ໃນວັນທີ 7 ກໍລະກົດ 2021 ນີ້, ທ່ານ ທອງສະຫວັນ ພົມ​ວິຫານ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ພົບປະຜ່ານວີດີໂອທາງໄກ ກັບ ທ່ານ ປຣາກ ໂຊຄົນ ກໍາມະການກົມການເມືອງສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ກໍາປູເຈຍ.
ໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມປິຕິຍິນດີຕໍ່ການພົບປະລະຫວ່າງສອງຝ່າຍ, ພ້ອມທັງໄດ້ແຈ້ງສະພາບການພົ້ນເດັ່ນພາຍໃນປະເທດ ກໍຄື ຜົນສຳ ເລັດເບື້ອງຕົ້ນ ໃນການຕ້ານການແຜ່ລະບາດຂອງພະຍາດໂຄວິດ-19 ຮອບສອງ ຢູ່ ສປປ ລາວໃຫ້ຝ່າຍກຳປູເຈຍຊາບ. ນອກນັ້ນ, ຍັງໄດ້ຕີລາຄາສູງຕໍ່ສາຍພົວພັນມິດຕະ ພາບອັນເປັນມູນເຊື້ອ ຄວາມສາມັກຄີຖານບ້ານໃກ້ເຮືອນຄຽງທີ່ດີ, ບ້ານອ້າຍເມືອງນ້ອງ, ບ້ານແກ່ວເມືອງດອງ ແລະ ການເປັນຄູ່ຮ່ວມຍຸດທະສາດຮອບດ້ານ ແລະ ໝັ້ນຄົງຍາວນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກໍາປູເຈຍ ກໍຄື ລະຫວ່າງສອງຄະນະພົວພັນຕ່າງປະເທດສູນກາງພັກລາວ-ກໍາປູເຈຍ ຕະຫລອດໄລຍະຜ່ານມາ. ພ້ອມກັນນັ້ນ, ເຖິງຈະມີຄວາມຫຍຸ້ງຍາກໃນການໄປມາຫາສູ່ເຊິ່ງກັນ ແລະ ກັນ ຍ້ອນການແຜ່ລະບາດຂອງພະຍາດໂຄວິດ-19 ແຕ່ສອງຝ່າຍ ຍັງສືບຕໍ່ຮັກສາການຕິດຕໍ່ພົວພັນ ໂດຍລະບົບສື່ສານທາງໄກ ເພື່ອສືບຕໍ່ສ້າງຄວາມເຂົ້າອົກເຂົ້າໃຈ ແລະ ເສີມຂະຫຍາຍມູນເຊື້ອສາຍພົວພັນມິດຕະພາບທີ່ດີຮ່ວມກັນ.
ພິເສດ ທ່ານ ທອງສະຫວັນ ພົມວິຫານ ໄດ້ຕາງໜ້າຄະນະບໍລິຫານງານສູນກາງພັກ ປປ ລາວ ສະແດງຄວາມຊົມເຊີຍຢ່າງສຸດອົກສຸດໃຈ ເນື່ອງໃນໂອກາດວັນສ້າງຕັ້ງ ພັກປະຊາ ຊົນກໍາປູເຈຍ ຄົບຮອບ 70 ປີ ກໍຄື ວັນສ້າງຕັ້ງສາຍພົວພັນການທູດ ລາວ-ກຳປູເຈຍ ຄົບຮອບ 65 ປີ, ຕີລາຄາສູງຕໍ່ບັນດາຜົນສໍາເລັດອັນພົ້ນເດັ່ນທີ່ພັກ, ລັດ ແລະ ປະຊາຊົນກໍາປູເຈຍ ຍາດມາໄດ້ໃນການປົກປັກຮັກສາ, ສ້າງສາ ແລະ ພັດທະນາປະເທດຊາດຂອງຕົນ, ເຊື່ອໝັ້ນວ່າ ພາຍໃຕ້ການຊີ້ນຳ-ນຳພາອັນເຂັ້ມແຂງຂອງພັກປະຊາຊົນກຳປູເຈຍ, ລັດຖະບານ ແລະ ປະຊາ ຊົນກຳປູເຈຍ ຈະສາມາດສືບຕໍ່ຍາດໄດ້ໄຊຊະນະໃໝ່ໃຫຍ່ຫລວງກວ່າເກົ່າ ໃນການສ້າງສາ ແລະ ພັດທະນາປະເທດຊາດ ໃຫ້ກ້າວໄປສູ່ຄວາມຈະເລີນວັດທະນາ.
ທ່ານ ປຣາກ ໂຊຄົນ ກໍໄດ້ສະແດງຄວາມຂອບໃຈຕໍ່ການແຈ້ງສະພາບພົ້ນເດັ່ນພາຍໃນຂອງ ສປປ ລາວ, ຕີລາຄາສູງຕໍ່ຜົນສໍາເລັດຂອງພັກ, ລັດ ແລະ ປະຊາຊົນລາວໃນການຄວບຄຸມການແຜ່ລະບາດຂອງພະຍາດໂຄວິດ-19; ຊົມເຊີຍ ທ່ານ ທອງສະຫວັນ ພົມວິຫານ ທີ່ໄດ້ຮັບເລືອກຕັ້ງເປັນ ກໍາມະການສູນກາງພັກ ສະໄໝທີ XI ແລະ ໄດ້ຮັບການແຕ່ງຕັ້ງ ເປັນຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ຄົນໃໝ່. ພ້ອມນີ້ ກໍໄດ້ແຈ້ງໃຫ້ຝ່າຍລາວຊາບ ກ່ຽວກັບສະພາບການພົ້ນເດັ່ນພາຍໃນພັກ, ພາຍໃນປະເທດກໍາປູເຈຍ; ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອທີ່ດີງາມ ລະຫວ່າງ 2 ພັກ, 2 ລັດ ແລະ ປະຊາຊົນ 2 ຊາດ ກໍຄື ລະຫວ່າງ 2 ຄະນະພົວພັນຕ່າງປະເທດສູນກາງພັກ ກໍາປູເຈຍ-ລາວ ໃນໄລຍະຜ່ານມາ ກໍຄື ປະຈຸບັນ.
ໃນການພົບປະທາງໄກຄັ້ງນີ້, ໄດ້ຮັບຜົນສຳເລັດຢ່າງຈົບງາມ, ສອງຝ່າຍ ໄດ້ປຶກສາຫາລື ແລະ ມີຄວາມເປັນເອກະພາບກ່ຽວກັບ ທິດທາງແຜນການການຮ່ວມມືໃນຕໍ່ໜ້າລະຫວ່າງ ສອງພັກ ກໍຄື ສອງຄະນະພົວພັນຕ່າງປະເທດສູນກາງພັກ ປປ ລາວ ແລະ ພັກປະຊາຊົນກຳປູເຈຍ ໃຫ້ກ້າວເຂົ້າສູ່ລວງເລິກຢ່າງຕໍ່ເນື່ອງ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ກໍາປູເຈຍ.
ພາບ: ຂັນໄຊ
Loading...