ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 29 ພຶດສະພາ 2024 ນີ້, ຢູທີ່ສະໂມສອນ ກອງບັນຊາການທະຫານ ແຂວງອັດຕະປື ໄດ້ຈັດກອງປະຊຸມສະຫຼຸບຜົນການຂຸດຄົ້ນ, ທ້ອນໂຮມ ແລະ ນຳສົ່ງອັດຖິທະຫານອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະຊີວິດແຕ່ປາງສົງຄາມ ປະຈຳສົກປີ 2023-2024 ຝ່າຍລາວນຳໂດຍສະຫາຍ ພົນຈັດຕະວາ ໂຊກໄຊ ພິມມະລາ ຄະນະປະຈຳພັກແຂວງ ເລຂາພັກ ຫົວໜ້າການເມືອງກອງບັນຊາການທະຫານແຂວງ, ຫົວໜ້າຄະນະປະຕິບັດງານພິເສດແຂວງອັດຕະປື ແລະ ຝ່າຍ ສ.ສ ຫວຽດນາມ ນຳໂດຍ ທ່ານ ນາງ ອີ ງັອກ ຮອງປະທານຄະນະກຳມະການປະຊາຊົນແຂວງ, ຫົວໜ້າສະເພາະກິດແຂວງກອນຕູມ ສ.ສ ຫວຽດນາມ ພ້ອມດ້ວຍຄະນະ ແລະ ບັນດາສະຫາຍໃນຄະນະກໍາມະການ ປະຕິບັດງານພິເສດທັງສອງແຂວງເຂົ້າຮ່ວມ.
ກອງປະຊຸມໄດ້ຕີລາຄາຄືນສະພາບການ ແລະ ໝາກຜົນຂອງການຈັດຕັ້ງປະຕິບັດໜ້າທີ່ໃນການຊອກຫາ, ຂຸດຄົ້ນ ແລະ ທ້ອນໂຮມອັດຖິຢູ່ລາວ ໃນພື້ນທີ່ຂອງແຂວງອັດຕະປື ສົກປີ 2023-2024 ເຊິ່ງຄະນະກຳມະການປະຕິບັດງານພິເສດສອງຝ່າຍ ໄດ້ມີການປະສານສົມທົບຊີ້ນຳອຳນາດການປົກຄອງແຕ່ລະຂັ້ນເຮັດວຽກງານໂຄສະນາເຜີຍແຜ່, ຂົນຂວາຍປະຊາຊົນ, ເຖົ້າແກ່ແນວໂຮມ, ນາຍບ້ານ ເພື່ອປະສານສົມທົບໃນວຽກງານຊອກຫາ, ສະໜອງຂໍ້ມູນ ແລະ ນຳພາໃຫ້ກອງຂຸດຄົ້ນອັດຖິ K 53 ລົງຂຸດຄົ້ນທັນເວລາ, ຊັດເຈນ ມີປະສິດທິຜົນ, ກຳແໜ້ນສະພາບການໃນພຶ້ນທີ່, ຊີ້ນຳບັນດາທ້ອງຖິ່ນເພື່ອຮັບປະກັນຄວາມປອດໄພ, ຄວາມສະຫງົບໃຫ້ແກ່ກອງຂຸດຄົ້ນແຕ່ລະໄລຍະຢ່າງຕໍ່ເນື່ອງ ແລະ ໄດ້ຮັບຜົນສຳເລັດຢ່າງຈົບງາມຕະຫຼອດມາ.
ສັງລວມແລ້ວການຂຸດຄົ້ນທີ່ຜ່ານມາ ຄະນປະຕິບັດງານພິເສດ ທັງສອງແຂວງສາມາດປະຕິບັດໄດ້ເກີນຄາດໝາຍ ຄື : ຈາກ 3 ໄດ້ 6 ອັດຖິ ໃນພິທີທັງສອງຝ່າຍ ໄດ້ຕີລາຄາສູງເຖິງການພົວພັນ ຮ່ວມມືລະຫວ່າງສອງພັກ, ສອງລັດ ກໍຄື: ແຂວງອັດຕະປື-ແຂວງກອນຕູມ ແລະ ສອງກອງບັນຊາ ການທະຫານແຂວງອັດຕະປື-ກອນຕູມ ສ.ສ ຫວຽດນາມ ທີ່ມີມູນເຊື້ອມາແຕ່ດົນນານແລ້ວນັ້ນ ໃຫ້ນັບມື້ຈະເລີນງອກງາມຍິ່ງໆຂຶ້ນ,ຈາກນັ້ນ ທັງສອງ ຝ່າຍກໍໄດ້ເຊັນບົດບັນທຶກມອບ-ຮັບຢ່າງເປັນທາງການ ແລະ ຕອນທ້າຍຍັງໄດ້ມອບຂອງຂວັນເຊິ່ງກັນ ແລະ ກັນຕື່ມອີກ.
ໂດຍ: ແສງຫຼ້າ ກຸວົງສາ