ອັດຕະປື ມອບ-ໂອນອົງການເກັບກູ້ລະເບີດໄປຂື້ນກັບພະແນກການຕ່າງປະເທດແຂວງ

ວັນທີ 09 ສິງຫາ 2024 ທີ່ຫ້ອງປະຊຸມຂອງ ພະແນກແຮງ ງານ ແລະ ສະຫວັດດີການ ສັງຄົມ ແຂວງ ອັດຕະປື ໄດ້ຈັດພິທີມອບ-ໂອນ ວຽກຄະນະກຳມະການຄຸ້ມຄອງເພື່ອແກ້ໄຂບັນຫາລະເບີດບໍ່ທັນແຕກ ຂັ້ນແຂວງ ຈາກພະແນກ ແຮງງານ ແລະ ສະ ຫວັດດີການສັງຄົມ ແຂວງ ໄປຂື້ນກັບພະແນກການຕ່າງປະເທດແຂວງ ໃນພິທີໂດຍການເປັນປະທານຂອງ ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື ທັງເປັນປະທານ ຄະນະກຳມະ ການຄຸ້ມຄອງເພື່ອແກ້ໄຂບັນຫາລະເບີດບໍ່ທັນແຕກຂັ້ນແຂວງ.

ໃນພິທີດັ່ງກ່າວໃຫ້ກຽດມອບໂດຍ ແມ່ນ ທ່ານ ຈິດປະສົງ ສິງສະຫວັດ ຫົວໜ້າພະແນກ ແຮງງານ ແລະ ສະຫວັດດີການສັງຄົມ ແຂວງອັດຕະປື ແລະ ທ່ານ ປອ ຄໍາພັນ ແກ້ວມະນີວົງ ຫົວໜ້າພະແນກການຕ່າງປະເທດ ເຊິ່ງມີຄະນະປັບປຸງ ກົງຈັກການຈັດຕັ້ງຂັ້ນແຂວງ ແລະ ຄະນະກຳມະການຄຸ້ມຄອງເພື່ອແກ້ໄຂບັນຫາລະເບີດບໍ່ທັນແຕກຂັ້ນແຂວງເຂົ້າຮ່ວມ ເປັນສັກຂີພະຍານ.

ການມອບ-ໂອນວຽກຄະນະກຳມະການຄຸ້ມຄອງເພື່ອແກ້ໄຂບັນຫາລະເບີດບໍ່ທັນແຕກຄັ້ງນີ້: ສໍາລັບຂັ້ນແຂວງ, ແມ່ນມອບ -ໂອນ ວຽກງານຄະນະກຳມະການຄຸ້ມຄອງເພື່ອແກ້ໄຂບັນຫາລະເບີດທີ່ບໍ່ທັນແຕກຂັ້ນແຂວງ, ສໍາລັບຂັ້ນເມືອງການມອບ-ໂອນ ແມ່ນຫ້ອງການແຮງງານ ແລະ ສະຫວັດດີການສັງຄົມເມືອງ ໄປຂຶ້ນກັບການຄຸ້ມຄອງ, ປະສານງານ ຂອງຫ້ອງ ວ່າການເມືອງ ເຊິ່ງມອບໃຫ້ເມືອງຄົ້ນຄ້ວາ ແລະ ຈັດຕັ້ງການມອບ-ໂອນຕາມລະ ບຽບການ.

ໃນພິທີ ທ່ານ ບຸນເສີດ ເສດທິລາດ ໄດ້ກ່າວວ່າ: ວຽກງານເກັບກູ້ລະເບີດທີ່ບໍ່ທັນແຕກ ເປັນວຽກງານໜຶ່ງທີ່ສໍາຄັນ ແລະ ເປັນວຽກບູລິມະສິດແຫ່ງຊາດເຊິ່ງໄດ້ກຳນົດໄວ້ ເປັນເປົ້າໝາຍການພັດທະນາແບບຍືນຍົງ SDG18 “ຊີວິດທີ່ປອດໄພຈາກລະເບີດບໍ່ທັນແຕກ” ມາໃນ ປັດຈຸບັນລັດ ຖະບານ ໄດ້ມີການຫັນທິດຊີ້ນໍາໆພາຕໍ່ວຽກງານດັ່ງ ກ່າວໄປຂື້ນກັບກະຊວງການຕ່າງປະ ເທດໂດຍອີງໃສ່ຄວາມຮຽກຮ້ອງຕ້ອງການຂອງໜ້າວຽກ ແລະ ເຮັດໃຫ້ການປະສານງານມີຄວາມກະທັດຮັດໂລ່ງລ່ຽນຂຶ້ນ ພ້ອມນີ້ທ່ານຍັງໄດ້ຮຽກຮ້ອງໃຫ້ພະແນກການຕ່າງປະເທດແຂວງ ແລະ ພະແນກແຮງງານ ແລະ ສະຫວັດດີການ ສັງຄົມເອົາໃຈໃສ່ໃນການຊີ້ນໍາໆ ພາບັນດາອົງການປະຕິບັດງານ NGO, ໂຄງ ການເກັບກູ້ລະເບີດປະຈຳແຂວງ, ບັນດາບໍລິສັດ ພ້ອມກັນລົງຊຸກຍູ້ ແລະ ຕິດຕາມຢ່າງເປັນປົກກະຕິ ຖ້າພົບຄວາມຫຍຸ້ງຍາກ ຫຼື ປະ ສົບບັນຫາແມ່ນໃຫ້ຮີບຮ້ອນພ້ອມກັນແກ້ໄຂບັນຫາຢ່າງເອົາຈິງເອົາຈັງ ເພື່ອຮັບປະກັນເຖິງຜົນສໍາເລັດ.

ພາບ-ຂ່າວ: ມະນີວອນ