ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 7 ພຶດສະພາ 2024, ທີ່ສະໂມສອນກອງບັນຊາການທະຫານແຂວງ ອັດຕະປື, ໄດ້ເປີດຊຸດຝຶກອົບຮົມວຽກງານປຸກລະດົມການປ້ອງກັນ ແລະ ຫຼຸດຜ່ອນຄວາມສ່ຽງຈາກໄພພິບັດທາງທໍາມະຊາດ ໃຫ້ພະນັກງານພະແນກການຂອງແຂວງ ແລະ ກໍາລັງ ປກຊ-ປກສ ແຂວງ, ພາຍໃຕ້ໂຄງການສ້າງຄວາມເຂັ້ມແຂງໃຫ້ຊຸມຊົນໃນການຮັບມືກັບການປ່ຽນແປງດິນຟ້າອາກາດ, ການປ້ອງກັນ ແລະ ຫຼຸດຜ່ອນຄວາມສ່ຽງຈາກໄພພິບັດ, ໂດຍພາຍໃຕ້ການເປັນປະທານຂອງທ່ານ ບຸນເສີດ ເສດທິລາດ ຮອງເຈົ້າແຂວງ ອັດຕະປື, ມີຄະນະທີມງານຈາກກະຊວງປ້ອງກັນປະເທດ ພ້ອມດ້ວຍຄະນະພັກ-ຄະນະບັນຊາຈາກ 5 ຫ້ອງກອງບັນຊາການທະຫານແຂວງ, ຕະຫຼອດຮອດພະນັກງານຫຼັກແຫຼ່ງຈາກພະແນກການທີ່ກ່ຽວຂ້ອງພາຍໃນແຂວງເຂົ້າຮ່ວມ.
ໂດຍປະຕິບັດຕາມແນວທາງນະໂຍບາຍຂອງ ພັກ-ລັດ ກໍ່ຄືແຜນພັດທະນາເສດຖະກິດ-ສັງຄົມແຫ່ງຊາດ ຕາມທິດສີຂຽວ ແລະ ຍືນຍົງໃນທົ່ວປະເທດ ເພື່ອຫຼຸດຜ່ອນຄວາມສ່ຽງຈາກໄພພິບັດ ສູ່ການພັດທະນາແບບຍືນຍົງ ເຊິ່ງກະຊວງປ້ອງກັນປະເທດ ກໍ່ໄດ້ນໍາເອົາແຜນດັ່ງກ່າວມາຈັດຕັ້ງປະຕິບັດເປັນໂຄງການ ເພື່ອເປີດການອົບຮົມໃຫ້ພະນັກງານພະແນກການທີ່ກ່ຽວຂ້ອງຂອງແຂວງ, ເມືອງ ແລະ ກໍາລັງ ປກຊ-ປກສ ໃນທົ່ວປະເທດ ໃນການສ້າງຄວາມເຂັ້ມແຂງໃຫ້ຊຸມຊົນ ເພື່ອຮັບມືກັບການປ່ຽນແປງດິນຟ້າອາກາດ ແລະ ຫຼຸດຜ່ອນຄວາມສຽງຈາກໄພພິບັດ.
ໃນໂອກາດດັ່ງກ່າວທ່ານ ບຸນເສີດ ເສດທິລາດ ຮອງເຈົ້າແຂວງ ອັດຕະປື ໄດ້ກ່າວມີຄໍາເຫັນ ໂດຍເນັ້ນໜັກທຸກພາກສ່ວນທີ່ເຂົ້າຮ່ວມອົບຮົມ ຈົ່ງພ້ອມກັນຮຽນຮູ້ຢ່າງເລິກເຊິ່ງຕໍ່ແນວທາງການຈັດຕັ້ງປະຕິບັດວຽກງານຂອງໂຄງການ ເພື່ອນໍາໄປໂຄສະນາປຸກລະດົມໃຫ້ປະຊາຊົນມີຄວາມຮັບຮູ້ ແລະ ເຂົ້າໃຈ ເຫັນໄດ້ຄວາມສໍາຄັນຂອງວຽກປ້ອງກັນ ແລະ ຫຼຸດຜ່ອນຄວາມສ່ຽງຈາກໄພພິບັດທາງທໍາມະຊາດ. ຈາກນັ້ນຜູ້ເຂົ້າຮ່ວມອົບຮົມ ໄດ້ຮັບຟັງບົດຮຽນກ່ຽວກັບໄພພິບັດທາງທໍາມະຊາດ ແລະ ມະນຸດສ້າງຂຶ້ນ, ຄວາມສ່ຽງຈາກໄພພິບັດ, ຜົນກະທົບ, ການປະເມີນ ແລະ ການຫຼຸດຜ່ອນຄວາມສ່ຽງຈາກໄພພິບັດ, ແນວທາງປະຕິບັດ, ການປ້ອງກັນ, ການກຽມຄວາມພ້ອມ, ການຮັບມືກັບສະຖານະການສຸກເສີນ ແລະ ການປັບຕົວ, ນອກຈາກນັ້ນກໍ່ຍັງມີແນວທາງການຟື້ນຟູ ແລະ ການພັດທະນາພາຍຫຼັງເກີດໄພພິບັດ.
ທັງນີ້ ກໍ່ເພື່ອເຮັດໃຫ້ພະນັກງານຫຼັກແຫຼ່ງພະແນກການທີ່ກ່ຽວຂ້ອງຂອງແຂວງ ແລະ ກໍາລັງ ປກຊ-ປກສ ແຂວງ ອັດຕະປື ໄດ້ຮັບຮູ້ ແລະ ເຂົ້າໃຈຕໍ່ຜົນທະທົບຂອງໄພພິບັດ, ແຜນການຈັດຕັ້ງປະຕິບັດໃນການແກ້ໄຂຢ່າງຖືກຕ້ອງ ແລະ ສ່ອດຄ່ອງ ນໍາເອົາໄປຜັນຂະຫຍາຍໃນກົມກອງ, ຮາກຖານ, ຈຸດສຸມກຸ່ມບ້ານ ກໍ່ຄືບັນດາເມືອງ ເປົ້າໝາຍທີ່ມີຄວາມສ່ຽງຕໍ່ການເກີດໄພພິບັດ ເຫັນໄດ້ເຖິງຄວາມຈໍາເປັນ ແລະ ສໍາຄັນຂອງວຽກງານປ້ອງກັນ ແລະ ຫຼຸດຜ່ອນຄວາມສ່ຽງຈາກໄພພິບັດທາງທໍາມະຊາດ ອັນເນື່ອງມາຈາກການຕັດໄມ້ທໍາລາຍປ່າຢ່າງຊະຊາຍ ແລະ ການທໍາລາຍສິ່ງແວດລ້ອມດ້ວຍຮູບແບບຕ່າງໆ ເຊິ່ງສິ່ງດັ່ງກ່າວທີ່ມະນຸດເຮົາສ້າງຂຶ້ນແມ່ນລ້ວນແລ້ວແຕ່ມະນຸດເຮົາເອງເປັນຜູ້ຮັບເຄາະກໍານັ້ນ.
ຂ່າວ: ແສງຫຼ້າ ກຸວົງສາ ຂ,ອັດຕະປື