ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຫົວໜ້າຄະນະໂຄສະນາອົບຮົມ ແຂວງຫົວພັນ ສະແດງຄວາມຮູ້ສຶກໃນໂອກາດ ວັນສ້າງຕັ້ງພັກ ຄົບຮອບ 65 ປີ

ທ່ານ ເພີດ ມາປັນຍາ ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງຫົວພັນ ໄດ້ສະແດງຄວາມຮູ້ສຶກຂອງຕົນໃນໂອກາດວັນສ້າງຕັ້ງພັກປະຊາຊົນປະຕິວັດລາວຄົບຮອບ 65 ປີວ່າ: ພັກປະຊາຊົນປະຕິວັດລາວແມ່ນອົງການ ການເມືອງສູງສຸດໃນການຊີ້ນໍາ-ນໍາພາປວງຊົນລາວທັງຊາດ, ເອົາໃຈໃສ່ໃນການປົກປັກຮັກສາ ແລະ ສ້າງສາພັດທະນາປະເທດຊາດ, ໜ້າທີ່ການເມືອງຂອງພັກແມ່ນ ນໍາພາປະຊາຊົນຕໍ່ສູ້ກັບສັດຕູຜູ້ຮຸກຮານ, ຍາດເອົາອຳນາດການປົກຄອງໃນທົ່ວປະເທດຈາກກຳມືຂອງພວກຟາດຊິດຍີ່ປຸ່ນ ແລະ ພວກລ່າເມືອງຂື້ນຝຣັ່ງ, ປະກາດຄວາມເປັນເອກະລາດຂອງປະເທດລາວຕໍ່ຊາວໂລກເມື່ອວັນທີ 12 ຕຸລາ 1945.
ມາຮອດປີ 1955 ຕໍ່ໜ້າຄວາມຮຽກຮ້ອງຕ້ອງການໃໝ່ຂອງການປະຕິວັດ ແລະ ໂດຍປະຕິບັດຕາມມະຕິຂອງກອງປະຊຸມໃຫຍ່ຄັ້ງທີ 2 ຂອງພັກກອມມູນິດອິນດູຈີນ, ບັນດານັກກອມມູນິດລາວ, ພາຍຫຼັງທີ່ໄດ້ກະກຽມມາໄດ້ໄລຍະໜື່ງ ກໍ່ໄດ້ເປີດກອງປະຊຸມໃຫຍ່ຜູ້ແທນທົ່ວປະເທດເພື່ອສ້າງຕັ້ງພັກປະຊາຊົນປະຕິວັດລາວຂື້ນໃນວັນທີ 22 ມີນາ 1955.
ພັກປະຊາຊົນປະຕິວັດລາວ ພາຍຫຼັງທີ່ໄດ້ຮັບການສ້າງຕັ້ງຂື້ນ, ກໍ່ຕ້ອງໄດ້ປະເຊີນໜ້າກັບຈັກກະພັດອາເມລິກາເຊິ່ງເປັນຈັກກະພັດໂຕໃໝ່, ແຕ່ພັກເຮົາກໍ່ໄດ້ແບກຫາບເອົາພາລະກຳອັນໜັກໜ່ວງເພື່ອຊີ້ນໍາໆພາປວງຊົນລາວທັງຊາດຕໍ່ສູ້ຕ້ານການຮຸກຮານຂອງຈັກກະພັດ ແລະ ລູກມືປະຕິການຂາຍຊາດຢ່າງດຸເດືອດຂ້ຽວຂາດຈົນກ້າວໄປເຖິງການປົດປ່ອຍ ແລະ ສະຖາປະນາເປັນປະເທດຊາດຢ່າງສົມບູນໃນວັນທີ 2 ທັນວາ 1975.
