ວັນທີ 30 ກັນຍາ 2024 ນີ້ ທ່ານ ນາງ ສີໄສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ພ້ອມດ້ວຍຄະນະ ໄດ້ໂອ້
ລົມ ອົງການປົກຄອງແຂວງບໍລິຄຳໄຊ ຢູ່ຫ້ອງປະຊຸມຫ້ອງວ່າການແຂວງ, ໂດຍການຕ້ອນຮັບຂອງ ທ່ານ ສອນທະນູ ທຳມະວົງ ກຳ ມະການສູນກາງພັກ, ເລຂາພັກແຂວງ, ເຈົ້າແຂວງບໍລິຄຳໄຊ ພ້ອມ ດ້ວຍການນຳຂອງແຂວງ, ຫົວໜ້າພະແນກການອ້ອມຂ້າງແຂວງເຂົ້າຮ່ວມ.
ໃນໂອກາດດັ່ງກ່າວທ່ານ ສອນທະນູ ທຳມະວົງ ເຈົ້າແຂວງບໍລິຄຳໄຊ ໄດ້ລາຍງານຫຍໍ້ກ່ຽວກັບວຽກງານການພັດທະນາເສດ ຖະກິດສັງຄົມຂອງແຂວງ ໃຫ້ທ່ານປະທານໄດ້ຮັບຮູ້. ຈາກນັ້ນ ບັນດາຄະນະນຳຂອງແຂວງ ກໍໄດ້ມີຄຳເຫັນໃນການໄກ້ໄຂໄພພິບັດນ້ຳຖ້ວມໃນເມືອງທ່າພະບາດ ແລະ ເມືອງປາກຊັນ ໃຫ້ປະທານໃດ້ຮັບຮູ້ຕື່ມ ເພື່ອໄດ້ມີວິທີແກ້ໄຂໃນການຟື້ນຟູຊິວິດການເປັນຢູ່ຂອງປະຊາຊົນທີ່ຖຶກຜົນກະທົບໃນປະຈຸບັນ. ພ້ອມນີ້, ທ່ານ ນາງ ສີໃສ ລືເດດມູນສອນ ກໍໄດ້ເນັ້ນໃຫ້ອົງຄະນະພັກແຂວງບໍລິຄຳໄຊ ເພີ່ມທະວີເອົາໃຈໃສ່ຕໍ່ວຽກງານກໍ່ສ້າງພັກ-ພະນັກງານ ແລະ ການ ກະກຽມກອງປະຊຸມໃຫຍ່ 3 ຂັ້ນ ຂອງຄະນະພັກແຕ່ລະຂັ້ນ, ຄົ້ນຄວ້າ, ສະຫຼຸບຕີລາຄາການຈັດຕັ້ງປະຕິບັດກົດລະບຽບຂອງພັກ ສະໄໝທີ XI ຍັງມີບັນຫາໃດທີ່ຍັງບໍ່ທັນຈະແຈ້ງ ແລະ ຄວນປັບປຸງໃນກົດລະບຽບພັກ ສະໄໝທີ XII, ເອົາໃຈໃສ່ເຊື່ອມຊຶມຄໍາສັ່ງເລກທີ 411/ຄລສພ, ຄໍາແນະນຳເລກທີ 211/ຄຈສພ ແລະ ແຈ້ງການຂອງຄະນະຈັດຕັ້ງສູນກາງພັກ ເລກທີ 99/ຄຈສພ ກ່ຽວກັບການກະກຽມ ແລະ ດໍາເນີນກອງປະຊຸມໃຫຍ່ອົງຄະນະພັກເເຂວງ ຢ່າງລະອຽດ ແລະ ທົ່ວເຖິງ ພ້ອມທັງລາຍງານໄປຍັງຄະນະຈັດຕັ້ງສູນກາງພັກ ເພື່ອຕິດຕາມຮ່ວມກັນ; ເອົາໃຈໃສ່ຕິດຕາມແກ້ໄຂບັນຫາເສດຖະກິດ-ການເງິນ ດ້ວຍການວາງກົນໄກ, ລະບຽບການຕ່າງໆຢ່າງເໝາະສົມ, ຖືເອົາວຽກງານການສຶກສາອົບຮົມການເມືອງ-ແນວຄິດ ເປັນພື້ນຖານ ເພື່ອໃຫ້ພະນັກງານ, ທະຫານ, ຕໍາຫຼວດ ປະກອບສ່ວນປະຕິບັດໜ້າທີ່ໄດ້ດີຂຶ້ນ ໂດຍບໍ່ສວຍໃຊ້ບັນຫາດັ່ງກ່າວ ເປັນຊ່ອງວ່າງໃນການຫຼີກເວັ້ນການປະຕິບັດວຽກງານ. ພ້ອມນີ້, ການປະຕິບັດ 2 ວາລະແຫ່ງຊາດ ຍັງເປັນວຽກໜຶ່ງທີ່ສໍາຄັນ.
ຂ່າວ-ພາບ: ຄຳຟອງ
