ໄລຍະ 5 ເດືອນປີ 2024 ແຂວງ ອັດຕະປື ໄດ້ໂຄສະນາດຶງດູດນັກທ່ອງທ່ຽວ ທັງພາຍໃນ, ນັກທ່ອງທ່ຽວຊາຍແດນ ແລະ ນັກທ່ອງທ່ຽວສາກົນ ເຂົ້າມາທ່ອງທ່ຽວພາຍໃນແຂວງ ໄດ້ທັງໝົດ 6 ໝື່ນ 5.547 ຄົນ, ທຽບໃສ່ແຜນການປີ, ປະຕິບັດໄດ້ 49,22 %, ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 17,64 % ແລະ ກະຈາຍລາຍໄດ້ທັງໝົດ 27 ຕື້ກີບ, ທຽບໃສ່ແຜນການປະຕິບັດໄດ້ 55,69 %, ຖ້າທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 12%.
ທ່ານ ພອນສະຫວັນ ໃສທອງດ້ວງ ຫົວໜ້າຫ້ອງການບໍລິຫານພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງອັດຕະປື ລາຍງານຕໍ່ກອງປະຊຸມສະຫຼຸບວຽກງານ 6 ເດືອນ ຕົ້ນປີ ແລະ ວາງທິດທາງແຜນການ 6 ເດືອນທ້າຍປີ ຈັດຂຶ້ນເມື່ອວັນທີ 25 ກໍລະກົດ 2024 ນີ້ ໃຫ້ຮູ້ວ່າ: ໄລຍະຜ່ານມາພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ອັດຕະປື ໄດ້ສໍາເລັດການຈັດຕັ້ງປະຕິບັດຫຼາຍວຽກງານສໍາຄັນ ເພື່ອກະກຽມໃຫ້ແກ່ການເປີດປີທ່ອງທ່ຽວລາວ 2024 ຂອງແຂວງ,
ໃນນີ້ ໄດ້ຄົ້ນຄວ້າສະເໜີແຂວງ ອະນຸມັດດ້ານນິຕິກຳ ແລະ ສັງລວມເອກະສານຕ່າງໆຕິດພັນກັບງານສະເຫຼີມສະຫຼອງປີທ່ອງທ່ຽວລາວ 2024 ຂອງແຂວງ ອັດຕະປື ສໍາເລັດໂດຍພື້ນຖານ, ພ້ອມທັງຊຸກຍູ້ບັນດາເມືອງຈັດກິດຈະກຳ ເປີດປີທ່ອງທ່ຽວລາວ 2024 ສໍາເລັດແລ້ວ 2 ເມືອງ ຄື: ເມືອງສະໜາມໄຊ ແລະ ເມືອງພູວົງ, ໄດ້ສໍາເລັດການອອກຂໍ້ຕົກລົງຂອງເຈົ້າແຂວງ ວ່າດ້ວຍການກຳນົດຂອບເຂດເນື້ອທີ່ດິນແຫຼ່ງທ່ອງທ່ຽວ 3 ແຫ່ງຂອງ ເມືອງໄຊເສດຖາ ເພື່ອສະຫງວນເປັນເຂດການທ່ອງທ່ຽວ, ໄດ້ເອົາໃຈໃສ່ຈັດສັນ, ບູລະນະແຫຼ່ງທ່ອງທ່ຽວຕາດແຊພະ, ແຊປ້ອງໄລ ເມືອງສະໜາມໄຊ ຄືນໃໝ່ ເປັນຕົ້ນ: ໄດ້ສົມທົບກັບພາກສ່ວນກ່ຽວຂ້ອງຈັດກອງປະຊຸມປຶກສາຫາລືແກ້ໄຂບັນຫາໂຄງການສໍາປະທານພັດທະນາແຫຼ່ງທ່ອງທ່ຽວ ພ້ອມທັງອອກຂໍ້ຕົກລົງຂອງເຈົ້າແຂວງ ວ່າດ້ວຍການແຕ່ງຕັ້ງຄະນະຮັບຜິດຊອບປະເມີນຜົນການລົງທຶນພັດທະນາແຫຼ່ງທ່ອງທ່ຽວ ຕາດແຊພະ, ແຊປ້ອງໄລ, ໄດ້ຂື້ນບັນຊີແຫຼ່ງທ່ອງທ່ຽວ ປະຈຸບັນທົ່ວແຂວງ ມີແຫຼ່ງທ່ອງທ່ອງທ່ຽວທັງໝົດ 90 ແຫ່ງ, ແຫຼ່ງທ່ອງທ່ຽວທຳມະຊາດ 61 ແຫ່ງ, ປະຫວັດສາດ 13 ແຫ່ງ ແລະ ວັດທະນະທໍາ 16 ແຫ່ງ, ສຳເລັດການສໍາຫຼວດເສັ້ນທາງການລ່ອງເຮືອຕາມລໍານໍ້າເຊກອງ ເພື່ອສຶກສາຄວາມເປັນໄປໄດ້ໃນການພັດທະນາເປັນແຫຼ່ງທ່ອງທ່ຽວ, ໄດ້ສົມທົບກັບພາກສ່ວນກ່ຽວຂ້ອງເຄື່ອນໄຫວຕິດຕາມ, ກວດກາ ແລະ ຊຸກຍູ້ການດໍາເນີນທຸລະກິດ ການທ່ອງທ່ຽວໃນການຫັນເຂົ້າສູ່ລະບຽບກົດໝາຍ ຕິດພັນກັບການແກ້ໄຂປະກົດການຫຍໍ້ທໍ້ໃນຂະແໜງການທ່ອງທ່ຽວ, ໄດ້ອອກໃບຢັ້ງຢືນການສືບຕໍ່ດໍາເນີນທຸລະກິດ ປະຈຳປີ 2024 ໄດ້ຈໍານວນ 16 ຫົວໜ່ວຍ.
ທ່ານ ພອນສະຫວັນ ໃສທອງດ້ວງ ຫົວໜ້າຫ້ອງການບໍລິຫານພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງອັດຕະປື ໄດ້ໃຫ້ຮູ້ຕື່ມວ່າ: ໃນຕໍ່ໜ້າທາງຂະແໜງການທ່ອງທ່ຽວ ຈະສຸມໃສ່ການຈັດຕັ້ງປະຕິບັດແຜນການເປີດປີທ່ອງທ່ຽວລາວ 2024 ຂອງແຂວງໃຫ້ສໍາເລັດ, ສູ້ຊົນສໍາຫຼວດປັກຫຼັກໝາຍແຫຼ່ງທ່ອງທ່ຽວ ແລະ ອອກໃບຕາດິນຄຸ້ມຄອງສິດນໍາໃຊ້ທີ່ດິນໃຫ້ໄດ້ 2 ແຫ່ງ, ສ້າງແຜນພັດທະນາການທ່ອງທ່ຽວ ຂອງເມືອງໄຊເສດຖາ ໃຫ້ໄດ້ 3 ແຫ່ງ ຄື: ດົງຫໍ, ແກ້ງພະພອງ ແລະ ຮ່ອງຮອຍເມືອງມະລະອົງການ, ຊຸກຍູ້ກິດຈະການພັດທະນາຂອງບໍລິສັດທີ່ໄດ້ຮັບການອະນຸຍາດ ໃຫ້ປັບປຸງພັດທະນາແຫຼ່ງທ່ອງທ່ຽວ ໃຫ້ໄດ້ມາດຕະຖານແຫຼ່ງທ່ອງທ່ຽວຂອງລາວ, ສົມທົບກັບອໍານາດການປົກຄອງແຂວງ, ເມືອງ, ບ້ານ ແລະ ກຸ່ມຜະລິດຕະພັນຂອງບ້ານ ເພື່ອປັບປຸງປະຍຸກຜະລິດຕະພັນຂອງທ້ອງຖິ່ນ ໃຫ້ມີຄວາມທັນສະໄໝ ແຕ່ຍັງຮັກສາຄວາມເປັນເອກະລັກໄວ້ ແລະ ອື່ນໆ.
