ຫໍຫຼັກເມືອງ ບ້ານທ່ານາ, ເມືອງໄຊຍະບູລີ, ແຂວງ ໄຊຍະບູລີ ຕັ້ງສູງເດັ່ນຢ່າງສະ ຫງ່າທີ່ສວນຫຼັກເມືອງ,ເປັນສະຖານທີ່ສັກ ສິດ ແລະ ສັກກະລະບູຊາຂອງປະຊາຊົນຊາວແຂວງໄຊຍະບູລີກໍຄືນັກທ່ອງທ່ຽວທີ່ໄປພົບເຫັນ.
ຫໍຫຼັກເມືອງ ໄດ້ເລີ່ມທໍາການກໍ່ສ້າງມາແຕ່ຕົ້ນເດືອນມີນາ ປີ 2018 ເຊິ່ງໃຊ້ເວລາໃນການກໍ່ສ້າງເຖິງ 4 ປີ ຈຶ່ງສໍາເລັດຍ້ອນມີຫຼາຍປັດໃຈ ໂດຍສະເພາະບັນຫາການແຜ່ລະບາດຂອງພະຍາດໂຄວິດ-19, ບັນ ຫາທາງດ້ານເງິນເຟີ້ ເຮັດໃຫ້ມູນຄ່າວັດສະດຸຂອງການກໍ່ສ້າງສູງຂຶ້ນ, ແຕ່ເຖິງຢ່າງໃດກໍ່ດີ ດ້ວຍຄວາມເປັນເຈົ້າການ ແລະ ເອົາ ໃຈໃສ່ຢ່າງຕັ້ງໜ້າຂອງພາກສ່ວນທີ່ກ່ຽວ ຂ້ອງໂດຍສະເພາະບໍລິສັດ ບໍລິສັດສໍມະນີວົງ ກໍ່ສ້າງເຄຫາສະຖານຈໍາກັດຜູ້ຮັບເໝົາກໍ່ສ້າງຈຶ່ງໄດ້ເຮັດໃຫ້ໂຄງການດັ່ງກ່າວສຳ ເລັດ 100%.ຫໍຫຼັກເມືອງແຫ່ງນີ້ສ້າງຂື້ນໃນເນື້ອທີ່ສວນ 1,5 ເຮັກຕາ ມີມູນຄ່າການກໍ່ສ້າງທັງໝົດ 8 ຕຶ້ 390 ລ້ານກີບ,ຊຶ່ງ ແມ່ນທຶນງົບປະມານພັດທະນາທ້ອງຖິ່ນ ແລະ ທຶນປຸກລະດົມຂອງແຂວງ, ຫໍຫຼັກເມືອງດັ່ງກ່າວມີລັກສະນະເປັນຫໍປະສາດ, ສ້າງໃຫ້ເປັນເອກະລັກສະເພາະຕາມແບບລວດລາຍເດີມຂອງລາວ, ປະດັບປະດາໄປດ້ວຍດອກດວງ, ລວດລາຍສະທ້ອນໃຫ້ເຫັນເຖິງການດໍາລົງຊີວິດຮີດຄອງປະ ເພນີອັນດີງາມໄດ້ ແລະ ເປັນສິ່ງເອກອ້າງເຖິງເອກະລັກທາງດ້ານວັດທະນະທໍາມາລວມຢູ່ສະຖານທີ່ແຫ່ງນີ້. ຮູບຊົງຂອງຫໍຫຼັກເມືອງເປັນຫໍຜາສາດເຊິ່ງມີ 4 ໜ້າ 4 ດ້ານ, ແຕ່ລະດ້ານກວ້າງ 