ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 31 ພຶດສະພາ 2024 ນີ້ ທີ່ ເດີນກິລາ ເມືອງຫຼວງນ້ຳທາ ແຂວງຫຼວງນ້ຳທາ ໄດ້ຈັດກິດຈະກຳປູກຕົ້ນໄມ້ຂຶ້ນ ເພື່ອສະເຫລີມສະຫລອງ ວັນປູກຕົ້ນໄມ້ແຫ່ງຊາດ ຄົບຮອບ 44 ປີ ແລະ ວັນເດັກນ້ອຍສາກົນ ປະຈຳປີ 2024 ເປັນກຽດເຂົ້າຮ່ວມໂດຍ ມີ ທ່ານ ວຽງສະຫວັດ ສີພັນດອນ ເຈົ້າແຂວງຫຼວງນ້ຳທາ, ມີບັນດາການນຳແຂວງ, ເມືອງ, ພະແນກການຕ່າງໆ ເຂົ້າຮ່ວມ. ເຊິ່ງການຈັດກິດຈະກຳຄັ້ງນີ້ ເພື່ອເປັນການປູກຈິດສຳນຶກໃຫ້ແກ່ຊາວໜຸ່ມ-ເຍົາວະຊົນ ແລະ ອະນຸຊົນທົ່ວສັງຄົມ ເຫັນເຖິງຄວາມໝາຍຄວາມສຳຄັນ ຂອງການອະນຸລັກຮັກສາປ່າໄມ້ ຕາມທິດພັດທະນາການເຕີບໂຕ ແລະ ສີຂຽວ ນອກນີ້ກໍ່ເພື່ອເປັນການຫຼຸດຜ່ອນມົນລະພິດທາງອາກາດ ເພາະວ່າການປູກຕົ້ນໄມ້ໃນມື້ນີ້ ເພື່ອຊີວິດທີ່ດີຂອງລູກຫຼານໃນອະນາຄົດ ເຊິ່ງຕົ້ນໄມ້ທີ່ນຳມາປູກຄັ້ງນີ້ແມ່ນຕົ້ນດອກຈຳປາ ຈຳນວນ 1000 ກວ່າຕົ້ນ ແລະ ໃນຕໍ່ໜ້າຈະສືບຕໍ່ປູກຕົ້ນໄມ້ປະດັບ ເພື່ອເຮັດໃຫ້ຕົວເມືອງຫຼວງນ້ຳທາ ສວຍສົດງົດງາມຂຶ້ນກວ່າເກົ່າ ພິເສດພັນເບ້ຍໄມ້ດັ່ງກ່າວແມ່ນໄດ້ຮັບການສະໜັບສະໜູນຈາກຄອບຄົວຂອງທ່ານ ເຈົ້າແຂວງຫລວງນ້ຳທາ ຈຳນວນ 4000 ກວ່າຕົ້ນ ອີກດ້ວຍ.
ທີ່ມາ: ໜັງສືພິມປະຊາຊົນ