ໃນລະຫວ່າງວັນທີ 3-5 ເມສາ 2024 ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິ ການສູນກາງພັກ, ຫົວໜ້າຄະນະຈັດຕັ້ງສູນກາງພັກ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ແຂວງຫົວພັນ ໂດຍໃຫ້ການຕ້ອນຮັບຂອງສະຫາຍ ປອ. ຄຳແພງ ໄຊສົມແພງ ກຳມະການສູນ ກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫົວພັນ ພ້ອມດ້ວຍຄະນະ.
ໃນໂອກາດດັ່ງກ່າວ ໄດ້ເຮັດວຽກຮ່ວມກັບຄະນະປະຈຳພັກແຂວງ, ຮັບຟັງການລາຍງານສະພາບການນຳພາ-ຊີ້ນຳລວມຂອງຄະນະບໍລິຫານງານພັກແຂວງ, ແຜນພັດທະນາເສດຖະກິດ-ສັງ ຄົມຂອງແຂວງ, ວຽກງານພັກ-ພະນັກ ງານ, ການປັບປຸງກົງຈັກການຈັດຕັ້ງ ແລະ ສະພາບການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ ທົ່ວແຂວງຫົວພັນ.
ແຂວງຫົວພັນ ດິນແດນວິລະຊົນ ຖິ່ນກຳເນີດຂອງການປະຕິ ວັດລາວ, ມີພົນລະເມືອງ ສາມແສນກວ່າຄົນ ໃນເນື້ອທີ່ 16,500 ກິໂລຕາແມັດ ເປັນແຂວງທີ່ມີຄວາມສະຫງົບ ເປັນລະບຽບຮຽບ ຮ້ອຍ ຮັກສາໄດ້ຄວາມໜັກແໜ້ນທາງດ້ານການເມືອງ, ເອົາໃຈໃສ່ປະຕິບັດແນວທາງປ້ອງກັນຊາດປ້ອງກັນຄວາມສະຫງົບ ໄປພ້ອມ ກັບການກໍ່ສ້າງຮາກຖານການເມືອງຕາມ 4 ເນືຶ້ອໃນ, 4 ຄາດໝາຍ ເຮັດໃຫ້ປະຊາຊົນຢູ່ທ່າງທຳມາຫາກິນມີການພັດທະນາຢ່າງຕັ້ງ ໜ້າ; ປີ 2023 ລວມຍອດຜະລິດຕະພັນພາຍໃນ GDP ບັນລຸໄດ້ 4.753,15 ຕື້ກີບ, ລາຍໄດ້ສະເລ່ຍ 15.154.758 ກີບ/ຄົນ/ປີ ດ້ວຍອັດຕາການຂະຫຍາຍຕົວທາງດ້ານເສດຖະກິດຢູ່ໃນລະດັບ 4,16%; ລາຍຮັບງົບປະມານປະຕິບັດໄດ້ທັງໝົດ 155,28 ຕື້ກີບ ທຽບໃສ່ແຜນການປີລື່ນຄາດໝາຍ 17,43% ໃນນັ້ນ, ລາຍຮັບສູນກາງປະຕິບັດໄດ້ 29,97 ຕື້ກີບ, ລາຍຮັບຮ່ວງຂອງແຂວງປະຕິບັດໄດ້ 1125,32 ຕື້ກີບ.
ການຈັດຕັ້ງປະຕິບັດ 14 ຕົວຊີ້ວັດ ຂອງຂະແໜງການສຶກສາ ແລະ ກິລາສາມາດບັນລຸໄດ້ທຸກຕົວຊີ້ວັດ, ປະກາດໂຮງຮຽນປອດສິ່ງເສບຕິດໄດ້ 849 ແຫ່ງ ເທົ່າກັບ 99,53% ຂອງຈໍານວນ ໂຮງຮຽນປະຖົມ ແລະ ມັດທະຍົມທັງໝົດ 853 ແຫ່ງ; ການຈັດຕັ້ງປະຕິບັດ 11 ຕົວຊີ້ວັດຂອງສາທາລະນະສຸກ ສາມາດບັນລຸໄດ້ 10 ຕົວຊີ້ວັດ, ຍັງບໍ່ທັນບັນລຸມີ 1 ຕົວຊີ້ວັດຄື: ອັດຕາການເກີດລູກມີແພດຊ່ວຍ, ສ້າງບ້ານສາທາລະນະສຸກແບບຢ່າງໄດ້ 661 ບ້ານ, ສາມາດປະກາດແຂວງເປັນແຂວງຍຸດຕິການຖ່າຍຊະ ຊາຍ.
