ແຂວງ ອັດຕະປື ມີແຫລ່ງນໍ້າທຳມະຊາດ ຫລາຍສາຍ ເປັນຕົ້ນ ນໍ້າເຊກອງ, ເຊກະໝານ, ເຊປຽນ, ເຊນໍ້ານ້ອຍ, ເຊຄຳພໍ, ເຊຊູ, ນໍ້າກົງ, ນໍ້າປາ, ນໍ້າງອນ. ປັດຈຸບັນທົ່ວແຂວງ ມີວັງສະຫງວນ 20 ແຫ່ງ ຢູ່ 20 ບ້ານ ໃນ 5 ເມືອງ ເພື່ອໄວ້ເປັນບ່ອນອະນຸລັກ ປາ ແລະ ສັດນໍ້ານາໆຊະນິດ ໃນນີ້, ເມືອງໄຊເສດຖາ ມີວັງສະຫງວນ 3 ແຫ່ງ ຢູ່ບ້ານ ສົມໂຄດ, ໄຊສີ ແລະ ບ້ານຕວຍ, ເມືອງສາມັກຄີໄຊ ມີ 6 ແຫ່ງ ຢູ່ບ້ານເຊກອງ, ເວີນແຄນ, ສະເພົາທອງ, ຮົມ, ເຜົ່າສໍາພັນມີໄຊ ແລະ ບ້ານຫລັກ 56, ເມືອງສະໜາມໄຊ ມີ 6 ແຫ່ງ ຢູ່ບ້ານປຸຍ, ຄັງ, ຫາດຍາວ, ສົ້ມປ່ອຍ, ຫາດໃຫຍ່ອຸດົມໄຊ ແລະ ບ້ານຫີນລາດ. ສ່ວນເມືອງ ຊານໄຊ ມີ 2 ແຫ່ງ ຢູ່ບ້ານວັງໄຊ ແລະ ນໍ້າງອນ, ເມືອງພູວົງ ມີ 2 ແຫ່ງ ຢູ່ບ້ານວັງຢາງ ແລະ ບ້ານຄໍາວົງສາ.
ທ່ານ ພອນປະເສີດ ທອງສີທາວົງ ຫົວໜ້າພະແນກ ກະສິກຳ ແລະ ປ່າໄມ້ ແຂວງອັດຕະປື ໄດ້ໃຫ້ສໍາພາດໃນວັນທີ 11 ກໍລະກົດ 2024 ນີ້ວ່າ: ປັດຈຸບັນ ສະພາບການຫາປາ ແລະ ສັດນໍ້າ ຢູ່ພາຍໃນແຂວງຂອງພໍ່ແມ່ປະຊາຊົນ ແມ່ນແຕກຕ່າງຈາກແຕ່ກ່ອນຫລາຍ ຈາກແຕ່ກ່ອນຜ່ານມາເຄີຍນໍາໃຊ້ແຫ, ມອງ, ສ້ອນ, ໄຊ ໃນການຫາປາ ແລະ ສັດນໍ້າ, ແຕ່ມາໃນຍຸກນີ້ ການຫາປາ ແມ່ນໃຊ້ເຄື່ອງມືຫລາຍຮູບແບບທີ່ມີ ຄວາມສ່ຽງເຮັດໃຫ້ ປາ ແລະ ສັດນໍ້າ ສູນພັນ ທີ່ຜິດຕໍ່ລະບຽບກົດໝາຍ ເປັນຕົ້ນ ໃຊ້ເຄື່ອງໄຟຟ້າດູດ-ຊ໋ອດ, ຕ້ອນ-ລີ່ ຕັນຫ້ວຍ, ຮ່ອງ, ຄອງນໍ້າ ແລະ ການຫາ ຫລື ຈັບປາ ແລະ ສັດນໍ້າ ໃນລະດູວາງໄຂ່ ໃນສະຖານທີ່ຫວງຫ້າມ ຫລື ເຂດອະນຸລັກພັນສັດນໍ້າ, ເຂດວັງສະຫງວນ ແລະ ໜອງຊຸມຊົນ.
ຕໍ່ບັນຫາດັ່ງກ່າວ, ທາງພະແນກກະສິກໍາ ແລະ ປ່າໄມ້ແຂວງ ຈະສືບຕໍ່ເຜີຍແຜ່ລະບຽບກົດໝາຍ ວ່າດ້ວຍສັດນໍ້າ ແລະ ການປະມົງ ຕິດພັນກັບການຜັນຂະຫຍາຍຄໍາສັ່ງ ສະບັບເລກທີ 12/ຈຂອປ, ລົງວັນທີ 20 ມິຖຸນາ 2024 ວ່າດ້ວຍການສ້າງຂະບວນການປ່ອຍປາ ແລະ ສັດນໍ້າ ຄືນສູ່ແຫລ່ງນໍ້າທຳມະຊາດ ແລະ ຕາມອ່າງເກັບນໍ້າ, ຕາມໜອງ ແລະ ແຫລ່ງນໍ້າອື່ນໆ, ສືບຕໍ່ການຊຸກຍູ້, ສົ່ງເສີມ ແລະ ປູກຈິດສານຶກໃນການອະນຸລັກປົກປັກຮັກສາ, ພັດທະນາປາ ແລະ ສັດນໍ້າ ໃຫ້ມີຄວາມຍືນຍົງ ຢູ່ໃນແຕ່ລະບ້ານ ເພື່ອໃຫ້ປະຊາຊົນ, ນັກຮຽນ, ນັກສຶກສາ ໄດ້ຮັບຮູ້ ແລະ ເຂົ້າໃຈ ເຖິງຄວາມໝາຍຄວາມສໍາຄັນໃນການອະນຸລັກປົກປັກຮັກສາ ວັງສະຫງວນ, ຖິ່ນທີ່ຢູ່ອາໄສ, ແຫລ່ງກຳເນີດ, ແຫລ່ງອາຫານປາ ແລະ ສັດນໍ້າ ເພື່ອເພີ່ມຄວາມອຸດົມສົມບູນ ຂອງທຳມະຊາດ ເພື່ອເຮັດໃຫ້ປະຊາກອນ ປາ ແລະ ສັດນໍ້າ ເພີ່ມຂຶ້ນໃນຕໍ່ໜ້າ ແລະ ອື່ນໆ.
ທີ່ມາ: ວັດທະນາ
