ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ພົບປະເຮັດວຽກກັບ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ

ໂດຍອີງຕາມການເຊື້້ອເຊີນຂອງ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ແລະ ປະຕິບັດຕາມແຜນການຮ່ວມມື ລະຫວ່າງ ສອງພັກ ລາວ-ຈີນ, ໃນວັນທີ 16 ກັນຍາ 2020 ສະຫາຍ ນາງ ສູນທອນ ໄຊຍະຈັກ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ພົບປະກັບ ສະຫາຍ ຊົ້ງທາວ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ທີ່ ນະຄອນຄຸນມິງ ແຂວງຢູນນານ, ສປ ຈີນ, ເຊິ່ງເປັນການພົບປະກັນຄັ້ງທຳ ອິດ ລະຫວ່າງຫົວໜ້າ ຄຕພ ລາວ-ຈີນ ພາຍຫຼັງເກີດການລະບາດຂອງພະຍາດໂຄວິດ-19 ເປັນຕົ້ນມາ.

ສອງຝ່າຍໄດ້ແລກປ່ຽນຄຳຄິດເຫັນ ແລະ ຕີລາຄາການພົວພັນຮ່ວມມື ລະຫວ່າງ ສອງພັກ ກໍຄື ການຮ່ວມມືໃນຂົງເຂດຕ່າງໆຂອງສອງຝ່າຍໃນໄລຍະມໍ່ໆມານີ້, ພ້ອມທັງແຈ້ງໃຫ້ກັນຊາບ ກ່ຽວກັບການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຢູ່ແຕ່ລະປະເທດ.

ໃນການພົບປະຄັ້ງນີ້, ສະຫາຍ ນາງ ສູນທອນ ໄຊຍະຈັກ ໄດ້ສະແດງຄວາມດີໃຈທີ່ໄດ້ນໍາພາຄະນະຜູ້ແທນສາຍພັກຄະນະທຳອິດ ກໍຄື ຄະນະຜູ້ແທນຂອງ ຄະນະພົວພັນຕ່າງປະເທດສູນກາງພັກ ປປ ລາວ ໄປຢ້ຽມຢາມ ແລະ ເຮັດວຽກກັບຝ່າຍຈີນ ໃນໄລຍະທີ່ທັງສອງຝ່າຍພວມມີວິຖີຊີ ວິດແບບໃໝ່ ໃນທ່າມກາງການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂພະຍາດໂຄວິດ-19. ຝ່າຍລາວ ຕີລາຄາສູງຕໍ່ບັນດາຜົນສໍາເລັດອັນຮອບດ້ານ, ພົ້ນເດັ່ນ ຂອງ ສປ ຈີນ ທີ່ຍາດມາໄດ້ ພາຍໃຕ້ການນໍາພາອັນເດັດດ່ຽວ ຂອງ ພັກກອມມູນິດຈີນ ທີ່ມີ ສະຫາຍ ສີຈິ້ນຜິງ ເປັນແກນກາງ ໂດຍສະເພາະແມ່ນຜົນສຳເລັດຂອງ ສປ ຈີນ ໃນການປ້ອງ ກັນ, ຄວບຄຸມ, ສະກັດກັ້ນ ແລະ ແກ້ໄຂພະຍາດໂຄວິດ-19 ໄປຄວບຄູ່ກັບການຟື້ນຟູເສດຖະກິດຂອງປະເທດ; ສະແດງຄວາມຂອບໃຈຢ່າງຈິງໃຈ ຕໍ່ ພັກ, ລັດຖະບານ ແລະ ປະຊາ ຊົນຈີນ ທີ່ໄດ້ໃຫ້ການຊ່ວຍເຫຼືອທີ່ສຳຄັນ ແລະ ທັນການ ໃຫ້ແກ່ການສະກັດກັ້ນຄວບຄຸມພະຍາດໂຄວິດ-19 ແລະ ການພັດທະນາເສດຖະກິດ-ສັງຄົມຂອງລາວ; ຝ່າຍລາວ ຢືນຢັນຄືນຈະຮ່ວມກັບຝ່າຍຈີນໃນການຈັດຕັ້ງປະຕິບັດ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ ໃຫ້ປະກົດເປັນຮູບປະທຳ ນໍາເອົາຜົນປະໂຫຍດຕົວຈິງມາສູ່ປະຊາ ຊົນສອງປະເທດ; ຍິນດີຮ່ວມກັບຝ່າຍຈີນ ໃນການເພີ່ມທະວີການພົວພັນຮ່ວມມື ແລະ ແລກປ່ຽນບົດຮຽນການຄຸ້ມຄອງພັກ-ບໍລິຫານປະເທດ, ໂດຍສະເພາະແມ່ນບັນດາບົດຮຽນ ແລະ ແນວຄິດສໍາຄັນ ຂອງ ພັກ-ລັດຖະ ບານຈີນ ທີ່ສັງລວມໄວ້ໃນ ປື້ມ “ສີຈິ້ນຜິງ ວ່າດ້ວຍການປົກຄອງປະເທດ-ບໍລິຫານລັດ” ເຫຼັ້ມ 3; ສືບຕໍ່ຮ່ວມກັນຊຸກຍູ້ການຮ່ວມມືໃນໂຄງການໃຫຍ່ໆຂອງສອງຝ່າຍ ໂດຍສະເພາະແມ່ນການສ້າງເສັ້ນທາງລົດໄຟ ລາວ-ຈີນ, ແລວທາງເສດຖະກິດ ລາວ-ຈີນ; ຕີລາຄາສູງບົດຮຽນ ແລະ ຜົນສຳເລັດທີ່ໃຫຍ່ຫຼວງ ໃນການແກ້ໄຂຄວາມທຸກຍາກ ຂອງ ສປ ຈີນ ໃນໄລຍະຜ່ານມາ; ຝ່າຍລາວ ມີຄວາມເປັນເອກະພາບກັບຝ່າຍຈີນ ໃນການຕີລາຄາກ່ຽວກັບບັນຫາສາກົນ ແລະ ພາກພື້ນທີ່ທັງສອງຝ່າຍສົນໃຈນຳກັນ ແລະ ຈະສືບຕໍ່ເພີ່ມທະວີການປະສານງານ ເພື່ອປະກອບ ສ່ວນເຂົ້າໃນພາລະກິດການປົກປັກຮັກສາສັນຕິພາບ, ມິດຕະ ພາບ ແລະ ການຮ່ວມມື ໃນພາກພື້ນ ແລະ ສາກົນ.

