກຂອງຄະນະພັກແຕ່ລະຂັ້ນ ພ້ອມທັງເກັບກຳສະຖິຕິ ກ່ຽວກັບວຽກພັກ-ພະນັກງານ, ທົ່ວແຂວງມີ 8 ອົງຄະນະພັກ; 84 ຄະນະພັກຮາກຖານ, ມີ 670 ໜ່ວຍພັກ, ມີສະມາຊິກພັກ 11.057 ສະຫາຍ, ຍິງ 3.051 ສະຫາຍ; ມີກໍາມະການພັກແຂວງ 28 ສະຫາຍ ຍິງ 4 ສະຫາຍ. ໃນປີ 2023 ໄດ້ຮັບຮອງໜ່ວຍພັກປອດໃສ ເຂັ້ມແຂງ ໜັກແໜ້ນ 528 ໜ່ວຍພັກ ກວມ 78,80%. ໃນ 6 ເດືອນຕົ້ນປີ 2024 ທົ່ວແຂວງຮັບມະຫາຊົນກ້າວໜ້າ ເຂົ້າພັກສໍາຮອງ 216 ສະຫາຍ ຍິງ 59 ສະຫາຍ; ທົ່ວແຂວງມີພະນັກງານ-ລັດຖະກອນ ທັງໝົດ 5.148 ທ່ານ, ຍິງ 2.225 ທ່ານ. ພ້ອມນີ້, ໄດ້ເອົາໃຈໃສ່ຊຸກຍູ້, ສົ່ງເສີມການພັດທະນາເສດຖະກິດ ຢ່າງເປັນປົກກະຕິ ເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ ໃນປີຜ່ານມາ ລວມຍອດຜະລິດຕະພັນພາຍໃນບັນລຸໄດ້ 3.715,28 ຕື້ກີບ ແລະ ເສດຖະກິດຂະຫຍາຍຫຍາຍຕົວ ໃນລະດັບ 4,8%.
ໃນໂອກາດນີ້, ສະຫາຍ ນາງ ສີໃສ ລືເດດມູນສອນ ໄດ້ເນັ້ນໃຫ້ອົງຄະນະພັກແຂວງບໍ່ແກ້ວ ເອົາໃຈໃສ່ຕິດຕາມແກ້ໄຂບັນຫາເສດຖະກິດ-ການເງິນ ດ້ວຍການວາງກົນໄກ, ລະບຽບການຕ່າງໆ ຢ່າງເໝາະສົມ, ຖືເອົາວຽກງານສຶກສາອົບຮົມການເມືອງ-ແນວຄິດ ເປັນພື້ນຖານ ເພື່ອໃຫ້ພະນັກງານ, ທະຫານ, ຕໍາຫລວດ ປະກອບສ່ວນປະຕິບັດໜ້າທີ່ໄດ້ດີຂຶ້ນ ໂດຍບໍ່ໃຊ້ບັນຫາດັ່ງກ່າວ ເປັນຊ່ອງວ່າງໃນການຫລີກເວັ້ນການປະຕິບັດວຽກງານ. ພ້ອມນີ້, ການປະຕິບັດ 02 ວາລະແຫ່ງຊາດ ຍັງເປັນວຽກໜຶ່ງທີ່ສໍາຄັນ, ວຽກງານກໍ່ສ້າງພັກ-ພະນັກງານ ແລະ ການກະກຽມກອງປະຊຸມ 3 ຂັ້ນ ຄະນະພັກແຕ່ລະຂັ້ນ ຕ້ອງຄົ້ນຄວ້າ, ສະຫລຸບຕີລາຄາການຈັດຕັ້ງປະຕິບັດ ກົດລະບຽບພັກ ສະໄໝທີ XI ຍັງມີບັນຫາໃດທີ່ຍັງບໍ່ທັນຈະແຈ້ງ ແລະ ຄວນປັບປຸງໃນກົດລະບຽບພັກ ສະໄໝທີ XII, ເອົາໃຈໃສ່ເຊື່ອມຊຶມຄໍາສັ່ງ ເລກທີ 411/ຄລສພ, ຄໍາແນະນຳ ເລກທີ 211/ຄຈສພ ແລະ ແຈ້ງການ ຂອງຄະນະຈັດຕັ້ງສູນກາງພັກ ເລກທີ 99/ຄຈສພ ກ່ຽວກັບການກະກຽມ ແລະ ດໍາເນີນກອງປະຊຸມໃຫຍ່ ອົງຄະນະພັກເມືອງ ຢ່າງລະອຽດ ແລະ ທົ່ວເຖິງ ພ້ອມທັງລາຍງານໄປຍັງຄະນະຈັດຕັ້ງສູນກາງພັກ ເພື່ອຕິດຕາມຮ່ວມກັນ. ໂອກາດນີ້, ບັນດາຄະນະດັ່ງກ່າວ ຍັງໄດ້ແລກປ່ຽນບົດຮຽນ ກ່ຽວກັບການຈັດຕັ້ງປະຕິບັດ ວຽກງານກໍ່ສ້າງພັກ-ພະ ນັກງານ, ປັບປຸງກົງຈັກການຈັດຕັ້ງ ແລະ ການກະກຽມກອງປະຊຸມ 3 ຂັ້ນ ຂອງພັກ ກັບຄະນະຈັດຕັ້ງແຂວງຕື່ມອີກ.
ຂ່າວ: ຄໍາເພັງ