ນັບແຕ່ປີ 1975 ເປັນຕົ້ນມາ, ພັກປະຊາຊົນປະຕິວັດລາວໄດ້ກ້າວເຂົ້າສູ່ໄລຍະໃໝ່ຂອງການປະຕິວັດແນວທາງຢ່າງຮອບ ດ້ານ ແລະ ເປີດປະຕູສູ່ໂລກພາຍນອກເປັນຕົ້ນແມ່ນດ້ານເສດຖະກິດໄດ້ເຊື່ອມໂຍງກັບເສດຖະກິດຂອງພາກພື້ນ ແລະ ສາກົນ.


ປະຈຸບັນນີ້, ພັກເຮົາໄດ້ສຸມໃສ່ວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ ແລະ ຕິດພັນກັບວຽກງານ 3 ສ້າງເປັນວຽກສຳຄັນ.
ສະເພາະຢູ່ແຂວງຫົວພັນ, ຄະນະພັກແຕ່ລະຂັ້ນກໍ່ໄດ້ເອົາໃຈໃສ່ສຶກສາອົບຮົມການເມືອງແນວຄິດ ແລະ ຊີ້ນໍານໍາພາປະຊາຊົນບັນດາເຜົ່າ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ, ແຜນພັດທະນາເສດຖະກິດສັງຄົມ 5 ປີຄັ້ງທີ 8 ເຫັນວ່າ: ສະພາບທາງດ້ານການເມືອງໄດ້ມີສະຖຽນລະພາບ, ສັງຄົມມີຄວາມສະຫງົບ, ເສດຖະກິດໄດ້ຮັບການພັດທະນາຫຼາຍຂື້ນເປັນຕົ້ນແມ່ນ: ດ້ານກະສິກຳ ໄດ້ຊຸກຍູ້ສົ່ງເສີມການປູກຕົ້ນໄມ້ອຸດສາຫະກຳ ການຜະລິດພືດຜັກ ແລະ ການລ້ຽງສັດຕາມເງື່ອນໄຂທ່າແຮງຂອງແຂວງ; ດ້ານພະລັງງານ ແລະ ບໍ່ແຮ່, ກໍ່ໄດ້ມີການຂະຫຍາຍຕົວຢ່າງຕໍ່ເນື່ອງເຮັດໃຫ້ປະຊາຊົນໃນທົ່ວແຂວງໄດ້ຊົມໃຊ້ໄຟຟ້າເປັນຈໍານວນຫຼາຍ; ດ້ານອຸດສາຫະກຳ ແລະ ການຄ້າ, ບັນດາໂຮງຈັກ, ໂຮງງານ, ການຕະຫຼາດໄດ້ຮັບການພັດທະນານັບມື້ເພີ່ມຂື້ນ; ດ້ານການຄົມມະນາຄົມຂົນສົ່ງ, ກໍ່ໄດ້ຮັບການຂະຫຍາຍຕົວ, ໂດຍສະເພາະແມ່ນລະບົບເສັ້ນທາງທີ່ສາມາດຖ່ຽວໄດ້ 2 ລະດູກວມ 47%; ດ້ານໄປສະນີໂທລະຄົມມະນາຄົມ ແລະ ການສື່ສານ, ໄດ້ເອົາໃຈໃສ່ພັດທະນາ, ຂະຫຍາຍເຄືອຂ່າຍສັນຍານລະບົບຕ່າງໆໃຫ້ທ່ວງທັນກັບຄວາມຕ້ອງການຂອງສັງຄົມ; ດ້ານວັດທະນະທໍາ-ສັງຄົມ, ໄດ້ຂະຫຍາຍຕາໜ່າງສາທາລະນະສຸກ, ການສຶກສາຊັ້ນຕ່າງໆໄປທົ່ວທຸກຮາກຖານທ້ອງຖິ່ນເຮັດໃຫ້ອັດຕາເຂົ້າຮຽນຂອງເດັກໃນເກນອາຍຸແຕ່ລະຊັ້ນຮຽນ ໄດ້ເຂົ້າຮຽນຕາມລະດັບຄາດໝາຍ, ປະຊາຊົນບັນດາເຜົ່າ ກໍ່ໄດ້ຮັບໃຊ້ບໍລິການສາທາລະນະສຸກຢ່າງທົ່ວເຖິງ, ໂດຍສະເພາະແມ່ນແມ່ຍິງ ແລະ ເດັກນ້ອຍ; ວຽກງານແຮງງານສະຫວັດດີການສັງຄົມໄດ້ພັດທະນາສີມືແຮງງານ, ຈັດຫາວຽກເຮັດງານທຳໃຫ້ແຮງງານພາຍໃນ ກໍ່ໄດ້ເພີ່ມຂື້ນ, ສາມາດຄຸ້ມຄອງແຮງງານໄດ້ຢ່າງຖືກຕ້ອງຕາມລະບຽບກົດໝາຍ, ປະຕິບັດນະໂຍບາຍຕໍ່ຜູ້ທີ່ມີຄຸນງາມຄວາມດີຕໍ່ປະເທດຊາດໄດ້ຈໍານວນໜື່ງ; ວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ໄດ້ນໍາເອົາມູນເຊື້ອ, ແນວທາງນະໂຍບາຍຂອງພັກ-ລັດ ແລະ ເຫດການທີ່ພົ້ນເດັ່ນຕ່າງໆທັງພາຍໃນ ແລະ ຕ່າງປະເທດກະຈ່າຍອອກໃຫ້ສັງຄົມຮັບຟັງຮັບຊົມ; ວຽກງານຍຸຕິທຳ, ກໍ່ໄດ້ລົງໂຄສະນາເຜີຍແຜ່ກົດໝາຍຕ່າງໆຢ່າງທົ່ວເຖິງ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ, ແມ່ນໄດ້ສຸມໃສ່ຫັນລົງຮາກຖານການເມືອງເຮັດໃຫ້ພື້ນຖານມີຄວາມສະຫງົບຢ່າງໜັກແໜ້ນ.
ປະຈຸບັນນີ້, ແຂວງຫົວພັນແມ່ນພວມກະກຽມສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວຄົບຮອບ 65 ປີ, ໂດຍໄດ້ແຕ່ງຕັ້ງຄະນະຮັບຜິດຊອບຂັ້ນແຂວງ, ຂັ້ນເມືອງລົງໄປປາຖະກະຖາເຜີຍແຜ່ເອກະສານວັນສ້າງຕັ້ງພັກ ແລະ ເອກະສານສຳຄັນຈຳນວນໜື່ງເພື່ອເຊື່ອມຊື່ມໃຫ້ສະມາຊິກພັກ, ປະຊາຊົນບັນດາເຜົ່າ ໄດ້ຮັບຮູ້, ເຂົ້າໃຈ ແລະ ເຫັນຄວາມສຳຄັນເຖິງການກຳເນີດ-ເຕີບໃຫຍ່ຂະຫຍາຍຕົວ ແລະ ຜົນງານໃນການຊີ້ນໍາ ນຳພາຂອງພັກຕະຫຼອດໄລຍະເວລາ 65 ປີ, ພ້ອມທັງ ໃຫ້ຮັບຮູ້ເຖິງມູນເຊື້ອຄວາມສາມັກຄີຂອງປະຊາຊົນລາວໃນທົ່ວປະເທດ ເວົ້າລວມ, ເວົ້າສະເພາະ ແຂວງຫົວພັນ. ຄາດວ່າການດຳເນີນປາຖະກະຖາຈະໃຫ້ສຳເລັດໃນທຸກໆເມືອງກ່ອນວັນທີ 22 ມີນາ 2020 ນີ້; ສ່ວນງານໂຮງຊຸມນຸມມິດຕິງຢູ່ຂັ້ນແຂວງນັ້ນ ແມ່ນຈະໄດ້ລໍຖ້າໃຫ້ການສະເຫຼີມສະຫຼອງລະດັບຊາດສຳເລັດແລ້ວສາກ່ອນ ຈຶ່ງຈະໄດ້ຈັດຕັ້ງປະຕິບັດ.
ໂດຍ: ນິດຖະໜອມ