ໃນການພົບປະ, ສະຫາຍ ຊົ້ງທາວ ໄດ້ສະແດງຄວາມຍິນດີຕ້ອນຮັບຕໍ່ ສະຫາຍ ນາງ ສູນທອນ ໄຊຍະຈັກ ພ້ອມດ້ວຍຄະນະ ທີ່ເດີນທາງໄປຢ້ຽມຢາມ ແລະ ພົບປະເຮັດວຽກຮ່ວມກັນໃນຄັ້ງນີ້ ແລະ ເນັ້ນໜັກວ່າ ນັບແຕ່ປີຜ່ານມາທີ່ ສະຫາຍເລຂາທິການໃຫຍ່ ສີຈິ້ນຜິງ ກັບ ສະຫາຍເລຂາ ທິການໃຫຍ່ ບຸນຍັງ ວໍລະຈິດ ໄດ້ລົງນາມແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກຳ ລາວ-ຈີນ ເປັນຕົ້ນມາ, ການພົວພັນຮ່ວມມືໃນຂົງເຂດຕ່າງໆຂອງສອງຝ່າຍ ໄດ້ຮັບການເສີມຂະຫຍາຍ ນັບມື້ນັບເລິກເຊິ່ງ ແລະ ກວ້າງຂວາງ; ນັບແຕ່ເກີດການແຜ່ລະບາດຂອງເຊື້ອພະຍາດໂຄວິດ-19 ເປັນຕົ້ນມາ, ສະຫາຍເລຂາທິການໃຫຍ່ ສີຈິ້ນຜິງ ກັບ ສະຫາຍເລຂາທິການໃຫຍ່ ບຸນຍັງ ວໍລະຈິດ ໄດ້ຮັັກສາການປະສານງານຢ່າງສະໜິດແໜ້ນ ທັງໄດ້ຊີ້ນໍາຕໍ່ການຮ່ວມມືຕ້ານໂຄວິດ-19 ເຮັດໃຫ້ສອງປະເທດໄດ້ມີຜົນສຳເລັດທີ່ສຳ ຄັນ; ສອງຝ່າຍ ໄດ້ພ້ອມກັນຕັ້ງໜ້າຈັດຕັ້ງຜັນຂະຫຍາຍຂໍ້ຕົກລົງ ລະຫວ່າງ ການນໍາສູງສຸດ ຂອງ ສອງພັກ, ສອງລັດ ລາວ-ຈີນ ໂດຍສະເພາະໃນຂົງເຂດການເມືອງ, ເສດ ຖະກິດ, ຄວາມໝັ້ນຄົງ, ການພົວພັນດ້ານວັດທະນະທຳສັງຄົມ, ການຮັກສາສິ່ງແວດລ້ອມ ແລະ ລະບົບນິເວດ ກໍຄື ການຮ່ວມມືດ້ານອື່ນໆ ແລະ ສະແດງຄວາມຍິນດີຈະສືບຕໍ່ຮ່ວມກັບຝ່າຍລາວ ລົງເລິກການແລກປ່ຽນບົດຮຽນດ້ານການປົກຄອງປະເທດ-ບໍລິຫານລັດ, ຊຸກຍູ້ການຮ່ວມມືໃນໂຄງການໃຫຍ່ທີ່ສຳຄັນ ເຊັ່ນ: ການສ້າງເສັ້ນທາງລົດໄຟ ລາວ-ຈີນ, ການສ້າງແລວເສດຖະກິດ ລາວ-ຈີນ ແລະ ໂຄງການອື່ນໆ, ສ້າງຄູ່ຮ່ວມຊາຕາກຳດ້ານສຸຂາອະນາໄມ ລະ ຫວ່າງ ລາວ-ຈີນ ເພື່ອເປັນການປະກອບສ່ວນນໍາເອົາຜົນປະໂຫຍດຕົວຈິງໃຫ້ແກ່ປະຊາຊົນສອງປະເທດ; ຝ່າຍຈີນ ສະແດງຄວາມຂອບໃຈຕໍ່ຝ່າຍລາວທີ່ໄດ້ມີການສະໜັບ ສະໜູນ ແລະ ປະສານສົມທົບຢ່າງແໜ້ນແຟ້ນ ໃນເວທີພາກພື້ນ ແລະ ສາກົນ ເພື່ອພາລະກິດສັນຕິພາບ, ມິດຕະ ພາບ ແລະ ການຮ່ວມມື.

