ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຫ້ອງການສາທາລະນະສຸກເມືອງຫຼາ ແຂວງອຸດົມໄຊ ຍືນຢັນວ່າ ປະຊາຊົນບ້ານ ນ້ຳແລງ ບໍ່ໄດ້ຕິດເຊື້ອໂຄວິດ-19:

ຈາກກໍລະນີທີ່ມີປະຊາຊົນບ້ານ ນ້ຳແລງ, ເມືອງຫລາ, ແຂວງ ອຸດົມໄຊ ມີອາການໄຂ້ ແລະ ໄອ ເປັນຈຳນວນຫລວງຫລາຍ, ຊຶ່ງເປັນອາການຄ້າຍຄືກັບ ອາການຂອງຜູ້ຕິດເຊື້ອພະຍາດອັກເສບປອດສາຍພັນໃໝ່ ຫຼື ໂຄວິດ-19 ເລີ່ມແຕ່ຕົ້ນເດືອນມີນາຜ່ານມານັ້ນ, ທ່ານໝໍ ຈື່ວ່າ ຊາວເຊັງ, ຫົວໜ້າຫ້ອງການສາທາລະນະສຸກເມືອງຫຼາ, ແຂວງ ອຸດົມໄຊ ໄດ້ໃຫ້ສຳພາດໃນວັນທີ 4 ເມສາ 2020 ນີ້ວ່າ: ປະຊາຊົນຈຳນວນດັ່ງກ່າວເປັນພຽງໄຂ້ຫັວດທຳມະດາ ບໍ່ແມ່ນພະຍາດອັກເສບປອດສາຍພັນໃໝ່ ຫຼື ໂຄວິດ-19 ແຕ່ຢ່າງໃດ.

ການເປັນໄຂ້ຫວັດຂອງປະຊາຊົນໃນເຂດບ້ານດັ່ງກ່າວເກີດຂຶ້ນ ເມື່ອເດືອນມີນາຜ່ານມາ ໃນນັ້ນອາສາສະໝັກຂັ້ນບ້ານກໍ່ໄດ້ລາຍງານມາ ໂຮງໝໍນ້ອຍ ແລະ ຫ້ອງການສາທາລະນະສຸກເມືອງຫລາຊຶ່ງໄດ້ສົ່ງພະນັກງານວິຊາການລົງມາເກັບກຳຂໍ້ມູນຕົວຈິງ ແລະ ມາຮອດວັນທີ 2 ເມສາ 2020 ພະນັກງານແພດໝໍ ຈຶ່ງໄດ້ລົງມາກວດກາ ແລະ ປິ່ນປົວ ໂດຍເຫັນວ່າໃນເບື້ອງຕົ້ນມີຄົນເຈັບທັງໝົດ 84 ຄົນ ຍິງ 55 ຄົນ, ເດັກຕ່ຳກ່ວາ 5 ປີ ມີ 18 ຄົນ ຍິງ 9 ຄົນ, ຊຶ່ງທັງໝົດເປັນພຽງໄຂ້ຫວັດທຳມະດາ ແລະ ກໍ່ໄດ້ສະໜອງຢາຈຳນວນໜື່ງໃຫ້ຄົນເຈັບເຫຼົ້ານີ້ໄປແລ້ວ ເພື່ອປະກອບເຂົ້າໃນການລົງເຄື່ອນໄຫວປິ່ນປົວ. ຜ່ານການປິ່ນປົວມາຮອດປັດຈຸບັນ, ຄົນເຈັບທີ່ໄດ້ຮັບການປິ່ນປົວ ຫາຍດີແລ້ວ ຈຳນວນ 75 ຄົນ ແລະ ຍັງສືບຕໍ່ກິນຢາອີກຈຳນວນ 9 ຄົນ, ແລະ ປະຈຸບັນ, ພະນັກງານແພດໝໍ ກໍ່ຍັງສືບຕໍ່ລົງຕິດຕາມ ແລະ ປິນປົວກັບທີ່ຢູ່.

ຈາກການກວດກາ ແລະ ບົ່ງມະຕິຕາມຫຼັກການທາງການແພດແລ້ວສາມາດຍັ້ງຢືນໄດ້ວ່າ: ຄົນເຈັບເຫຼົ່ານີ້ແມ່ນມີອາການໄຂ້ຫັວດທຳມະດາ ບໍ່ເຂົ້າໃນນິຍາມອາການຂອງພະຍາດອັກເສບປອດສາຍພັນໃໝ່ ຫຼື ໂຄວິດ-19 ແຕ່ຢ່າງໃດ. ອີກປະການໜື່ງ, ບ້ານ ນໍ້າແລງ ກໍ່ບໍ່ມີຄວາມສ່ຽງທີ່ຈະເກີດມີເຊື້ອພະຍາດໂຄວິດ-19 ເນື່ອງຈາກວ່າບ້ານດັ່ງກ່າວບໍ່ມີນັກທ່ອງທ່ຽວເຂົ້າມາ ແລະ ບໍ່ມີປະຊາຊົນໄປເຄື່ອນໄຫວຢູ່ເຂດທີ່ມີການແຜ້ລະບາດຂອງເຊື້ອພະຍາດ. ທ່ານຍັງເນັ້ນຕື່ມອີກວ່າ: ຜ່ານການກວດກາ, ບົ່ງມະຕິພະຍາດ ແລະ ສືບສວນປະຫັວດການເຄື່ອນໄຫວຂອງພໍ່ແມ່ປະຊາຊົນພາຍໃນບ້ານ ຈື່ງສາມາດຍັ້ງຢືນໄດ້ວ່າ: ກໍລະນີເກີດມີຜູ້ຕິດເຊື້ອໄຂ້ຫັວດ ຈຳນວນຫຼາຍ ຢູ່ບ້ານ ນ້ຳແລງ ເມືອງຫຼາ ໃນຄັ້ງນີ້ ເປັນພຽງໄຂ້ຫັວດທຳມະດາ ບໍ່ແມ່ນພະຍາດໂຄວິດ-19. ຂ່າວ: ສີຈັນ ເກດວົງສາ