ຕາມຂ່າວຈາກວິທະຍຸສາກົນແຫ່ງປະເທດຈິນ ຫຼື CRI. ຕອນເຊົ້າວັນທີ 13 ມັງກອນນີ້ຢູ່ທຳນຽບປະທານາທິບໍດີ ຂອງອິນໂດເນເຊຍ, ທ່ານໂຈໂກ ວິໂດໂດ ປະທານາທິບໍດີອິນໂດເນເຊຍໄດ້ສັກວັກຊີນຕ້ານພະຍາດໂຄວິດ-19 ຫຼອດທຳອິດຕາມເວລາກຳນົດ, ວັກຊີນດັ່ງກ່າວແມ່ນຜະລິດຕະພັນຂອງບໍລິສັດເຕັກນິກຊີວະພາບຊິນໂນແວກຂອງຈີນ. ວັນທີ 11 ມັງກອນນີ້, ກົມຕິດຕາມຄຸ້ມຄອງອາຫານແລະຢາແຫ່ງຊາດອິນໂດເນເຊຍໄດ້ປະກາດມອບໃບອະນຸຍາດນຳໃຊ້ໂດຍດ່ວນໃຫ້ແກ່ວັກຊິນຕ້ານພະຍາດໂຄວິດ-19 ທີ່ບໍລິສັດຊິນໂນແວກຈີນຄົ້ນຄວ້າຜະລິດ, ນີ້ເປັນຂີດໝາຍສະແດງໃຫ້ເຫັນວ່າ: ວັກຊີນຊິນໂນແວກສາມາດນຳໃຊ້ຢູ່ອິນໂດເນເຊຍໄດ້ຢ່າງເປັນທາງການ. ຂ່າວແຈ້ງວ່າ, ຢາວັກຊີນ 3 ລ້ານຫຼອດ ທີ່ອິນໂດເນເຊຍສັ່ງຊື້ຈາກບໍລິສັດຊິນໂນແວກຈີນນັ້ນໄດ້ສົ່ງໄປເຖິງອິນໂດເນເຊຍແລ້ວ, ປັດຈຸບັນພວມແຈກຢາຍໄປທົ່ວປະເທດອິນໂດເນເຊຍ, ຍັງມີວັກຊີນດັ່ງກ່າວຈຳນວນ 122,5 ລ້ານຫຼອດຈະສົ່ງໄປເຖິງອິນໂດເນເຊຍເທື່ອລະງວດ.
ໃນເມື່ອບໍ່ດົນມານີ້, ກະຊວງສາທາລະນະສຸກຟີລິບປີນກ່າວວ່າ: ລັດຖະບານຟີລິບປີນວາງແຜນຈະຈັດຊື້ວັກຊີນ 25 ລ້ານຫຼອດຈາກບໍລິສັດຊິນໂນແວກຈີນ. ເຈົ້າໜ້າທີ່ຟີລິບປີນຫຼາຍທ່ານລວມທັງທ່ານໂຣດຣີໂກ ດູເຕີເຕ ປະທານາທິບໍດີຟີລິບປີນໄດ້ສະແດງຄວາມຄິດເຫັນຂອງຕົນຢ່າງເປີດເຜີຍ, ແລະເຫັນວ່າວັກຊີນພະຍາດໂຄວິດ-19 ທີ່ຈີນຜະລິດແມ່ນມີຄວາມປອດໄພແລະມີປະສິດທິຜົນດີ. ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 14 ມັງກອນນີ້, ໂຄສົກປະທານາທິບໍດີຟີລິບປີນກ່າວວ່າ: ວັກຊີນທີ່ກຸ່ມບໍລິສັດຢາແຫ່ງຊາດຈີນແລະບໍລິສັດຊິນໂນແວກຈີນຜະລິດນັ້ນແມ່ນວັກຊິນປະເພດເຊື້ອຕາຍ, ເຕັກນິກປະເພດເຊື້ອຕາຍມີຄວາມປອດໄພດີ, “ສະນັ້ນຂ້າພະເຈົ້າຍິນດີສັກຢາວັກຊີນຕ້ານພະຍາດໂຄວິດ-19 ປະເພດເຊື້ອຕາຍທີ່ຈີນຜະລິດ.”
