ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພະແນກໂຍທາທິການ ແລະ ຂົນສົ່ງ ແຂວງອັດຕະປື ເຊັນສັນຍາອະນຸຍາດໃຫ້ບໍລິສັດຜູ້ປະກອບການ ເພື່ອເປີດທົດລອງລົດຂອງລັດ (ລົດເມນ້ອຍ 13 ບ່ອນນັ່ງ) ບໍລິການໂດຍສານ ສາທາລະນະພາຍໃນແຂວງ ໃນວັນທີ 27 ມິຖຸນາ 2024, ເຊິ່ງລົດດັ່ງກ່າວ ໄດ້ຮັບການຊ່ວຍເຫລືອຈາກ ບໍລິສັດບູຢອງ ລາວຈຳກັດ ແລະ ແຂວງໄດ້ມອບຕໍ່ໃຫ້ພະແນກຄຸ້ມຄອງ ຈຳນວນ 10 ຄັນ, ໃນນີ້ ໄດ້ເຮັດສັນຍາກັບ ບໍລິສັດ ຄຳກ່າຍ ບໍລິການຂົນສົ່ງໂດຍສານ ທົດລອງບໍລິການ ຈຳນວນ 6 ຄັນ ເພື່ອບໍລິການຂົນສົ່ງໂດຍສານພາຍໃນແຂວງ.
ການລົງນາມຄັ້ງນີ້, ທັງສອງຝ່າຍໄດ້ມີຄວາມເປັນເອກະພາບກັນຄື: ລາຄາຂົນສົ່ງໂດຍສານ ຕ້ອງນອນຢູ່ໃນລາຄາທີ່ພະແນກໂຍທາທິການ ແລະ ຂົນສົ່ງແຂວງ ຄິດໄລ່ອອກໃຫ້ຕາມການນໍາໃຊ້ໂຄງສ້າງການຄິດໄລ່ ລາຄາຫົວໜ່ວຍຂົນສົ່ງໂດຍສານປະຈຳທາງ ແລະ ສິນຄ້າທາງບົກ, ສະມາຄົມຄິວ, ສ່ວນຕາຕະລາງແລ່ນລົດ ປະຈຳສາຍທາງ ພາຍໃນແຂວງ ຈຸດຄິວໂດຍສານ ເມືອງສາມັກຄີໄຊ ຫາຊາຍແດນດ່ານສາກົນ ຖ້ຽວທີ 1 ເວລາອອກ 8:30 ໂມງ ແລະ ເວລາກັບ 9:30 ໂມງ, ຖ້ຽວທີ 2 ເວລາອອກ 13:00 ໂມງ ແລະ ເວລາກັບ 13:0 0ໂມງ; ຈຸດຄິວລົດໂດຍສານເມືອງສາມັກຄີໄຊ ແລ່ນເສັ້ນທາງ ບ້ານສີວີໄລ-ວັດພູສະຟອງ-ວັດສະແຄະ-ບ້ານຫລາດສະຕີ-ບ້ານຕາດແສງ-ຕົວເມືອງຊານໄຊ ຖ້ຽວທີ 1 ເວລາອອກ 8:30 ໂມງ ແລະ ເວລາກັບ 9:30 ໂມງ, ຖ້ຽວທີ 2 ເວລາອອກ 13:00 ໂມງ ແລະ ກັບເວລາ 13:00 ໂມງ; ຈຸດຄິວລົດໂດຍສານເມືອງສາມັກຄີໄຊ ຫາສະໜາມໄຊ ຖ້ຽວທີ 1 ເວລາອອກ 9:00 ໂມງ ແລະ ເວລາກັບ 9:00 ໂມງ, ຖ້ຽວທີ 2 ເວລາອອກ 13:00 ໂມງ ແລະ ກັບເວລາ 13:00 ໂມງ.
ການອະນຸຍາດໃຫ້ບໍລິສັດຜູ້ປະກອບການ ເປີດທົດລອງບໍລິການໂດຍສານສາທາລະນະ ພາຍໃນແຂວງ ອັດຕະປື ຄັ້ງນີ້ ແມ່ນປະຕິບັດຕາມນະໂຍບາຍຂອງພັກ ແລະ ລັດ ກໍຄືປະຕິບັດຕາມທິດຊີ້ນໍາຂອງແຂວງ ເພື່ອປະກອບສ່ວນພັດທະນາ ເສດຖະກິດ-ສັງຄົມຂອງແຂວງ ໃຫ້ມີຄວາມເຂັ້ມແຂງ ແນໃສ່ສ້າງເງື່ອນໄຂອຳນວຍຄວາມສະດວກ ແກ່ການຂະຫຍາຍຕົວ ທາງດ້ານການຂົນສົ່ງໂດຍສານພາຍໃນແຂວງ ໃຫ້ມີຄວາມສະດວກ, ວ່ອງໄວ, ປອດໄພ ແລະ ຂົນສົ່ງເຖິງຈຸດໝາຍປາຍທາງທີ່ກໍານົດໄວ້.
ຕາງໜ້າລົງນາມຄັ້ງນີ້ ໂດຍທ່ານ ປັນຍາ ວົງພູທອນ ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງອັດຕະປື ແລະ ທ່ານ ຄໍາກາຍ ຫົວໜ້າບໍລິສັດ ບໍລິການຂົນສົ່ງໂດຍສານພາຍໃນແຂວງ, ມີພາກສ່ວນກ່ຽວຂ້ອງເຂົ້າຮ່ວມເປັນສັກຂີພະຍານ.
ຂ່າວ: ວັດທະນາ