9 ແມັດ, ໝາຍເຖິງທິດທັງ 4 ຄື: ທິດເໜືອ, ທິດໃຕ້, ທິດຕາເວັນອອກ ແລະ ທິດຕາເວັນຕົກ, ມີຄວາມສູງ 19 ແມັດປະດັບລວດລາຍເຊິ່ງເປັນລວດລາຍທີ່ໄດ້ແບບຈາກວັດສີບຸນເຮືອງບ້ານໃຫຍ່ ເມືອງໄຊຍະບູລີ ທີ່ເປັນວັດເກົ່າແກ່, ສັກສິດ ແລະ ເປັນທີ່ສັກກາ ລະບູຊາຂອງປະຊາຊົນ. ຈອມຫໍເປັນຈອມເຈດີສູງ 4 ແມັດ, ເຊິ່ງເປັນແບບຈອມທີ່ໄດ້ມາຈາກຈອມຂອງພະທາດຫຼວງວຽງຈັນ.ມີປະຕູໂຂງ 4 ດ້ານ, ແມ່ນເປັນເອກະລັກລາວລ້ານຊ້າງເຊິ່ງໄດ້ແບບມາຈາກວັດຊຽງທອງ ນະຄອນຫຼວງພະບາງ. ມີນາກຮັກສາຈໍານວນ 2 ໂຕ, ຮັກສາທັງສອງຂ້າງ, ປົກປ້ອງຮັກສາຫໍຫຼັກເມືອງແຫ່ງນີ້ເພື່ອຄວາມຊຸ່ມເຢັນ. ຊ້າງອາລັກ ຂາ, ເຝົ້າຍາມທັງ 4 ທິດ, ຈໍານວນ 8 ໂຕ ແລະ ຊ້າງໃຫຍ່ຢູ່ທາງດ້ານໜ້າເຊິ່ງເປັນສັນຍາລັກຂອງແຂວງໄຊຍະບູລີ ຄອຍຕ້ອນຮັບແຂກຄົນທີ່ມາສັກກາລະບູຊາເບິ່ງແລ້ວມີຄວາມໂດ່ດເດັ່ນສະຫງ່າ.ເສົາຫຼັກເມືອງເຮັດດ້ວຍໄມຈັນຫອມຂະໜາດໃຫຍສູງ 9 ແມັດ, ເສັ້ນຜ່າສູນກາງ 60 ຊັງຕີແມັດ,ສະແດງເຖິງການແທກ 9 ສອກ 9 ກໍາ ຂອງເຈົ້າບ້ານ-ເຈົ້າເມືອງ, ປະກອບມີ 3 ສ່ວນ; ສ່ວນຕີນເເກະສະຫຼັກເປັນຮູບຊ້າງເຊິ່ງເປັນສັດປະຈໍາຊາດລາວອູ້ມຊູເສົາຫຼັກບ້ານຫຼັກເມືອງ. ສ່ວນກາງແກະສະຫຼັກສະແດງເຖິງວິຖີການດໍາລົງຊີວິດ, ຮີດຄອງປະເພນີຂອງປະຊາຊົນ 8 ເຜົ່າທີ່ດໍາລົງຊີວິດຢູ່ແຂວງໄຊຍະບູລີ. ສ່ວນຈອມແກະສະຫຼັກພະພຸດ ທະຮູບສະແດງເຖິງຄວາມເຊື່ອຖືກາບໄຫວ້ ບູຊາຂອງຂອງປວງຊົນທັງຫຼາຍ.
