ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເມື່ອບໍ່ດົນມານີ້, ທ່ານ ທອງສະຫວັນ ພົມວິຫານ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ (ຄຕພ) ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານນາງ ມິກເຊວ ຈັນ ຮອງລັດຖະມົນຕີກະຊວງການຕ່າງປະເທດ ແລະ ການຄ້າອົດສະຕຣາລີ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງ ວັນທີ 6-8 ມິຖຸນາ 2024.
ໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການມາຢ້ຽມຢາມ ສປປ ລາວ ຂອງຄະນະ ເຊິ່ງເປັນການປະກອບສ່ວນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບອັນດີງາມ ລະຫວ່າງ ລາວ-ອົດສະຕຣາລີ ໃຫ້ນັບມື້ນັບມີບາດກ້າວໃໝ່, ພ້ອມທັງແຈ້ງໃຫ້ຊາບໂດຍຫຍໍ້ກ່ຽວກັບ ຜົນສຳເລັດຂອງການພັດທະນາເສດຖະກິດ-ສັງຄົມ ພາຍໃຕ້ການນຳພາ ຂອງ ພັກ ປປ ລາວ ແລະ ໄດ້ຍົກໃຫ້ເຫັນເຖິງພາລະບົດບາດຂອງ ຄຕພ ໃນການເຄື່ອນໄຫວວຽກງານການຕ່າງປະເທດດ້ານພັກ ແລະ ການທູດປະຊາຊົນ. ພ້ອມນັ້ນ, ໄດ້ສະແດງຄວາມຂອບໃຈ ຕໍ່ການຊ່ວຍເຫລືອຂອງລັດຖະບານອົດສະຕຣາລີ ແກ່ ສປປ ລາວ ເປັນຕົ້ນ ດ້ານການສຶກສາ, ການພັດທະນາຊັບພະຍາກອນມະນຸດ, ສາທາລະນະສຸກ, ອຸປະກອນການແພດ, ການກໍ່ສ້າງພື້ນຖານໂຄງລ່າງ, ການຊ່ວຍເຫລືອເພື່ອການພັດທະນາ (ODA) ໂດຍຜ່ານໂຄງການຕ່າງໆໃນໄລຍະຜ່ານມາ. ພ້ອມທັງ ອວຍພອນໃຫ້ ທ່ານ ນາງ ມິກເຊວ ຈັນ ພ້ອມດ້ວຍຄະນະ ຈົ່ງປະສົບຜົນສຳເລັດໃນການເດີນທາງມາຢ້ຽມຢາມ ແລະ ເຮັດວຽກຢູ ສປປ ລາວ ໃນຄັ້ງນີ້ ແລະ ສະແດງຄວາມຍິນດີຮ່ວມມື ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ລະຫວ່າງ ລາວ-ອົດສະຕຣາລີ ໃຫ້ແຕກດອກອອກຜົນຍິ່ງໆຂຶ້ນ.