ຕອນຄ່ຳວັນທີ 15 ມັງກອນນີ້, ທ່ານຮຸນແຊນ ນາຍົກລັດຖະມົນຕີກຳປູເຈຍກ່າວໃນສື່ສັງຄົມອອນລາຍວ່າ: ມາຮອດປັດຈຸບັນ, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນທີ່ໄດ້ສັກວັກຊີນຕ້ານພະຍາດໂຄວິດ-19 ທີ່ຈີນຜະລິດເອງນັ້ນ, ທ່ານມີສຸຂະພາບແຂງແຮງດີ, ທ່ານສາມາດຢ້ຽມຢາມຕ່າງປະເທດເກືອບວ່າຕາມຄວາມຕ້ອງການຂອງທ່ານທັງໝົດ, ພາຍຫຼັງຢ້ຽມຢາມອາຟຣິກາແລ້ວ, ທ່ານຫວາງຢີ້ກຳລັງຢ້ຽມຢາມປະເທດອາຊີຕາເວັນອອກສຽງໃຕ້, ນີ້ເຮັດໃຫ້ກຳປູເຈຍມີຄວາມໝັ້ນໃຈຢ່າງເຕັມທີ່ຕໍ່ວັກຊີນຕ້ານພະຍາດໂຄວິດ-19 ຂອງຈີນ.
ເມື່ອທົບທວນຄືນປີ 2020, ໃນໄລຍະເກີດມີສະພາບການແຜ່ລະບາດຂອງພະຍາດໂຄວິດ-19, ຜູ້ນຳຈີນໄດ້ຕິດຕໍ່ພົວພັນກັບຜູ້ນຳ 9 ປະເທດໃນ 10 ປະເທດອາຊຽນໂດຍຜ່ານໂທລະສັບຫຼືສົ່ງສານອວຍພອນ, ເພື່ອແລກປ່ຽນເນື່ອງໃນໂອກາດລະນຶກການສ້າງຕັ້ງສາຍພົນພັນທາງການທູດລະຫວ່າງສອງປະເທດ, ການຮ່ວມມືຕ້ານກັບການແຜ່ລະບາດຂອງພະຍາດໂຄວິດ-19, ການລົງເລິກການພົວພັນລະຫວ່າງສອງປະເທດແລະອື່ນໆ. ຈີນໄດ້ສົ່ງໜ່ວຍຊ່ຽວຊານແລະແພດໝໍໄປກຳປູເຈຍ, ລາວ, ຟີລິບປີນ, ມຽນມາແລະມາເລເຊຍເພື່ອແລກປ່ຽນບົດຮຽນຕ້ານກັບການແຜ່ລະບາດຂອງພະຍາດໂຄວິດ-19ກັບພະນັກງານການແພດແລະພະຍາບານທ້ອງຖິ່ນ, ຊ່ວຍໃຫ້ທ້ອງຖິ່ນເຫຼົ່ານີ້ສາມາດຍົກສູງຄວາມສາມາດດ້ານການປ້ອງກັນແລະຄວບຄຸມການແຜ່ລະບາດຂອງພະຍາດແລະປິ່ນປົວພະຍາດ, ເສີມສ້າງຄວາມໝັ້ນໃຈເພື່ອຮ່ວມກັນເອົາຊະນະການແຜ່ລະບາດຂອງພະຍາດໂຄວິດ-19. ປັດຈຸບັນ, ຫຼາຍປະເທດອາຊຽນໄດ້ເລືອກໃຊ້ວັກຊີນຕ້ານພະຍາດໂຄວິດ-19 ທີ່ຈີນຜະລິດ, ນີ້ໄດ້ສະແດງໃຫ້ເຫັນເຖິງຄວາມໝັ້ນໃຈແລະຄວາມຕັດສິນໃຈຢ່າງເດັດດ່ຽວຂອງປະເທດອາຊຽນເຊິ່ງເປັນປະເທດບ້ານໃກ້ເຮືອນຄຽງຂອງຈີນໃນການຕ້ານກັບການແຜ່ລະບາດຂອງພະຍາດໂຄວິດ-19 ດ້ວຍການຮ່ວມມືທີ່ເປັນຮູບປະທຳ.
Loading...