ໃນວັນທີ 14 ກັນຍາ 2023 ທ່ານ ພັນໂທ ທອງຄູນ ສຸວັນນະເພັດ ຫົວໜ້າພະແນກຕໍາຫຼວດຈະລະຈອນ ກອງບັນຊາການປ້ອງກັນຄວາມສະຫງົບ ແຂວງອັດຕະປື ໄດ້ຊີ້ແຈ້ງຕໍ່ສັງຄົມຜ່ານສື່ມວນຊົນຂອງແຂວງ ກ່ຽວກັບການຕິດຕັ້ງ ແລະ ນໍາໃຊ້ລະບົບໄຟອໍານາດ ຫຼື ໄຟແດງ ຢູ່ພາຍໃນເທດສະບານແຂວງອັດຕະປື ວ່າ: ການຕິດຕັ້ງລະບົບໄຟອໍານາດ ຂອງແຂວງອັດຕະປື ກໍ່ຍ້ອນຄະນະນໍາຂອງແຂວງເຫັນໄດ້ຄວາມໝາຍຄວາມສໍາຄັນໃນການນໍາໃຊ້ລະບົບໄຟອໍານາດ ຫຼື ໄຟແດງ ເພື່ອຫຼຸດຜ່ອນອຸບັດຕິເຫດຕາມທ້ອງຖະໜົນໃຫ້ຫຼຸດໜອ້ຍຖອຍລົງ, ພະແນກຕໍ່າຫຼວດຈະລາຈອນແຂວງຈຶ່ງໄດ້ປະສານສົມທົບກັບພາກສ່ວນກ່ຽວຂ້ອງລົງເຄື່ອນໄຫວຕິດຕັ້ງລະບົບໄຟອໍານາດຢູ່ເທດສະບານແຂວງທັງໝົດມີ 4 ຈຸດຄື: ຈຸດຢູ່ 4 ແຍກນໍ້າປາໆ, ຈຸດ 4 ແຍກສະພາປະຊາຊົນແຂວງ, ຈຸດ 4 ແຍກໂຮງຮຽນ ມສ ຈັນທາ ແລະ 4 ແຍກຮ້ານອາຫານດຶກລອ໋ກເຊິ່ງທັງ 4 ຈຸດນີ້ເປັນຈຸດຫຼໍ້ແຫຼມທີ່ມີຄວາມສ່ຽງມັກພາໃຫ້ເກີດອຸບັດຕິເຫດ, ມາຮອດບປັດຈຸບັນໄດ້ສໍາເລັດການຕິດຕັ້ງຢ່າງເປັນທາງການແລະຢູ່ໃນໄລຍະທົດລອງການນໍາໃຊ້ຈຶ່ງເຮັດໃຫ້ພໍ່ແມ່ປະຊາຊົນ ສ່ວນຫຼາຍຍັງບໍ່ທັນໄດ້ຮັບຮູ້ທົ່ວເຖິງກ່ຽວກັບການນໍາໃຊ້ລະບົບໄຟອໍານາດ ຫຼື ໄຟແດງດັ່ງກ່າວ.
ທ່ານພັນໂທ ທອງຄູນ ສຸວັນນະເພັດຫົວໜ້າພະແນກຕໍາຫຼວດຈະລາຈອນແຂວງອັດຕະປື ຍັງໄດ້ຊີ້ແຈ້ງຕື່ມວ່າ: ໃນມໍ່ໆນີ້ທາງເຈົ້າໜ້າທີຈະລາຈອນຍັງຈະໄດ້ ລົງຕິດຕາມແນະນໍາອະທິບາຍກຽ່ວກັບວິທີການນໍາໃຊ້ລະບົບໄຟອໍານາດແຕ່ລະຈຸດ ໃຫ້ພໍ່ແມ່ປະຊາຊົນຜູ້ໃຊ້ລົດໃຊ້ຖະໜົນຕື່ມອີກເພື່ອໃຫ້ເຂົາເຈົ້າຮັບຮູ້ແລະເຂົ້າໃຈກ່ຽວກັບການນໍາໃຊ້ລະບົບໄຟອໍານາດ ໃຫ້ຖືກຕ້ອງຕາມລະບຽບການ.
ຂ່າວ: ໄຊຈະເລີນ ຂ.ອັດຕະປື
