ວັນທີ 15 ພະຈິກ 2022 ນີ້, ແຂວງ ອັດຕະປື ໄດ້ຈັດຊຸດອົບຮົມຫຼັກສູດການບໍລິຫານລັດໃຫ້ແກ່ພະນັກງານຫຼັກແຫຼ່ງຂອງແຂວງຂຶ້ນທີ່ສະໂມສອນຫ້ອງວ່າການເມືອງ ສາມັກຄີໄຊ ໃຫ້ກຽດເຂົ້າຮ່ວມເປັນປະທານຂອງທ່ານ ບຸນເສີດ ເສດທິລາດ, ຮອງເຈົ້າແຂວງ, ມີທ່ານນາງ ຈັນທາ ອ່ອນໄຊວຽງ, ຫົວໜ້າສະຖາບັນ ຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ ກະຊວງພາຍໃນ, ມີພະນັກງານຫຼັກແຫຼ່ງຈາກພະແນກການ, ອົງການທຽບເທົ່າອ້ອມຂ້າງແຂວງ, ແລະ ຫົວໜ້າຫ້ອງການພາຍໃນ 5 ຕົວເມືອງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື ກ່າວວ່າ: ການຈັດຊຸດອົບຮົມໃນຄັ້ງນີ້, ແມ່ນມີຄວາມໝາຍສຳຄັນຍິ່ງເພາະໄລຍະຜ່ານມາແຂວງໄດ້ເອົາໃຈໃສ່ຊີ້ນໍາ-ນໍາພາ ທຸກຂະແໜງການໃນການສ້າງແຜນກໍານົດພະນັກງານນໍາພາຄຸ້ມຄອງຢູ່ໃນຄວາມຮັບຜິດຊອບຂອງຕົນ ແລະ ໄດ້ເອົາໃຈໃສ່ບໍາລຸງ, ກໍ່ສ້າງຍົກລະດັບ ແລະ ຝຶກອົບຮົມພະນັກງານລັດຖະກອນຢ່າງຕໍ່ເນື່ອງ, ແຕ່ເຖິງຢ່າງໃດກໍຕາມການສ້າງຂີດຄວາມສາມາດໃຫ້ແກ່ພະນັກງານລັດຖະກອນໃນໄລຍະຜ່ານມາກໍຍັງບໍ່ທັນສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການ ເນື່ອງມາຈາກຫຼາຍປັດໃຈ; ດ້ວຍຄວາມເປັນຫ່ວງເປັນໄຍຂອງພັກ ແລະ ລັດຖະບານ ມື້ນີ້ກະຊວງພາຍໃນສົມທົບກັບແຂວງ ອັດຕະປື ຈິ່ງໄດ້ຈັດກອງປະຊຸມຝຶກອົບຮົມຫຼັກສູດບໍລິຫານຄຸ້ມຄອງລັດໃຫ້ແກ່ພະນັກງານຫຼັກແຫຼ່ງຂອງແຂວງ ເຊິ່ງບັນດາທ່ານຈະໄດ້ຮຽນຮູ້ຫຼາຍບົດຮຽນຈາກທິມງານຄູຝຶກເປັນຕົ້ນ: ວຽກງານການບໍລິຫານລັດໃນລະບົບການເມືອງ, ການນໍາພາ-ຄຸ້ມຄອງ, ການບໍລິຫານການປ່ຽນແປງເພື່ອຄວາມກ້າວໜ້າ; ການຄຸ້ມຄອງພະນັກງານ-ລັດຖະກອນ; ການສ້າງເອກະສານທາງການ; ຈັນຍາບັນພະນັກງານລັດ, ຄ່ານິຍົມ ແລະ ບົດຮຽນອື່ນອີກຈໍານວນໜຶ່ງທີ່ທາງທິມງານຄູຝຶກຈະໄດ້ນໍາສະເໜີຕໍ່ພວກທ່ານ. ກອງປະຊຸມຄັ້ງນີ້ຈະດໍາເນີນໄປເປັນເວລາ 4 ວັນເຕັມ, ຊຶ່ງຈະລົງເລິກໃນການຄົ້ນຄວ້າ, ສົນທະນາ, ປຶກສາຫາລື ແລະ ແລກປ່ຽນດ້ານວິຊາການຈາກທິມງານຄູຝຶກ ແລະ ສໍາມະນາກອນທີ່ເຂົ້າຮ່ວມ. ພ້ອມນີ້ທ່ານຍັງໄດ້ຮຽກຮຽກຮ້ອງມາຍັງ ສໍາມະນາກອນທີ່ເຂົ້າຮ່ວມຝຶກອົບຮົມ ຈົ່ງພ້ອມກັນຄົ້ນຄວ້າເພື່ອຊອກໃຫ້ເຫັນບັນຫາທີ່ເປັນອຸປະສັກ ແລະ ສິ່ງທ້າທາຍໃນການປະຕິບັດວຽກງານຢູ່ໃນຂະແໜງການຂອງຕົນ ເພື່ອແລກປ່ຽນຄໍາຄິດຄໍາ ເຫັນ ແລະ ນໍາເອົາບົດຮຽນໄປຈັດຕັ້ງຜັນຂະຫຍາຍໃຫ້ເກີດດອກອອກຜົນຢ່າງເປັນຮູບປະທໍາ.
ພາບ-ຂ່າວ: ຄຳສະໝອນ ວອນອິນທີວົງ
ພະແນກພາຍໃນແຂວງ ອັດຕະປື
