ວັນທີ 12 ມິຖຸນາ 2024 ທີ່ຫໍປະຊຸມໃຫຍ່ແຂວງ ອັດຕະປື ໄດ້ຈັດກອງປະຊຸມຝຶກອົບຮົມ ໃຫ້ພະນັກງານນຳພາ-ຄຸ້ມຄອງ ເພື່ອກຽມຫັນລົງກໍ່ສ້າງຮາກຖານການເມືອງ ແລະ ພັດທະນາຊົນນະບົດ ຕາມທິດ 3 ສ້າງ, ໂດຍການເປັນປະທານຂອງ ສະຫາຍ ຄຳບຸນ ດວງພະບາງ ຮອງເລຂາພັກແຂວງ ຜູ້ຊີ້ນຳວຽກງານແນວຄິດ, ວຽກພັກ-ພະນັກ ງານຂັ້ນແຂວງ, ມີຄະນະຮັບຜິດຊອບກະກຽມຫັນພະນັກງານລົງກໍ່ສ້າງຮາກຖານການເມືອງ, ວິທະຍາກອນ ແລະ ສຳມະນາກອນເຂົ້າຮ່ວມ.
ກອງປະຊຸມໄດ້ດໍາເນີນໄປເປັນເວລາ 3 ວັນ ຈຶ່ງສຳເລັດ, ເຊິ່ງບັນດາຜູ້ເຂົ້າຮ່ວມຈະໄດ້ເຊື່ອມຊືມເອກະສານຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ, ເອກະສານຂອງກົມການເມືອງສູນກາງພັກ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ເອກະສານຄໍາສັ່ງແນະນໍາຂອງຄະນະໂຄສະນາອົບຮົມສູນກາງພັກ ກ່ຽວກັບການສ້າງຂະບວນການ ເພື່ອກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ, ມະຕິຂອງກົມການເມືອງສູນກາງພັກ ວ່າດ້ວຍທິດທາງ, ເປົ້າໝາຍ ແລະ ມາດຕະການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ, ຄໍາສັ່ງຂອງກົມການເມືອງສູນກາງພັກ ວ່າດ້ວຍການເພີ່ມທະວີ ການນໍາພາ-ຊີ້ນໍາ ວຽກງານພັດທະນາຊົນນະ ບົດແກ້ໄຂຄວາມທຸກຍາກຂອງປະຊາຊົນ, ກໍ່ຄືການນໍາພາການສ້າງຄອບຄົວຕົວແບບ, ສ້າງສ້າງບ້ານພັດທະນາ ແລະ ການສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດ, ສ້າງເມືອງພັດທະນາ ແລະ ເມືອງເຂັ້ມແຂງຮອບດ້ານຕາມທີ່ໄດ້ກໍານົດໄວ້ໃນດໍາລັດ 348/ລບ, ເອກະສານມະຕິຄະນະບໍລິຫານງານສູນກາງພັກ ວ່າດ້ວຍການປັບປຸງຮາກຖານການເມືອງຂອງລະບອບປະຊາທິປະໄຕ ປະຊາຊົນໃຫ້ມີຄວາມເຂັ້ມແຂງ ແລະ ໜັກແໜ້ນ ແລະ ນິຕິກໍາອື່ນທີ່ກ່ຽວຂອງກັບວຽກງານກໍ່ສ້າງຮາກຖານການເມືອງ.
ຂ່າວ: ໄພບູນ
