ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຫຼວງພະບາງຍັງບໍ່ພົບຜູ້ຕິດເຊື້ອໂຄໂຣນາໄວຣັສ

ໃນຂະນະທີ່ຫຼາຍປະເທດ ກຳລັງເຝົ້າລະວັງການລະບາດຂອງເຊື້ອພະຍາດ ໂຄໂຣນາໄວຣັສ ສາຍພັນໃໝ່, ກໍ່ໄດ້ມີນັກທ່ອງທ່ຽວປະເທດຈີນ ກຸ່ມໜື່ງທີ່ເດີນທາງເຂົ້າມາປະເທດລາວ ໂດຍຜ່ານສາຍການບິນໂດຍກົງມາເຖິງນະຄອນຫຼວງວຽງຈັນ, ຊຶ່ງກຸ່ມນັກທ່ອງທ່ຽວຊາວຈີນກຸ່ມນີ້ກໍ່ໄດ້ໄປທ່ອງທ່ຽວຫຼາຍແຫ່ງ ໃນນະຄອນຫຼວງວຽງຈັນ, ເມືອງວັງວຽງແຂວງວຽງຈັນ ແລະ ນະຄອນຫຼວງພະບາງ ແຂວງຫຼວງພະບາງ; ແລະ ເມື່ອກັບຄືນປະເທດໄປແລ້ວ ຜັດໄດ້ມີການກວດພົບການຕິດເຊື້ອໂຄໂຣນາໄວຣັສສາຍພັນໃໝ່, ສະຖານກົງສູນໃຫຍ່ ສປ ຈີນ ປະຈຳພາກເໜືອແຂວງຫຼວງພະບາງ ຈຶ່ງໄດ້ອອກແຈ້ງການໃຫ້ທຸກພາກສ່ວນເຝົ້າລະວັງ ຄວາມສ່ຽງທີ່ອາດຈະເກີດການແຜ່ເຊື້ອພະຍາດໂຄໂຣນາໄວຣັສສາຍພັນໃໝ່ດັ່ງກ່າວນີ້ໄດ້. ທ່ານ ຄຳສອນ ພົງສະຫວັດດີ, ຫົວໜ້າພະແນກສາທາລະນະສຸກແຂວງຫຼວງພະບາງ ໄດ້ໃຫ້ສຳພາດໃນຕອນແລງຂອງວັນທີ່ 3 ກຸມພານີ້ີ້ວ່າ: ນັກທ່ອງທ່ຽວທີ່ຕິດເຊື້ອພະຍາດ ໂຄໂຣນາໄວຣັສ ສາຍພັນໃໝ່ ຕາມກະແສຂ່າວນັ້ນ ໄດ້ເດີນທາງມາຮອດລາວໃນວັນທີ່ 26 ມັງກອນ 2020 ແລະ ໄດ້ກັບຄືນປະເທດໃນວັນທີ່ 31 ມັງກອນ 2020. ພາຍຫຼັງກັບເຖິງປະເທດ, ຜູ້ກ່ຽວກໍ່ໄດ້ເຂົ້າຮັບການກວດສຸກຂະພາບ ແລະ ຜົນກວດປາກົດວ່າ ຜູ້ກ່ຽວໄດ້ຕິດເຊື້ອພະຍາດ ໂຄໂຣນາໄວຣັສ ສາຍພັນໃໝ່; ແຕ່ໄລຍະທີ່ນັກທ່ອງທ່ຽວຈີນຜູ້ຕິດເຊື້ອຄົນນີ້ໄດ້ເຂົ້າມາທ່ອງທ່ຽວຢູ່ລາວນັ້ນ ຍັງແມ່ນຢູ່ໃນໄລຍະພະຍາດກຳລັງບົ່ມເຊື້ອ, ບໍ່ທັນເປັນໄລຍະແຜ່ເຊື້ອ ຊຶ່ງມາຮອດປະຈຸບັນ, ໂຮງໝໍທຸກແຫ່ງພາຍໃນແຂວງຫຼວງພະບາງ ກໍ່ຍັງບໍ່ມີການລາຍງານຕົວເລກຜູ້ຕິດເຊື້ອພະຍາດດັ່ງກ່າວນີ້ແຕ່ຢ່າງໃດ, ແຕ່ກໍ່ໄດ້ເອົາໃຈໃສ່ຈັດຕັ້ງການເຝົ້າລະວັງຢ່າງໃກ້ຊິດ. ທ່ານຫົວໜ້າພະແນກສາທາລະນະສຸກແຂວງຫຼວງພະບາງໃຫ້ຮູ້ຕື່ມວ່າ: ເພື່ອເປັນການເຝົ້າລະວັງການລະບາດຂອງເຊື້ອພະຍາດໂຄໂຣນາໄວຣັສ ສາຍພັນໃໝ່, ສະຖານກົງສູນໃຫຍ່ ສປ ຈີນ ປະຈຈຳພາກເໜືອ ແຂວງຫຼວງພະບາງ ໄດ້ອອກແຈ້ງການໃຫ້ພາກສ່ວນກ່ຽວຂ້ອງທັງຫຼາຍ ຈົ່ງເກັບກຳຂໍ້ມູນ ແລະ ກວດກາສະຖານທີ່ນັກທ່ອງທ່ຽວຜູ້ຕິດເຊື້ອຄົນຈີນຄົນນີ້ ໄດ້ໄປທ່ອງທ່ຽວ, ອາໄສຢູ່ ແລະ ໃຊ້ບໍລິການ, ທັງນີ້ກໍ່ເພື່ອວາງມາດຕະການປ້ອງກັນ ແລະ ຄວບຄຸມໃຫ້ທັນເວລາ. ພ້ອມນັ້ນ, ພະແນກສາທາລະນະສຸກແຂວງ ຍັງໄດ້ອອກແຈ້ງການໃຫ້ປະຊາຊົນ ຕະຫຼອດເຖິງນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ອາໄສຢູ່ແຂວງຫຼວງພະບາງ ໃຫ້ພ້ອມກັນປະຕິບັດຫຼັກການອະນາໄມ ຕາມການແນະນຳຂອງຂະແໜງ ສາທາລະນະສຸກ ໃຫ້ເຂັ້ມງວດ ເພື່ອປ້ອງກັນການຕິດເຊື້ອພະຍາດທີ່ອາດຈະເກີດຂື້ນ.

ຂ່າວ: ອາພຸດເດດ ບຸບຜາ