ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຫ້ອງວ່າການສໍານັກງານນາຍົກລັດຖະມົນຕີ ຈັດຊຸດອົບຮົມວຽກງານຄຸ້ມຄອງລັດຖະກອນ

ຕອນເຊົ້າ ວັນທີ 24 ກັນຍາ 2020 ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ຈັດຊຸດຝຶກອົບຮົມ ວຽກງານການຄຸ້ມຄອງຂໍ້ມູນລັດຖະກອນ ຂອງຫ້ອງວ່າການສຳນັກງານນາຍົກລັດຖະມົນຕີ, ໂດຍການເປັນປະທານ ແລະກ່າວເປີດຂອງທ່ານ ນາງ ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າ ຫສນຍ; ມີ ທ່ານ ຄົມສັນ ໄຊຍະສານ, ຫົວໜ້າກົມຈັດຕັ້ງ ແລະ ພະນັກງານ ຫສນຍ; ວິທະຍາກອນຈາກ ກະຊວງພາຍໃນ ແລະສຳມະນາກອນ ທີ່ເຮັດວຽກກ່ຽວກັບ ການຄຸ້ມຄອງພະນັກງານ ຈາກບັນດາກົມ ທີ່ຂຶ້ນກັບ ຫສນຍ ເຂົ້າຮ່ວມ.
ຈຸດປະສົງ ຂອງການຈັດຊຸດຝຶກອົບຮົມໃນຄັ້ງນີ້ ແມ່ນເພື່ອແນະນຳ, ອະທິບາຍໃຫ້ພະນັກງານ-ລັດຖະກອນ ທີ່ຮັບຜິດຊອບຂໍ້ມຸູນລັດຖະກອນ ຂອງຕົນ ໄດ້ຮັບຮູ້ ແລະ ເຂົ້າໃຈໜ້າທີ່, ຂັ້ນຕອນການຄຸ້ມຄອງຂໍ້ມູນຢ່າງເປັນເອກະພາບ; ເພື່ອສ້າງຄວາມເຂັ້ມແຂງ ກ່ຽວກັບການເກັບກຳຂໍ້ມູນຂອງລັດຖະກອນ ໃຫ້ເປັນລະບົບ ແລະ ຖືກຕ້ອງຕາມລະບຽບການ; ເພື່ອເຮັດໃຫ້ຜູ້ທີ່ຮັບຜິດຊອບວຽກງານຄຸ້ມຄອງວຽກງານລັດຖະກອນ ຂອງແຕ່ລະພາກສ່ວນ ສາມາດເຂົ້າເຖິງແຫຼ່ງຂໍ້ມູນໄດ້ຢ່າງສະດວກ, ວ່ອງໄວ ແລະ ທັນການ; ນອກນັ້ນຍັງເຮັດໃຫ້ລະບົບການຄຸ້ມຄອງລັດຖະກອນໃນໄລຍະໃໝ່ມີຄຸນນະພາບສູງ, ເປັນລະບົບລວມສູນ, ທັງເຮັດໃຫ້ຜູ້ຮັບຜິດຊອບວຽກງານການຄຸ້ມຄອງຂໍ້ມູນລັດຖະກອນ ມີຄວາມຮູ້ຄວາມສາມາດ ແລະ ສາມາດນຳໃຊ້ເຕັກໂນໂລຊີ-ຂໍ້ມູນຂ່າວສານທີ່ທັນສະໄໝ ເຂົ້າໃນການບໍລິຫານ ແລະ ການຄຸ້ມຄອງລັດຖະກອນ ໃຫ້ມີຄວາມສະດວກ, ວ່ອງໄວ, ໂປ່ງໃສ ແລະ ຊັດເຈນ.
ທ່ານ ນາງ ທິບພະກອນ ຈັນທະວົງສາ ໄດ້ຍົກໃຫ້ເຫັນຄວາມສຳຄັນ ຂອງການຈັດຝຶກອົບຮົມ ກໍ່ຄືເນື້ອໃນທີ່ໄດ້ນໍາສະເໜີໃນຄັ້ງນີ້ ໃຫ້ຜູ້ເຂົ້າຮ່ວມໄດ້ຮັບຊາບ. ພ້ອມກັນນັ້ນທ່ານຍັງໄດ້ເນັ້ນໜັກ ໃຫ້ສຳມະນາກອນທັງໝົດ ຈົ່ງເອົາໃຈໃສ່ຄົ້ນຄວ້າ ແລະ ຖອດຖອນແລກປ່ຽນບົດຮຽນນຳບັນດາວິທະຍາກອນ ແລະ ສຳມະນາກອນດ້ວຍກັນ ເຮັດໃຫ້ບັນຫາຕ່າງໆ ມີຄວາມກະຈ່າງແຈ້ງ, ແລະ ເຂົ້າໃຈຢ່າງຖືກຕ້ອງ, ສາມາດນຳໄປຈັດຕັ້ງຜັນຂະຫຍາຍ ໃນວຽກງານຕົວຈິງ ໃຫ້ເກີດດອກອອກຜົນ. ຊຸດຝຶກອົບຮົມຄັ້ງນີ້ ໄດ້ດຳເນີນ ແຕ່ວັນທີ 24-25 ກັນຍາ 2020.
ຂ່າວ ແລະພາບໂດຍ: ຫສນຍ