ຕອນເຊົ້າວັນທີ 27 ມັງກອນ 2021, ທີ່ຫ້ອງປະຊຸມຄະນະປະຈໍາສະພາປະຊາຊົນແຂວງ ທີມງານອະນຸກໍາມະການງົບປະມານ ຂອງຄະນະກໍາມະການເລືອກຕັ້ງລະດັບຊາດ ນໍາໂດຍທ່ານ ບຸນປອນ ສີສຸລາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກໍາມະການອະນຸກໍາມະການງົບປະມານ, ຜູ້ຊີ້ນໍາໜ່ວຍງານຄຸ້ມຄອງລາຍຮັບ-ລາຍຈ່າຍເງິນສົດ) ພ້ອມດ້ວຍຄະນະ ລົງເຄື່ອນໄຫວຊຸກຍຸ້, ຕິດຕາມກວດກາ ການນໍາໃຊ້ງົບປະມານເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ທີ່ແຂວງຜົ້ງສາລີ; ໂດຍການຕ້ອນຮັບຂອງທ່ານ ທ່ານ ບົວທອງ ອຸແສງຄໍາ ປະທານສະພາປະຊາຊົນແຂວງ (ຮອງປະທານຄະນະກໍາມະການເລືອກຕັ້ງຂັ້ນແຂວງ); ເຂົ້າຮ່ວມມີ ທ່ານ ປອ ຈັນສີ ແສງສົມພູ ຮອງປະທານສະພາປະຊາຊົນແຂວງ, (ຫົວໜ້າອະນຸກໍາມະການເລຂານຸການ), ທ່ານ ປອ ວັນໄຊ ສຸກສັນ ຫົວໜ້າພະແນກການເງິນແຂວງ (ຫົວໜ້າອະນຸກໍາມະການງົບປະມານ) ແລະ ບັນດາທ່ານ ກໍາມະການງົບປະມານຂັ້ນແຂວງ ເຂົ້າຮ່ວມ.

ການລົງເຄື່ອນໄຫວຂອງຄະນະທີມງານໃນຄັ້ງນີ້ ກໍເພື່ອຮັບປະກັນໃຫ້ແກ່ການຄຸ້ມຄອງ, ນໍາໃຊ້ງົບປະມານຮັບໃຊ້ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ໃຫ້ມີຄວາມຖືກຕ້ອງ, ສອດຄ່ອງກັບແຜນງົບປະມານຂອງທ້ອງຖິ່ນ ທີ່ໄດ້ກໍານົດໄວ້ ໃນຄໍາແນະນໍາ ສະບັບເລກທີ 09/ອກງມ, ລົງວັນທີ 24 ພະຈິກ 2020 ແລະ ຄໍາແນະນໍາເພີ່ມເຕີມ ສະບັບເລກທີ 49/ອກງມ, ລົງວັນທີ 24 ທັນວາ 2020; ເພື່ອເປັນຂໍ້ມູນລາຍງານໃຫ້ແກ່ຄະນະກໍາມະການເລືອກຕັ້ງລະດັບຊາດ.

ທີ່ປະຊຸມໄດ້ຮັບຟັງທ່ານ ປອ ວັນໄຊ ສຸກສັນ ລາຍງານຫຍໍ້ສະພາບການຈັດຕັ້ງປະຕິບັດງົບປະມານໃນໄລຍະຜ່ານມາຂອງຄະນະກໍາມະການເລືອກຕັ້ງຂັ້ນແຂວງ ເປັນຕົ້ນ: ສະພາບການຄຸ້ມຄອງ, ນໍາໃຊ້ງົບປະມານຮັບໃຊ້ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຊຶ່ງທ່ານກໍໄດ້ຍົກໃຫ້ເຖິງຂໍ້ສະດວກ, ຂໍ້ຫຍຸ້ງຍາກໃນການຈັດຕັ້ງປະຕິບັດ.

Loading...