ໃນປີ 2023 ທົ່ວແຂວງມີກໍາລັງແຮງງານທັງໝົດ 85.495 ຄົນ, ຜູ້ມີວຽກເຮັດງານທໍາຈໍານວນ 80.407 ຄົນ, ໃນນີ້ ກໍາລັງແຮງງານຂົງເຂດກະສີກໍາ ກວມເອົາ 49,4%, ຂົງເຂດອຸດສາຫະກໍາກວມເອົາ 21,3% ແລະ ຂົງເຂດບໍລິການ ກວມເອົາ 29,3%; ມີຜູ້ວ່າງງານກວມເອົາ 5% ຂອງກໍາລັງແຮງງານທັງໝົດ. ການສົ່ງເສີມລາວທ່ຽວລາວໃນປີ 2023 ມີນັກທ່ອງທ່ຽວເຂົ້າມາທ່ຽວຊົມແຂວງຫົວພັນ ທັງໝົດ 45 ພັນກວ່າເທື່ອຄົນ. ໃນ 3 ເດືອນຕົ້ນປີ 2024 ມີນັກທ່ອງທ່ອງມາທ່ຽວພາຍໃນແຂວງ 12.014 ເທື່ອຄົນ (ນັກທ່ອງທ່ຽວພາຍໃນ 5.730 ເທື່ອຄົນ, ຕ່າງປະເທດ 6.284 ເທື່ອຄົນ), ໄດ້ຈັດງານເປີດປີທ່ອງທ່ຽວລາວ ຕິດພັນກັບເທດສະການທ່ຽວຊົມດອກຄາຍປ່າ ແລະ ດອກສະກຸຣະ, ຈັດງານບຸນທ່ອງທ່ຽວວັດທະນະທຳຮ່ວມສອງແຂວງຫົວພັນ-ເຊິນລາ, ນອກຈາກນັ້ນຍັງມີຫຼາຍໆກິດຈຳກຳ ຕື່ມອີກ.
ທົ່ວແຂວງຫົວພັນ ມີ 10 ອົງຄະນະພັກເມືອງ ແລະ 2 ອົງຄະນະພັກກົມກອງ, ມີ 157 ຮາກຖານພັກ, ມີ 93 ຮາກຖານພັກຊີ້ນໍາຫຼາຍບ້ານ, ມີ 1.220 ໜ່ວຍພັກ, ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ໄດ້ 891 ໜ່ວຍ, ສະມາຊິກພັກທັງໝົດ 21.403 ສະຫາຍ, ຍິງ 5.176 ສະຫາຍ ເປັນສະມາຊິກພັກ ປະເພດແຂງ 16.462 ສະຫາຍ; ຍິງ 4.210 ສະຫາຍ, ສະມາຊິກພັກປະເພດກາງ 1.752 ສະຫາຍ, ຍິງ 321 ສະຫາຍ, ສະມາຊິກພັກອ່ອນ 17 ສະຫາຍ, ສະມາຊິກພັກບໍ່ໄດ້ປະເມີນມີ 3.172 ສະຫາຍ; ຍິງ 645 ສະຫາຍ.
ການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ ໄດ້ດໍາເນີນໄປຖືກທິດ, ຖືກຕ້ອງຕາມກົດລະບຽບພັກ, ຄຳແນະນຳຕ່າງໆທີ່ກຳນົດອອກ, ໄດ້ສຳເລັດການເຊື່ອມຊຶມ, ຜັນຂະຫຍາຍບັນດານິຕິກຳຕ່າງໆ ທີ່ກ່ຽວຂ້ອງ, ແຕ່ງຕັ້ງບັນດາອະນຸກຳມະການ ແລະ ຄະນະຮັບຜິດຊອບດ້ານຕ່າງໆ, ໄດ້ບົ່ງຕົວແຕ່ງຕັ້ງເພີ່ມເຕີມ ຄະນະບໍລິຫານງານພັກແຂວງ ສະໄໝທີ X ມີ 3 ສະຫາຍ, ຍິງ 1 ສະຫາຍ, ປະຕິບັດນະໂຍບາຍໃຫ້ຄະນະບໍລິຫານງານອອກພັກການຮັບອູດໜູນບຳນານມີ 1 ສະຫາຍ; ມາເຖິງປະຈຸບັນ ຄະນະບໍລິຫານງານພັກແຂວງ ມີ 34 ສະຫາຍ, ຍິງ 5 ສະຫາຍ, ໃນນີ້ຄະນະປະຈຳພັກແຂວງ 9 ສະຫາຍ, ຄະນະບໍລິຫານງານພັກເມືອງ 280 ສະຫາຍ, ຍິງ 22 ສະຫາຍ (ເພດຍິງທີ່ເປັນຄະນະປະຈໍາພັກເມືອງ ມີ 4 ສະຫາຍ). ທົ່ວແຂວງໄດ້ສໍາເລັດການດໍາເນີນກອງປະຊຸມໃຫຍ່ຂອງພັກຂັ້ນຮາກຖານ ມີ 41 ຮາກຖານພັກ, ໜ່ວຍພັກເອກະລາດ ມີ 119 ໜ່ວຍ, ໜ່ວຍພັກຂຶ້ນກັບຄະນະພັກຮາກຖານ 257 ໜ່ວຍ, ໜ່ວຍພັກຂັ້ນບ້ານ ມີ 678 ໜ່ວຍ (ສໍາເລັດ100% ). ສໍາລັບບັນດາອົງຄະນະພັກເມືອງ ແລະ ທຽບເທົ່າ, ບັນດາໜ່ວຍພັກພະແນກການ, ໜ່ວຍພັກອົງການຈັດຕັ້ງມະຫາຊົນ ແລະ ໜ່ວຍພັກອົງການຈັດຕັ້ງພັກຂັ້ນແຂວງ ລວມທັງການດຳເນີນກອງປະຊຸມໃຫຍ່ອົງຄະນະພັກແຂວງ ແມ່ນຈະໃຫ້ສຳເລັດຢູ່ໃນປີ 2025.
ໃນໂອກາດເຄື່ອນໄຫວເຮັດວຽກຢູ່ແຂວງຫົວພັນຄັ້ງນີ້ ສະຫາຍ ນາງ ສີໃສ ລືເດດມູນສອນ ພ້ອມດ້ວຍຄະນະ ຍັງໄດ້ພົບປະເຮັດວຽກງານວິຊາສະເພາະຮ່ວມກັບຄະນະຈັດຕັ້ງແຂວງ, ພົບປະໂອ້ລົມພະນັກງານການນຳຫຼັກແຫຼ່ງຂອງແຂວງ ແລະ ຂອງເມືອງຊໍາເໜືອ ພ້ອມກັບເຄື່ອນໄຫວຢ້ຽມຢາມຮາກຖານພັກ ແລະ ພື້ນຖານການຜະລິດຈຳນວນໜຶ່ງ.
