ວັນທີ 18 ມິຖຸນາ 2024 ນີ້, ສະຫາຍ ທອງສະລິດ ມັງໜໍ່ເມກ ຄະນະເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກ ໄດ້ຕ້ອນຮັບການເຂົ້າຢ້ຽມອຳລາ ຂອງ ສະຫາຍ ຫງວຽນ ບ໋າ ຮຸ່ງ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ສປປ ລາວ ໃນໂອກາດສຳເລັດການປະຕິບັດໜ້າທີ່ການທູດ ຢູ່ ສປປ ລາວ.
ໂອກາດນີ້, ທ່ານ ທອງສະລິດ ມັງໜໍ່ເມກ ໄດ້ສະແດງຄວາມຍິນ ດີຕ້ອນຮັບ ແລະ ຕີລາຄາສູງຕໍ່ຜົນງານການເຄື່ອນໄຫວການ ທູດຂອງ ສະຫາຍ ຫງວຽນ ບ໋າ ຮຸ່ງ ຢູ່ ສປປ ລາວ ຕະຫລອດໄລຍະທີ່ ສະຫາຍດຳລົງຕຳແໜ່ງເປັນ ເອກອັກຄະລັດຖະທູດ ເຊິ່ງເປັນການປະກອບສ່ວນສຳຄັນ ເຂົ້າໃນການເພີ່ມທະວີສາຍພົວ ພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສູງຊາດລາວ-ຫວຽດນາມ ໃຫ້ນັບມື້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
ສະຫາຍ ຫງວຽນ ບ໋າ ຮຸ່ງ ໄດ້ສະແດງຄວາມຂອບໃຈ ຕໍ່ການຕ້ອນ ຮັບອັນອົບອຸ່ນ ຂອງ ສະຫາຍ ທອງສະລິດ ມັງໜໍ່ເມກ, ພ້ອມ ທັງໄດ້ສະແດງຄວາມຂອບໃຈຢ່າງສູງ ມາຍັງການນຳພັກ- ລັດ ແລະ ປະ ຊາຊົນລາວ ທີ່ໄດ້ອຳນວຍຄວາມສະດວກ, ຊ່ວຍ ເຫລືອ ແລະ ສະໜັບສະໜູນຕະຫລອດໄລຍະການປະຕິບັດໜ້າທີ່ ເອກອັກຄະລັດຖະທູດ ຢູ່ ສປປ ລາວ ໂດຍສຳເລັດຢ່າງຈົບງາມ. ພ້ອມກັນນີ້, ສະຫາຍຍັງໄດ້ຢືນຢັນວ່າ ເຖິງວ່າຈະສຳເລັດໜ້າທີ່ການທູດຢູ່ ສປປ ລາວ ແລະ ກັບຄືນປະເທດຈະຢູ່ໃນຕຳ ແໜ່ງ ຫລື ສະຖານະໃດກໍຕາມ ຈະສືບຕໍ່ເປັນຂົວຕໍ່ປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນທີ່ມີລັກສະນະພິເສດ ທີ່ມີໜຶ່ງບໍ່ມີສອງໃນໂລກນີ້ ໃຫ້ນັບມື້ແໜ້ນແຟ້ນຍິ່ງໆຂຶ້ນ.
ພາບ: ຫ້ອງວ່າການສູນກາງພັກ
