ວັນທີ 16 ສິງຫາ 2024 ນີ້, ທີ່ຫ້ອງປະຊຸມ ພະແນກຖະແຫຼງຂ່າວ, ວັດທະນະທໍາ ແລະ ການທ່ອງທ່ຽວ ແຂວງ ຫຼວງພະບາງ ໄດ້ມີພິທີປິດ ກອງປະຊຸມເຜີຍແຜ່ ກ່ຽວກັບ ຄວາມຮູ້ພື້ນຖານການຫັນເປັນດິຈິຕອນ ໃຫ້ແກ່ພະນັກງານພະແນກການ ແລະ ຂະແໜງການຕ່າງໆ ພາຍໃນ ແຂວງ ຫຼວງພະບາງ. ໂດຍການເປັນປະທານຂອງທ່ານ ບໍ່ວຽງຄໍາ ວົງດາລາ ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແລະ ທ່ານ ຄໍາຂັນ ຈັນທະວີສຸກ ເຈົ້າແຂວງ ຫຼວງພະບາງ.
ທ່ານນາງ ເກສອນ ສຸລິວົງ ຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ ໃຫ້ຮູ້ວ່າ: ຫົວຂໍ້ການນຳສະເໜີ ແມ່ນໄດ້ກຳ ນົດຕາມເອກກະສານຝຶກອົບຮົມຄວາມຮູ້ພື້ນຖານການຫັນເປັນດິຈິຕອນ ຈໍານວນ 03 ເຫຼັ້ມ ລວມທັງໝົດ 15 ບົດ ຄື: ການປະຕິວັດອຸດສາຫະກໍາ 4.0, ເຕັກໂນໂລຊີ ແລະ ນະວັດຕະກໍາ, ເຕັກໂນໂລຊີຂໍ້ມູນຂ່າວສານ ແລະ ການສື່ສານ, ເຕັກໂນໂລຊີດິຈິຕອນ ແລະ ເຕັກໂນໂລຊີ ອັດສະລິຍະ, ເຕັກໂນໂລຊີ ໂລຈິສຕິກ ແລະ ການໄປສະນີ, ອິນເຕີເນັດ ແລະ ສື່ສັງຄົມອອນລາຍ, ຖານຂໍ້ມູນ (Database) ແລະ ເຕັກໂນໂລຊີກຸ່ມຂໍ້ມູນຜູກພັນ (Blockchain), ຄວາມປອດໄພໄຊເບີ, ຄວາມຮູ້ພື້ນຖານການບໍລິຫານລັດດິຈິຕອນ (Digital Government), ເສດຖະກິດດິຈິຕອນ ແລະ ທຸລະກໍາຊັບສິນດິຈິຕອນ, ສັງຄົມດິຈິຕອນ, ຍຸດທະສາດການຫັນເປັນດິຈິຕອນ ຂອງ ສປປ ລາວ, ການພັດທະນາຊັບພະຍາກອນມະນຸດດ້ານດິຈິຕອນ, ບັນດານິຕິກໍາ ກ່ຽວກັບການຫັນເປັນດິຈິຕອນ ຂອງ ສປປ ລາວ ແລະ ວຽກກວດກາຫັນເປັນດິຈິຕອນ.
ການຝຶກອົບຮົມຄັ້ງນີ້ ເລີ່ມແຕ່ວັນທີ 14-16 ສິງຫາ 2024, ມີຜູ້ເຂົ້າຮ່ວມທັງໝົດ ຈຳນວນ 163 ທ່ານ, ຍິງ ຈໍານວນ 67 ທ່ານ, ໃນນັ້ນຜູ້ບັນຍາຍ ຈຳນວນ 07 ທ່ານ, ຍິງ ຈຳນວນ 04 ທ່ານ, ຜູ້ເຂົ້າຮ່ວມ ຈຳນວນ 144 ທ່ານ, ຍິງ ຈຳນວນ 56 ທ່ານ ຕ່າງໜ້າຈາກ ພະແນກການ, ມະຫາວິທະຍາໄລ ແລະ ຂະແໜງການຕ່າງໆ ພາຍໃນແຂວງ ຈຳນວນ 32 ພາກສ່ວນ ແລະ ຄະນະຮັບຜິດຊອບ ຈາກສູນສົ່ງເສີມ ແລະ ຖ່າຍທອດເຕັກໂນໂລຊີ ແລະ ພະແນກເຕັກໂນໂລຊີ ແລະ ການສື່ສານ ແຂວງ ຫຼວງພະບາງ ຈຳນວນ 12 ທ່ານ, ຍິງ ຈໍານວນ 07 ທ່ານ.
ຜ່ານຜົນການປະເມີນພາຍຫຼັງການ ການເຜີຍແຜ່ ເຫັນໄດ້ວ່າ: ກ່ຽວກັບຫົວຂໍ້ການຈັດກອງປະຊຸມ ສະເລ່ຍ 3,8 ຈັດຢູ່ໃນລະດັບ ຫຼາຍ; ຄວາມປະທັບໃຈສຳລັບການບໍລິຫານ ສະເລ່ຍ 4,0 ຈັດຢູ່ໃນລະດັບ ຫຼາຍທີ່ສຸດ; ຂໍ້ມູນໂດຍລວມກ່ຽວກັບການຕໍ່ຍອດຄວາມຮູ້ ສະເລ່ຍ 3,7 ຈັດຢູ່ໃນລະດັບ ຫຼາຍທີ່ສຸດ.
ຂ່າວ: ຂ່າວສານເຕັກໂນໂລຊີ ແລະ ການສື່ສານ