ມາຮອດປັດຈຸບັບນີ້ ຫໍຫຼັກເມືອງ ບ້ານທ່ານາ, ເມືອງໄຊຍະບູລີ, ແຂວງ ໄຊຍະບູລີ ໄດ້ສໍາເລັດການກໍ່ສ້າງຢ່າງສົມບູນ
ແລ້ວ ຊຶ່ງຈະມີພິທີມອບຮັບໂຄງການກໍ່ ສ້າງລະຫວ່າງ ບໍລິສັດສໍມະນີວົງ ກໍ່ສ້າງເຄຫາສະຖານຈໍາກັດຜູ້ຮັບເໝົາກໍ່ສ້າງ ໃຫ້ກັບພະແນກຖະແຫຼງຂ່າວ,ວັດທະນະທໍາ ແລະ ທ່ອງທ່ຽວແຂວງ ໃນວັນທີ 2 ເດືອນພະຈິກປີນີ້.ຫຼັກຈາກນັ້ນ ຈະມີພິທີສະ ຫຼອງສົມໂພດຫໍຫຼັກເມືອງ ຕັ້ງກອງບຸນ 31 ກອງ,ຕົ້ນກາລະພຶກເສີມປາລະມີ,ມີການຄົບງັນສະແດງສິນລະປະຕາມຮີດຄອງປະເພນີ 3 ມື້ 2ຄືນ.
ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ໄດ້ກ່າວວ່າ:ແຂວງ ໄຊຍະບູລີ, ເປັນແຂວງໜື່ງ ທີ່ອຸດົມສົມບູນໄປດ້ວຍຊັບໃນດິນສິນໃນນ້ຳ ມີທຳມະຊາດສວຍ ງາມ, ເປັນສູນລວມທາງດ້ານວັດທະ ນະທຳ, ປະຫວັດສາດ, ມີຮີດຄອງປະເພນີທີ່ເປັນເອກະລັກຂອງຕົນມາແຕ່ບູຮານ ນະການ, ການຄົ້ນຄ້ວາຊອກຫາປະຫວັດສາດເພື່ອຢັ້ັັງຢືນຮາກເຫົ້ງາຂອງຊົນຊາດລາວ ແລະ ອະທິບາຍໃຫ້ຂະບວນການວີວັດແຫ່ງການຂະຫຍາຍຕົວຂອງສັງຄົມບົນພຶ້ນຖານທິດສະດີ, ວີຖີວັດຖຸນິຍົມສັດຈະວິພາກ, ນັ້ນເປັນວຽກສຳຄັນທີ່ຕ້ອງໄດ້ສຶບຕໍ່ປະຕິບັດ, ສັງຄົມໃດໆກໍ່ຕາມໃນໂລກນີ້ລ້ວນແຕ່ຢາກຮູ້ປະຫວັດ ທີ່ໄປທີ່ມາຂອງຕົນເອງ, ດັ່ງນັ້ນ ຫໍຫຼັກເມືອງແຂວງໄຊຍະບູລີ ແມ່ນບົ່ງບອກເຖິງສັນຍາລັກແຫ່ງຄວາມສາມັກຄີຄວາມເປັນສີລິມຸງຄຸນຄວາມຜາສຸກ, ຄວາມອຸດົມສົມບູນຢູ່ເຢັນເປັນສຸກ ແລະ ມີຄວາມສີວີໄລທາງດ້ານຈິດໃຈ, ສັງຄົມມີຄວາມຍຸຕິທຳ ແລະ ຍັງເປັນການຢັ້ງຢືນເຖິງຄວາມອົງອາດກ້າຫານໃນການຕໍ່ສູ້ປົກປັກຮັກສາບ້ານເມືອງອີກດ້ວຍ, ຫໍຫຼັກເມືອງສ້າງຂຶ້ນໃໝ່ນີ້, ຍັງແມ່ນຫຼັກຖານໜື່ງທີ່ສຳຄັນຂອງແຂວງກໍ່ຄືປວງຊົນລາວທັງຊາດໄດ້ກາຍເປັນລັກຍາລັກສວນລວມທາງດ້ານຈິດໃຈຂອງປະຊາຊົນຊາວແຂວງ ໄຊຍະບູລີຍຸກໃໝ່ແຫ່ງຄວາມຈະເລີນສີວິໄລທັນສະໄໝຢູ່ພາຍໃຕ້ການນຳພາຂອງພັກ ແລະ ລັດຖະບານແຫ່ງ ສປປລາວ.
ໂດຍ: ວັນໄຊ ຕະວິນຍານ
