ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີປະກາດສູນກໍ່ສ້າງ ແລະ ອົບຮົມວິຊາຊີບສາທາລະນະສຸກຂອງແຂວງອັດຕະປື ເປັນໂຮງຮຽນສາທາລະນະສຸກ ແຂວງ ໃນວັນທີ 1 ກໍລະກົດ 2024
ໂດຍການເຂົ້າຮ່ວມຂອງ ທ່ານ ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະສະສຸກ, ທ່ານ ບຸນເສີດ ເສດທິລາດ ຮອງເຈົ້າແຂວງໆອັດຕະປື, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ດຣ. ນາງ ພູເງິນ ຈະເລີນຝົນ ຫົວໜ້າ ສູນກໍ່ສ້າງ ແລະ ອົບຮົມວິຊາຊີບສາທາລະນະສຸກ ແຂວງອັດຕະປື ໄດ້ຜ່ານປະຫວັດຄວາມເປັນມາ ຂອງສູນດັ່ງກ່າວ ຊຶ່ງໄດ້ເລີ່ມກໍ່ສ້າງ ແລະ ເປີດນໍາໃຊ້ມາແຕ່ປີ 2014 ໂດຍໄດ້ສ້ອມແປງເອົາໂຮງໝໍແຂວງຫລັງເກົ່າມາເປັນສູນ, ໄລຍະນັ້ນໄດ້ເປີດການຮຽນ-ການສອນຫລັກສູດທໍາອິດ ແມ່ນພະຍາບານຊັ້ນກາງສາຍຕໍ່ເນື້ອງລະບົບ 1 ປີ ໃນສົກຮຽນ 2013-2014 ມີນັກສືກສາ 34 ຄົນ ຍິງ 30 ຄົນ, ປີ 2015-216 ໄດ້ດໍາເນີນການຮຽນ-ການສອນຫລັກສູດແພດບ້ານ ໄລຍະ 6 ເດືອນ 1 ຮຸ່ນ ມີນັກສຶກສາ 20 ຄົນ ຍິງ 12 ຄົນ ແລະ ຫລັກສູດຊັ້ນກາງສາຍກົງ ປີ 6 ເດືອນ, ມີ 102 ໜ່ວຍກິດ ມີນັກສຶກສາ 68 ຄົນ ແລະ ມາຮອດປັດຈຸບັນໄດ້ຮັບການຕົກລົງຂອງລັດທະມົນຕີກະຊວງສາທາລະນະສຸກ ອະມັດໃຫ້ເປີດການຮຽນ-ການສອນຫລັກສູດພະຍາບານຊັ້ນສູງຕໍ່ເນືອງ ມີ 3 ຮຸ່ນ ໂດຍມີນັກສືກສາທັງໝົດ 53 ຄົນ ຍິງ 44 ຄົນ, ຮຸ່ນທີໜຶ່ງຈົບໄປແລ້ວ 17 ຄົນ, ຮຸ່ນທີ ສອງ 20 ຄົນ ແລະ ຮຸ່ນທີ 3 ຍັງສືບຕໍ່ການຮຽນ-ການສອນ ລວມການສຶກສາແຕ່ລະຮຸ່ນທີ່ເຂົ້າມາສຶກສາຢູ່ສູນກໍ່ສ້າງ ແລະ ອົບຮົມວິຊາຊີບສາທາລະນະສຸກແຂວງອັດຕະປື ທັງໝົດຈໍານວນ 290 ກວ່າຄົນ ຍິງ 100 ກວ່າຄົນ.
ໂອກາດນີ້, ທ່ານ ດຣ ບຸນແຝງ ພູມມະໄລສິດ ກໍໄດ້ແຈ້ງຈຸດປະສົງໃນການມາເຄື່ອນໄຫວໃນຄັ້ງນີ້ ເພື່ອເປັນການຢ້ຽມຢາມ ແລະ ຕິດຕາມຊຸກຍູ້ໂຮງໝໍເມືອງສະໝາມໄຊ ພ້ອມປູກຕົ້ນໄມ້ ໂດຍມີ ປະເພດ ຕົ້ນໝາກມ່ວງ, ຕົ້ນໄມ້ດູ່ ຢູ່ບໍລິເວນອ້ອມຂ້າງໂຮງໝໍ ແລະ ຖໍ້າທ່ານຄໍາໄຕ ເພື່ອການສ້າງຂະບວນການປູກຕົ້ນໄມ້ໃນຄັ້ງນີ້ ທັງນີ້ກໍເພື່ອເປັນການປູກຈິດສໍານຶກໃຫ້ແກ່ພະນັກງານ-ແພດໝໍ ເຫັນໄດ້ເຖິງຄວາມໝາຍ ຄວາມສໍາຄັນຂອງການຟື້ນຟູປ່າໄມ້ ໃຫ້ເປັນກົມກອງສີຂຽວ, ມີສະຕິ, ຮູ້ຫວງແຫນ ແລະ ເປັນເຈົ້າການປົກປັກຮັກສາສິ່ງແວດລ້ອມ, ຄຸ້ມຄອງ, ປົກປັກຮັກສາ ແລະ ປູກຕົ້ນໄມ້ທົດແທນຕົ້ນໄມ້ທີ່ເສຍໄປ ແລະ ເພື່ອສ້າງໃຫ້ກົມກອງມີຄວາມອຸດົມສົມບູນ, ເປັນກົມກອງຮົ່ມເຢັນ, ກາຍເປັນຄ້າຍຄູສີຂຽວເປັນລະບຽບຮຽບຮ້ອຍສະອາດຈົບງາມ.
ຂ່າວ: ບັງອອນ