ທ່ານ ນາງ ມິກເຊວ ຈັນ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ສາຍພົວພັນມິດຕະພາບ, ການຮ່ວມມືອັນດີງາມລະຫວ່າງ ອົດສະຕຣາລີ-ລາວ ຕະຫລອດໄລຍະຜ່ານມາ ແລະ ໄດ້ແຈ້ງໃຫ້ຊາບໂດຍສັງເຂບກ່ຽວກັບສະພາບການເມືອງ ແລະ ການພັດທະນາເສດຖະຖະກິດ- ສັງຄົມ ຂອງ ອົດສະຕຣາລີ, ພ້ອມທັງຊົມເຊີຍຕໍ່ບັນດາຜົນສໍາເລັດທີ່ປະຊາຊົນລາວຍາດມາໄດ້ ໂດຍສະເພາະ ການພັດທະນາເສດຖະກິດ-ສັງຄົມ ພາຍໃຕ້ການນຳພາ ຂອງ ພັກ ປປ ລາວ, ສະແດງຄວາມຂອບໃຈຕໍ່ ສປປ ລາວ ໃນການເປັນຝ່າຍປະສານງານ ອາຊຽນ-ອົດສະຕຣາລີ ຕະຫລອດໄລຍະ 2 ປີຜ່ານມາ ເພື່ອປະກອບສ່ວນໃຫ້ແກ່ການຈັດຕັ້ງ ກອງປະຊຸມສຸດຍອດພິເສດການເປັນຄູ່ເຈລະຈາ ອາຊຽນ-ອົດສະຕຣາລີ 50 ປີ ໃນເດືອນ ມີນາ 2024 ແລະ ຈະສືບຕໍ່ປະກອບສ່ວນຊຸກຍູ້ ເພື່ອຮັດແໜ້ນການພົວພັນຮ່ວມມື ທາງດ້ານເສດຖະກິດ, ວັດທະນະທຳ ແລະ ສັງຄົມ ລະຫວ່າງ ສອງປະເທດ ໃຫ້ໄດ້ຮັບການຂະຫຍາຍຕົວຍິ່ງໆຂຶ້ນ. ພ້ອມທັງ ຈະສືບຕໍ່ໃຫ້ການຊ່ວຍເຫລືອ ສປປ ລາວ ໃນດ້ານຕ່າງໆທີ່ສອງຝ່າຍມີທ່າແຮງຮ່ວມກັນ ແລະ ຍິນດີໃຫ້ການສະໜັບ ສະໜູນ ການເປັນປະທານໝູນວຽນອາຊຽນ ຂອງ ສປປ ລາວ ໃນປີ 2024 ໃຫ້ໄດ້ຮັບຜົນສຳເລັດຢ່າງຈົບງາມ.
ພ້ອມນີ້, ສອງຝ່າຍ ຍັງໄດ້ເອກະພາບ ແລະ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ-ອົດສະຕຣາລີ, ອົດສະຕຣາລີ-ລາວ ໃນຕະຫລອດໄລຍະ 70 ກວ່າປີຜ່ານມາ ທີ່ໄດ້ຮັບການພັດທະນາ ແລະ ເສີມຂະຫຍາຍຢ່າງຕໍ່ເນື່ອງ ໂດຍສະເພາະ ການຍົກລະດັບການພົວພັນ ສອງປະເທດຂຶ້ນເປັນ ຄູ່ຮ່ວມມືແບບກວມລວມ. ພິເສດກ່ຽວກັບການສ້າງຕັ້ງສະມາຄົມມິດຕະພາບ ລາວ-ອົດສະຕຣາລີ, ອົດສະຕຣາລີ-ລາວ ໃນການເຮັດບົດບາດການທູດປະຊາຊົນ ເພື່ອສະໜັບສະໜູນການພົວພັນດ້ານລັດຂອງສອງປະເທດ ໃຫ້ມີປະສິດທິຜົນຍິ່ງໆຂຶ້ນ ສົ່ງເສີມການໄປມາຫາສູ່ກັນລະຫວ່າງ ປະຊາຊົນ ສອງຊາດ ແລະ ຊຸກຍູ້ການຮ່ວມມືໃນຂະແໜງເສດຖະກິດ, ການຄ້າ, ການລົົງທຶນ, ການສຶກສາ, ວັດທະນະທຳ ແລະ ການທ່ອງທ່ຽວ ໃຫ້ແຕກດອກອອກຜົນຍິ່ງໆຂຶ້ນ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ເພື່ອປະກອບສ່ວນເຂົ້າໃນພາລະກິດ ສັນຕິພາບ, ມິດຕະພາບ ແລະ ການຮ່ວມມືເພື່ອພັດທະນາໃນພາກພື້ນ ແລະ ໃນໂລກ.
ຂ່າວ-ພາບ: ຄຕພ
May be an image of 2 people, temple, dais and text