ວັນທີ 20 ມັງກອນ 2021 ທີ່ສະຖານເອກອັກຄະລັດຖະທູດ ສປປ ລາວ ປະຈຳ ສສ ຫວຽດນາມ ຄະນະປະສານງານທົ່ວປະເທດ ອະດີດທະຫານອາສາສະໝັກ ແລະ ຊ່ຽວຊານ ຫວຽດນາມຊ່ວຍການປະຕິວັດລາວນຳໂດຍ ສະຫາຍ ພົນຈັດຕະວາ ຮີ່ງດັກເຮືອງ, ຫົວໜ້າຄະນະປະສານງານທົ່ວປະເທດອະດີດທະຫານອາສາສະໝັກ ແລະ ຊ່ຽວຊານ ຫວຽດນາມຊ່ວຍການປະຕິວັດລາວ ເປັນຫົວໜ້າຄະນະ, ມີຄະນະບໍລິສັດສາຍພູຫຼວງ ເຕີຍເຈືອງເຊີນ, ຄະນະກອງພົນ 968, ຄະນະກົມພົວພັນຕ່າງປະເທດ, ກະຊວງປ້ອງກັນປະເທດຫວຽດນາມ ແລະ ກອງ 83 ໄດ້ເຂົ້າອວຍພອນຄະນະນຳ ສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ສສ ຫວຽດນາມ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວຄົບຮອບ 72 ປີ (20/01/1949-20/01/2021)
ສະຫາຍແສງເພັດ ຮຸ່ງບຸນຍວງ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ສະແດງຄວາມຂອບໃຈຢ່າງຈິງໃຈ, ຊົມເຊີຍ ແລະ ຕີລາຄາສູງ ຕໍ່ຜົນງານ ແລະການເຄື່ອນໄຫວຂອງຄະນະປະສານງານທົ່ວປະເທດ ອະດີດທະຫານອາສາສະໝັກ ແລະ ຊ່ຽວຊານ ຫວຽດນາມຊ່ວຍການປະຕິວັດລາວ ທີ່ໄດ້ໃຫ້ການຊ່ວຍເຫຼືອລາວໃນຕະຫຼອດໄລຍະຜ່ານມາ, ເຊິ່ງເປັນການປະກອບສ່ວນເຂົ້າໃນການເພີ່ມພູຄູນສ້າງສາຍພົວພັນມິດຕະພາບອັນຍິ່ງໃຫ່ຍ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ, ສອງກອງທັບ ແລະປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ນັບມື້ຂຽວສົດງົດງາມ ແລະ ແຕກດອກອອກຜົນຍິ່ງໆຂື້ນ.
ສະຫາຍເອກອັກຄະລັດຖະທູດ ຜູ້ມີອໍານາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ຢືນຢັນຈະເຮັດສຸດຄວາມສາມາດຂອງຕົນ ເພື່ອປະກອບສ່ວນອັນສຳຄັນເຂົ້າໃນການເພີ່ມພູນຄູນສ້າງ, ຮັດແໜ້ນສາຍພົວພັນ ລະຫວ່າງ ສອງຊາດລາວ-ຫວຽດນາມເວົ້າລວມ, ເວົ້າສະເພາະກໍແມ່ນ ສະຖານທູດລາວ ແລະ ຄະນະປະສານງານທົ່ວປະເທດ ອະດີດທະຫານອາສາສະໝັກ ແລະ ຊ່ຽວຊານ ຫວຽດນາມຊ່ວຍການປະຕິວັດລາວ ແລະ ບັນດາກົມກອງກໍຄືກົມພົວພັນຕ່າງປະເທດ, ກະຊວງປ້ອງກັນປະເທດ ຫວຽດນາມ ພ້ອມກັນນັ້ນ ກໍຈະເອົາໃຈໃສ່ໃນການສຶກສາອົບຮົມໃຫ້ຄົນລຸ້ນຫຼັງ ກໍຄືບັນດານັກສຶກສາລາວ ທີ່ກຳລັງສຶກສາຮໍ່າຮຽນຢູ່ ຫວຽດນາມ ໄດ້ຮັບຮູ້ ແລະເຂົ້າໃຈແຈ້ງຕື່ມຕໍ່ສາຍພົວພັນມິດຕະພາບອັນຍິ່ງໃຫຍ່ນີ້.
ສະຫາຍເອກອັກຄະລັດຖະທູດຍັງໄດ້ຖືໂອກາດນີ້ອວຍພອນໄຊ ມາຍັງສະຫາຍ ຫົວໜ້າຄະນະປະສານງານທົ່ວປະເທດ ອະດີດທະຫານອາສາສະໝັກ ແລະ ຊ່ຽວຊານ ຫວຽດນາມຊ່ວຍການປະຕິວັດລາວ ພ້ອມດ້ວຍພະນັກງານທຸກຖ້ວນໜ້າໃນສະມາຄົມໃນໂອກາດປີໃໝຫວຽດນາມໃກ້ຈະມາເຖິງນີ້ ຈົ່ງມີສຸຂະພາບແຂງແຮງ, ມີຄວາມຜາສຸກ ພ້ອມກັນເປັນຜູ້ສືບຕໍ່ອົບຮົມໃຫ້ຄົນຮຸ້ນຫຼັງຮັບຮູ້ ແລະ ເຂົ້າໃຈ ເຖິງມູນເຊື້ອອັນດີງາມຂອງສອງຊາດພວກເຮົາ, ອວຍພອນ ໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ ຈົ່ງຂຽວສົດງົດງາມ ແລະ ໝັ້ນຄົງທະນົງແກ່ຕະຫຼອດກາລະນານ.
ກ່ອນໜ້ານີ້ ວັນທີ 19/01/2021 ທ່ານເອກອັກຄະລັດຖະທູດກໍໄດ້ຕ້ອນຮັບຄະນະສະມາຄົມສາຍພູຫຼວງເສັ້ນທາງໂຮ່ຈີມີນ ນຳໂດຍສະຫາຍ ພົນຈັດຕະວາ ວໍເຊີ, ປະທານ ສະມາຄົມ ສາຍພູຫຼວງເສັ້ນທາງໂຮ່ຈີມີນ.
(ຂ່າວ,ພາບ: ໂອລຳ )
Loading...