ໃນໂອກາດດັ່ງກ່າວ, ສະຫາຍ ຊົ້ງທາວ ຍັງໄດ້ມອບປຶ້ມ ແລະ ນໍາສະເໜີ ກ່ຽວກັບ ເນື້ອໃນສຳຄັນ ຂອງ ປຶ້ມ “ສີຈິ້ນຜິງ ວ່າດ້ວຍການປົກຄອງປະເທດ-ບໍລິຫານລັດ” ເຫຼັ້ມ 3 ແລະ ໄດ້ແຈ້ງໃຫ້ຝ່າຍລາວຊາບ ກ່ຽວກັບຜົນສຳເລັດທີ່ສຳຄັນໃນການແກ້ໄຂຄວາມທຸກຍາກ ຂອງ ສປ ຈີນ, ພ້ອມທັງສະແດງຄວາມຊົມເຊີຍ ແລະ ອວຍພອນໃຫ້ ພັກປະຊາ ຊົນປະຕິວັດລາວ ຈົ່ງປະສົບຜົນສໍາເລັດໃນການກະກຽມ ແລະ ກ້າວໄປເຖິງການເປີດກອງປະຊຸມໃຫຍ່ ຄັ້ງທີ XI ຂອງ ພັກ ປປ ລາວ ໃນຕໍ່ໜ້າ.

Cr: ຄະນະພົວພັນຕ່າງປະເທດສູນກາງພັກ ປປ ລາວ