ຄະນະຜູ້ແທນອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ຄະນະຜູ້ແທນອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ພົບປະແລກປ່ຽນບົດຮຽນວຽກງານຫ້ອງການ, ວຽກງານ ຂ່າວທາງເວບໄຊ, ວາລະສານ ແລະ ຂ່າວໜັງສືພິມ ໃນວັນທີ 21 ພຶດສະພາ 2024 ຢູ່ຮ່າໂນ້ຍ ແຫ່ງ ສສ ຫວຽດນາມ ນໍາໂດຍ ສະຫາຍ ບຸນທ່ຽງ ວິໄລວົງ ຮັກສາການຫົວໜ້າຫ້ອງການ, ອົງການໄອຍະການປະຊາຊົນສູງສຸດ ແຫ່ງ ສປປ ລາວ ສະຫາຍ ຟ້າມແທງ ຕຶ່ງ ຫົວໜ້າຫ້ອງການອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ.
ການພົບປະຄັ້ງນີ້, ສອງຝ່ານຕ່າງກໍໄດ້ລາຍງານສະພາບການເຄື່ອນໄຫວວຽກງານ, ຂອບເຂດສິດ, ໜ້າທີ່ ແລະ ພາລະບົດບາດຂອງຕົນໃຫ້ກັນຊາບ, ພ້ອມທັງຕີລາຄາການພົວພັນຮ່ວມມືຊ່ວຍເຫລືອເຊິ່ງກັນ ແລະ ກັນໃນໄລຍະຜ່ານມາ. ສປປ ລາວ ແລະ ສສ ຫວຽດນາມ ກໍຄື ອົງການໄອຍະການປະຊາຊົນສູງສຸດຂອງສອງປະເທດ ແມ່ນມີມູນເຊື້ອ ສາຍພົວພັນ ຮ່ວມມືຮອບດ້ານນໍາກັນມາແຕ່ດົນນານ ແລະໄດ້ໃຫ້ການຊ່ວຍເຫລືອເຊິ່ງກັນ ແລະ ກັນ ດ້ວຍດີຕະຫລອດມາ.
ຕອນບ່າຍວັນດຽວກັນ, ຄະນະຜູ້ແທນ ຫ້ອງການອົງການໄອຍະການປະຊາຊົນສູງສຸດ ຂອງລາວ ກໍໄດ້ພົບປະກັບຄະນະບັນນາທິການຂ່າວສານປົກປ້ອງກົດໜາຍ ຂອງອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ນໍາໂດຍ ສະຫາຍ ຫງວຽນ ວັນຖັ້ງ ຫົວໜ້າບັນນາທິການຂ່າວສານປົກປ້ອງກົດໜາຍ ເຊິ່ງສອງຝ່າຍຕ່າງໄດ້ແນະນໍາ ປະຫວັດຄວາມເປັນມາຂອງການສ້າງຕັ້ງ ວາລະສານ, ຂ່າວໜັງສືພິມ, ຂ່າວທາງເອເລັກໂຕນິກ ແລະ ຂ່າວທາງໂທລະພາບ ລວມທັງຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານດັ່ງກ່າວ ໃຫ້ກັນຊາບ ເຊິ່ງສອງຄະນະວາລະສານພວກເຮົາຈະໄດ້ມີການແລກປ່ຽຮ່ວມມືນໍາກັນໄລຍະຕໍ່ໄປ ເປັນຕົ້ນ ການສ້າງພະນັກງານເຮັດວຽກງານນີ້ໂດຍສະເພາະ, ພ້ອມທັງຈັດຝຶກອົບຮົມໃຫ້ແກ່ພະນັກງານ, ການສະໜອງເຄື່ອງມືທີ່ທັນສະໄໜ ປະກອບສ່ວນເຂົ້າໃນການພັດທະນາ ເຮັດໃຫ້ສອງອົງການໄອຍະການ ລາວ-ຫວຽດນາມ ມີການພັດທະນາດີຂຶ້ນເລື້ອຍໆ.
ຈາກນັ້ນ, ຄະນະຜູ້ແທນອົງການໄອຍະການປະຊາຊົນສູງສຸດລາວ ຍັງໄດ້ເຂົ້າຢ້ຽມຊົມຫໍມູນເຊື້ອວັດຖຸພັນ, ຊົມຮູບພາບການເຕີບໃຫຍ່ຂະຫຍາຍຕົວ ນັບແຕ່ມື້ສ້າງຕັ້ງ ແລະ ຜົນງານທີ່ໂດດເດັ່ນຂອງອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ມາຮອດປັດຈຸບັນ.
ຂ່າວ: ວົງເດືອນ ສຸພັນທອງ
ພາບ: ແສງພະຈັນ ຄຳມະນີ
ຂປລ