ໃນນາມຕາງໜ້າໃຫ້ກົມການເມືອງສູນກາງພັກ (ກມສພ), ຄະນະເລຂາທິການສູນກາງພັກ (ຄລສພ) ແລະ ຄະນະຈັດຕັ້ງສູນກາງພັກ (ຄຈສພ), ສະຫາຍ ນາງ ສີໃສ ລືເດດມູນສອນ ໄດ້ມີຄໍາເຫັນໂອ້ລົມໃຫ້ທິດຊີ້ນຳ ເອົາໃຈໃສ່ເຮັດວຽກງານສຶກສາອົບຮົມການເມືອງ-ແນວຄິດທົ່ວປວງຊົນ ພ້ອມກັນຮັກສາມູນເຊື້ອຄວາມເປັນແບບຢ່າງທີ່ດີຂອງແຂວງຫົວພັນ ດິນແດນວິລະຊົນ ຖິ່ນກຳເນີດຂອງການປະຕິວັດລາວ, ມີຄວາມເປັນເອກະພາບສູງຕໍ່ແນວທາງນະໂຍບາຍຂອງພັກ, ມີສະຕິຕໍ່ລະບຽບກົດໝາຍຕ່າງໆ ສືບຕໍ່ພັດທະນາແຂວງຫົວພັນໃຫ້ຈະເລີນກ້າວໜ້າຢ່າງບໍ່ຢຸດຢັ້ງ. ສະຫາຍ ຍັງໄດ້ເນັ້ນຕື່ມບາງບັນຫາກ່ຽວກັບວຽກງານຈັດຕັ້ງ, ການກໍ່ສ້າງພັກ, ກໍ່ສ້າງ-ບໍາລຸງພະນັກງານ, ການປັບປຸງກົງຈັກການຈັດຕັ້ງ ແລະ ການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ. ການຂະຫຍາຍພັກຕ້ອງຖືຄຸນນະພາບເປັນກົກ, ຖືກຕ້ອງຕາມຂັ້ນຕອນທີ່ກຳນົດໄວ້ໃນກົດລະບຽບຂອງພັກ, ການບຳລຸງ- ກໍ່ສ້າງພະນັກງານ ຕ້ອງໃຫ້ຖືກຈຸດ, ຖືກກັບຄວາມຮູ້ຄວາມ ສາມາດ-ວິຊາສະເພາະ ແລະ ຖືກກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນແຕ່ລະໄລຍະ, ມີການຄຸ້ມຄອງນຳໃຊ້ ຈັດວາງ-ສັບຊ້ອນ ປະເມີນຕີລາຄາການປະຕິບັດໜ້າທີ່ວຽກງານຂອງພະນັກງານ ພ້ອມທັງປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ປະຕິບັດວິໄນຕໍ່ຜູ້ລະເມີດ ຫຼື ກະທຳຜິດລະບຽບກົດໝາຍຕ່າງໆ; ຊອກໃຫ້ເຫັນບຸກຄົນດີເດັ່ນເພື່ອກໍ່ສ້າງເປັນເປົ້າໝາຍສືບທອດປ່ຽນແທນ, ການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ ຕ້ອງເອົາໃຈໃສ່ຄົ້ນຄວ້າບຸກຄະລາກອນທີ່ເປັນເປົ້າໝາຍຈະປະກອບເຂົ້າໃນຄະນະພັກຊຸດໃໝ່, ໂຄງປະກອບຄະນະພັກຊຸດໃໝ່ຕ້ອງປະກອບມີຮຸ່ນອາວຸໂສ, ຮຸ່ນກາງ ແລະ ຮຸ່ນໜຸ່ມ, ມີເພດຍິງ ແລະ ຊົນເຜົ່າ, ການກະກຽມບຸກຄະລາກອນ ຕ້ອງຄົ້ນຄວ້າລະອຽດຖີ່ຖ້ວນ ແລະ ເປັນຄວາມລັບ, ການຄົ້ນຄວ້າຕົກລົງບັນຫາ ຕ້ອງມີຄວາມເປັນເອກະພາບສູງພາຍໃນໝູ່ຄະນະ ບໍ່ສາມາດຕັດສິນບັນຫາໂດຍລຳພັງຂອງບຸກຄົນໃດໜຶ່ງ; ພ້ອມນີ້ ກໍ່ກະກຽມດ້ານເນື້ອໃນ ແລະ ຂະບວນການໃຫ້ຖືກທິດຕາມຄຳສັ່ງແນະນໍາ ນິຕິກຳທີ່ກ່ຽວຂ້ອງ ທັງສອດຄ່ອງກັບສະພາບຈຸດພິເສດຂອງທ້ອງຖິ່ນ ຮັບປະກັນໃຫ້ແກ່ການກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກ ບັນລຸຜົນສຳເລັດຕາມລະດັບຄາດໝາຍ.
ແຫຼ່ງຂ່າວ: ແຂວງຫົວພັນ
ພາບ: ນັກຂ່າວແຂວງຫົວພັນ
